ورقہ 216

4021
اٹھے پہر خیال تیرے دا دل وچ نقش پکایا
صورت تیری حاضر رکھان تاں کوئی روز لنگھایا
4022
ایہ دکھ سہندی ڈردی رہندی گل نہ کہندی کسے
مت معلوم ہووے گل گھر وچ منہ تیرا نہیں دسے
4023
میں کواری نیونہہ لگایا کپّر قہر کمایا
گرم کچہری باپ میرے دی رکھیں شرم خدایا
4024
موہوں بولاں تاں ٹرن بچاراں لج لگے کُل شاہی
چٹی چادر باپ میرے دی لگدا داغ سیاہی
4025
دوہاں ولوں رب پردہ رکھے عشقے لج نہ لگے
نالے داغ نہ ہووے پیو دی چٹی داہڑی پگے
4026
مائی دائی سنگ سہیلی کائی بھین تے سکی
نہ اس گل دی محرم کیتی بھیت رکھاں ہو پکی
4027
توں بھیں لالا رکھ سنبھالا کریں نہیں گل واندی
بھیت نہ دس شزادے تائیں میں اس تھیں شرماندی
4028
تدھ نالوں دس حصے مینوں حرص ہوا زیادہ
چیتا چیتا کریں نہ واقف اس گل دا شاہزادہ
4029
ایہ گلان کر بدرہ پچُھدی میں ہن گھر نوں جاواں
مت باہروں شاہزادہ آوے بہت اس تھیں شرماواں
4030
صاعد کہندا بیٹھ ذرا ہک جا نہ آکھاں تینوں
جو دم گذرے نال سجن دے سو اے حیاتی مینوں
4031
نِت نِت ہے ہتھ لگدا کس نُوں ایہہ کرماں دا ویلا
رب جانے پھر نال سبب دے کدوں ہووے گا میلا
4032
باراں روز گزارے اگے وانگن باراں برساں
کیا جاناں ہن پھیر ملن تک یا جیوساں یا مرساں
4033
بدرہ کہندی پَیر میرا بھی باہر دروں نہیں پوندا
جان بدن وچ توہیں سجنا! چھڈ کے جان نہ ہوندا
4034
کے کراں کجھ وس نہ میرا دس جانی کے کرئیے
ایس وچھوڑے کولوں کیویں بیٹھ اکٹھے مرئیے
4035
دنیا ڈاڈھی دوتی دُشمن دوکھی لوک فسادی
چیچی دا چا کاں بناون ہتھوں کجھ زیادی
4036
سچوں کُوڑ نکھیڑن ناہیںتہمت لان شتابی
پاک پلیت پریت نہ لوڑن جوڑن چا خرابی
4037
یار یاراں ول تکدے تکن نہ جر سکن ساعت
فتنہ پاون شور مچاون گوشے کرن جماعت
4038
پڑدا پاڑن شرم اُگھاڑن ساڑن طعنے دے کے
عاشق کارن پکڑ اڈارن مارن سہوَرْ پیکے
4039
بن کے ویری چاڑھ کچہری اینویں کرن خواری
یاراں نالوں یار وچھوڑن بدیاں لان کواری

لفظالی:
تاں = ایس طرحاں، کپرّ= دریادا کنڈھا جنہوں ڈھالگی ہوو ے اوہ کنڈ ھا زور دی گونج نال خطرے دا اعلان کردا اے تے بیڑے پرھاں ہو جاندے نیں پر میرے معاملے وچ کپرّ نے قہر کمایا جو کوئی اعلان نہیں کیتا ، کپرّ دا قہر میں آپ سہیڑیا اے، گرم کچہری= غصےّ والی طبیعت، بچاراں ٹرنا= لوکاں ولوّں نندیا بھرے وچار تھاں تھاں تو ںسُنیجن، لج لگنا= بدنامی لگنا ' کُل = بنس ۔خاندان، بھیس = بھی دا مقامی تلفظ، واندی = ظاہر ، لالا= میاں سائیں آقا جناب (بھرا نہیں ) ٹ ک پلیٹس ڈکشنری، سنبھالا = احتیاط،حرص= محبت ، ہوا = خواہش ، چیتا چیتا= ویکھیں خیال کریں Mind you، دُوتی = لگائی بجھائی کرن والا بد اندیش ، چیچی دا کاں بنانا= کھمباں دی ڈار بنانا' مبالغہ آمیزی کرنا، جوڑن = اپنے کولوں جوڑ لین ، گوشے گرنا =جماعت اکٹھے بہ کے کانا پھوسی کرناتے بھیڑے متے پکانا ، شرم اگھاڑن= لج شرم والے مسئلیاں نوں دنیا وچ نشر کر دیندے نیں ، اڈارن۔۔۔۔۔۔ = اپنے کولوں اجیہی افواہ اڈاندے نیں کہ سوہرے پیکے دونویں ای مار دے نیں ،