ورقہ 218

4059
اوڑک مائی باپ تیرے نوں ہک دن آکھ سناساں
جے رب سچے چاہیا تینوں صاعد نال منگاساں
4060
یاد رکھیں ایہ سخن اساڈا جان مزاخ نہ بھینے
برکت پاک عشق دی کولوں ساک اساں ایہ لینے
4061
ساک بدیع جمال پری دا منگاں پاک الہٰوں
ناتا تیرا صاعد کارن منگ لیا درگاہوں
4062
مولیٰ آس کرے گا پُوری سخنوں کرسی سچّا
درد جھلاں تے نرد نہ ہاراں مرد نہیں میں کچا
4063
سیف ملوکے دی گل سن کے دلوں ہوئی خوشحالی
چُپ چپاتی چلی بدرہ نہ کجھ بولی چالی
4064
ملکہ خاتوں تے ماں اس دی تاؤلیاں پھر آیاں
شاہزادے نوں یار ملن دیاں خبراں نیک سنایاں
4065
فوج بدیع جمال پری دی موج جیویں دریائی
''ایہ تک'' آئی سیف ملوکا ہویا کرم خدائی
4066
صدق ثبوت تے مشکل آساں آئیا پری پیاری
لکھ لکھ خوشی مبارک تینوں پہنچے سو سو واری
4067
ہے ساقی غم رہیا نہ باقی بہت ڈٹھی مشتاقی
ہسدا تے دل کھسدا آویں کھول دلے دی طاقی
4068
لال شراب پیال شتابی کر میری دلداری
ہوواں مست شکست نہ کھاواں یار ملن دی واری
بدیع الجمال دا سراندیپ شہر وچ آونا تے ملکہ خاتون نوں ملنا
شہزادے نوں پری ملاپ دا چاء چڑھنا
4069
واہ واہ گھڑی مبارک والی ساعت نیک حسابوں
آوے واء سجن دے پاسوں ہووے کرم جنابوں
4070
جھبدے ملدا یار پیارا نکلے فال کتابوں
آیا یار محمدبخشا چُھٹسی جان عذابوں
4071
سُن گلاں دل مستی پاوے پیتے باجھ شرابوں
ناڑیں تاراں گاون باراں بدن مثال ربابوں
4072
ڈُبّا بیڑا باہر آوے بُری ہجر دی ڈابوں
بادشہانہ ملے خزانہ اچن چیت خرابوں
4073
رُڑھدے جاندے نوں کوئی لاوے ندی کنارے پھڑکے
حاجی اوجھڑ بھُلےّ تائیں حج رلاوے کھڑکے
4074
دوزخ اگ غماں دی اندر خاک ہوئے جو سڑکے
بخشش دا آوازہ آوے بہو بہشتیں چڑھکے

لفظالی:
اوڑک = آخر کار، سخنوں = وعدے والے بچن توں ، نرد = شطرنج دا مُہرہ چوسردی گوٹ، خوشحالی = چنگی طبیعت، تاؤلیاں = چھیتی چھیتی ۔ کالھ نال ، دریائی= سمندر دی، بہت ڈِٹھی مشتاقی= ہُن ہور انتظار نہیں ہو سکدا ، طاقی = باری ۔ کھڑکی، ناڑیں تاراں = تندی دیاں تاراں ، کچا= نا تجربہ کار، بِھڑ=تھہ ۔ کھولے ۔ کھنڈر، صدق ثبوت= جے صدق ثابت قائم رہو ے تے مشکل آسان ہو جاندی اے ، اوجھڑ= رستیوں ہٹ کے دشوار گزار تھاں ، ایہہ تک= ہُنے ویکھ ، پیال = پلا، باراں =(١) کسے تاریخی واقعہ بارے جنگی نظم (٢) ٹ ک٢٨، موج= لہر، ڈاب = وگدے پانی وچ ڈوہنگھا ٹویا، رلادے = نال ملادیوے،