ورقہ 217

4040
سنگ نکھیڑن لنگ اُگھیڑن جنگ سہیڑن گھر وچ
کنگ اٹھاون ڈنگ لگاون بھنگ پاون ہر ہروچ
4041
جے لوکاں دی بات ہلائی تُرت نہ مُکسی بھائی
نال رقیباں اساں غریباں توڑوں ہُندی آئی
4042
ویلا تھوڑا تے کم بہتا کاہنوں کراں پسارا
دسن دی کے حاجت ایہ گل جانے عالم سارا
4043
مطلب دی لکھ گل محمدؒ نہ کر چہج نکّما
گرم بہار اُداس طبیعت رہندا قصّہ لمّا
4044
سید باقر علی پیارا دور گیا دل چاہندا
جے اس کموں وہلا ہوندا طرف سجن دی جاندا
4045
وقت پچھان نہ چھیڑ محمدؒ گل پیارے والی
مت ایہ قصّہ رہے لباں تے دیوے درد اُبالی
4046
درد اپنے دی چھڑی کہانی روویں پیا محمدؒ
صاعد بدرہ کھلے اُڈیکن کتول گیا محمدؒ
4047
عاشق تے معشوق وچھوڑن نہیں میرا دل منے
تاہییں صاعد ولوں کنارے پیا پھراں ہر بنے
4048
پرجاں رب وچھوڑے میں تھیں ڈِھل نہ لگدی بھائی
خوب ملاپ ہویا ہن ساعت وچھڑن والی آئی
4049
سجناں کولوں رخصت ہویاں نال نصیباں جُڑئیے
پردے وچ گئی لنگھ چنگی گھر ول چل ہن کُڑئیے
4050
بدرہ صاعد وچھڑن لگے اُبھاّ ساہ لیونیں
باہروں سیف ملوکے والا کن آواز پیو نیں
4051
بدرہ جدوں حویلی وچوں باہر قدم اٹھایا
اگوں روبرو شزادہ ہک ہکلا آیا
4052
بدرہ خاتوں ہس کے کہندی سیف ملوکے تائیں
کے انعام دیویں گا مینوں جے خوشخبر سُنائیں
4053
سیف ملوک کہیا سن میری بدرہ خاتوں بھینے
کول میرے جو چیز چنگیری سوئیو تحفے دینے
4054
صاعد جیہا عزیز نہ کوئی باجھ بدیع جمالوں
اوہ کر نفر دیاں گا تینوں باجھ دموں بِن مالوں
4055
بدرہ خاتوں ایس جوابوں لازم ہو شرمانی
کج لیوس منہ پلاّ دے کے گل کہے پھر رانی
4056
میں پری دے آون والی خبر تینوں ساں دسدی
توں ہن اگوں کریں مزاخاں آکھ سناوے ہسدی
4057
سیف ملوک کہے لکھ توبہ کراں مزاخ نہ کائی
مسخریاں دی طاقت ناہیں سچی گل سنائی
4058
خانے کعبے دی سو مینوں ہے سوگند وڈیری
کہیا سچ مزاخ نہ کیتی سن توں بھینو میری

لفظالی:
لنگ اگھیڑن = بے شرمی نال پردے فاش کرن، کنگ اٹھاون = کلھا ۔ لڑائی فساد پوادین ،ڈنگ لگاون = چھپ کے زہریلا وار کرن، بھنگ پاون=ہندے کم وچ وگن پا دین لگائی بجھائی کر کے ناچاقی پوا دین،نال رقیباں= رقیباں دے ذریعے رقیباں دی لاگت بازی نال۔ شیطان بابے آدم دا رقیب سی ، توڑوں = مڈھوں ، سید باقر علی = سید محمد شاہ میر پوری دے پتر تے سید حیات علی شاہ دے بھرا سن میاں صاحب دے خاص مرید سن۔ میاں صاحب دی دعا نال ایہناں دے گھر اولاد نرینہ سید مظفر شاہ پیدا ہوئے تے سید باقر علی ہوراں دے بھراواں دا ایہہ طعنہ مُکا کہ تینوں جائیداد دی کیہ لوڑ اے تیرا تے پتر ای کوئی نہیں ، لازم ہو= لاجم شرمندی ہوکے، جُڑنا= ملاپ ہونا،کُڑئیے= بدرہ، ابھاساہ= آہ ۔ ہٹکورے بھریا لما ساہ، شرمانی = شرمائی، چہج=جھگڑے دا ودھا،