ورقہ 215

4002
نک بے شک فولادی کھنا واڈھ صفا مہین اے
جھٹ نہ لایا ویکھدیاں ہی پھٹ گھتیوس وچ سینے
4003
پلکاں تیر خدنگ نشانی ابرو سخت کماناں
ولول ول کمند دوزلفاں بدھیوس کرسمیانا
4004
چشمہ آب حیات سچے دا منہ ِمٹھا جد ڈِٹھا
خضر مثال ہنیرے اندر کھول دتا رب چٹھا
4005
روشن شمع متابی وانگر چہرہ تیرا تک کے
بُھج پتنگ ہویا جیو میرا مرمکا سڑ پک کے
4006
لا علاج آزاروں بدرہ جان لباں پر آئی
مردی جاندی نوں شاہزادے آس ملن دی لائی
4007
جے شہزادہ آس نہ لاندا تاں میں ساں مر جاندا
پلک پلک اس درد تیرے تھیں برس دہاں دا جاندا
4008
زرد کیتا رنگ درد تیرے نے رت سڑی وچ دیہی
ایڈے سفر اندر نہیں ویکھی مشکل بُری اجیہی
4009
تاہنگ تیری دی سانگ کلیجے دم دم اندر رڑ کے
ایہ دل میرا گوشت بیرا بولیا سیخے چڑھ کے
4010
عشق تیرے دی نار بھلیری دوزخ دی اگ نالوں
لنب بلے ہر والوں بدرہ کوئی نہ محرم حالوں
4011
اُٹھی کلیجے پیڑ اولّی سِیڑھ لیوس تن سارا
تدھ بن کس نوں نبض دسالُوں کون طبیب ہمارا
4012
بدرہ خاتوں آکھ سناندی صاعد اگے روکے
دمّاں باجھ تیری میں گولی صدقے صدقے ہوکے
4013
عشقے والی حال حقیقت جو تدھ آکھ سنائی
سوئیو جان میرے سر ورتی ہتھوں ہور سوائی
4014
جس دم تھیں توں نظری آیا صورت دا شہزادہ
بھڑکی بھاہ پریم تیرے دی تدھ تھیں کجھ زیادہ
4015
بھوہرے کتدی ہسدی وتدی چِنگ پئی وچ چولے
جھڑی متھے تھیں دھڑی خوشی دی زلفاں بنے پرولے
4016
عشق قصائی چھری وگائی کوہندا دے دے کسّاں
جگر کباب شراب لہو دا بول عذاب نہ دسّاں
4017
وچو وچ جراں سے پیڑاں کے کراں شرماندی
باہر روواں ظاہر ہوواں کوئی پیش نہ جاندی
4018
چنگی بھلی تیرے بھانے میں تن سُول سمانے
من مویا تن ثابت دسدا کون دلاں دیاں جانے
4019
جے ہک روز نہ ویکھاں تینوں سوز کنوں سڑ جاواں
پل پل دے وچ سے برساں دی مرمر گھڑی لنگھاواں
4020
ڈیرا تیرا تکدی رہندی محل اُچےّ تے چڑھ کے
جاں غم بہتا کاہلی پاوے روواں اندر وڑکے

لفظالی:
کھنا= کھانڈا، سدھی دو دھاری تلوار، واڈھ= کاٹ ، کپّن دا طریقہ ، مہین اے = باریک اے، خُدنگ= اک ہولی تے پکی لکڑی جس دا تیر بندا اے، چٹھا کھول دینا= رقم دی ادائیگی لئی مستقل طور تے کھاتہ کھول دینا۔ گرانٹ منظوری مل جانا، متابی= مہتابی چن ورگی، پلک= پلک جھمکن وچ لگا سماں، مردی جاندی= لباں تے جان والی نزع دی حالت وچ ، برس دہاں دا جاندا= اک پلک ٣٦٥دناں دا لنگھدا اے،نار= اگ ، بھلیری = ودھیری، سیڑھنا=سیوں کے اکٹھا کر لینا، دسالوں = دکھاواں ، دماں باجھ گولی= تنخواہ مُل توں بغیر لونڈی، بھوہرا= تہ خانہ جس وچ کڑیاں چھوپے پاندیاں نیں ، پرولا= چکی دے گنڈ وچوں آٹا اکٹھا کر کے باہر کڈھن والا۔ چھوٹا جیہا کپڑا ۔ زلفاں اودوں ای پرولا بنن گیاں جدوں اوہ گُچھا مُچھّا ہو جاون گیاں،وگائی=چلائی،کساں دے دے کے= کھچ جوڑکے نرڑ کے،