ورقہ 219

4075
بھارا بھار پریت لگی دا سائیں توڑ پُچاوے
واؤ فجر دی باغ ارم دی بوبہارلیاوے
4076
کیچم دا کروان سسی دے پتن باغ سُہاوے
سوہنا یار محمدبخشاگھٹ وچ نظری آوے
4077
کنعانوں سوداگر آوے مصر زلیخا والے
جلوہ روپ الٰہی والا یوسف آن دسالے
4078
لڈن ملاح ہیرے دی سیجے رانجھا یار سوالے
سُتا عزت بیگ محمد سوہنی جا اٹھالے
4079
شتر سوار کچاوے پیکے طے ولوں کوئی آوے
چڑھ کے نجد پہاڑی اُتے واگ و راگ اٹھاوے
4080
سپاں شیراں دے سرگاہ کے وانگ دلیراں جاوے
نال پیار محمد لیلیٰ مجنوں نوں گل لاوے
4081
جاں معشوق پیارا بھائی عاشق دے گھٹ آیا
ظاہر باطن غیر نہ رہیا اوسے دا سبھ سایا
4082
لِیْ مَعَ اللّٰہ وَقْتٌ یارو سچ نبی فرمایا
چُپ محمد جس کس پایا اوسے بھیت چھپایا
4083
وحدت دے دریاوے اندر چُبھی مار ہِٹھاہاں
مت ایتھوں سر باہر کڈھیں سُٹی دھک پچھاہاں
4084
ایہ اسرار نہ پھولیں ایتھے مت کوئی مار گوائی
شاہ شمس نے ہکسے سخنوں آہی کھل لہائی
4085
منہ نکاتے گل وڈیری نہ کر مت کوئی ہسّے
اعظم شافعی مالک حنبل ایہ مسئلے نہیں دسے
4086
وحدت دے دریا وچ پینا کم نہیں ہر ہر دا
لکھ جہاز ڈُبے پھر مُڑکے تختہ باہر نہ تردا
4087
کاہنوں باطن اندر وڑیوں ظاہر دی چھڈ بازی
رمز حقانی دسدا چلیں پردہ پاء مجازی
4088
آئی گل شاہزادے والی سن توں بھائی میرے
سراندیپ اندر آ لتھے شاہ پری دے ڈیرے
4089
شاہزادہ سن خبر پری دی ہک تھیں چار ہویا سی
بھاہ بھاہ کردا رنگ گلابی وانگ انار ہویا سی
4090
جنّھاں دی دس پوندی ناہیںنہ کوئی گل سناندا
لطف کیتا رب پاک اوہناں نوں کول اساڈے آندا
4091
نالے ایہ اندیشہ کردا گل نہیں ٹل جائے
مشکل وقت ایہو رب میرا مہر پری دِل پائے
4092
جنّھاں کارن گھر در سٹے راج حکومت شاہی
چودہاں برس مصیبت جھاگی جو کجھ لکھی آہی
4093
جاں جاں دس نہ پوندی آہی شوق آہا دس بُجھ دا
دس پئی تاں فکر ایہو سی کیویں اُت ول پُجدا

لفظالی:
کیچم دا کروان= شہر کیچ مکران دا اُوٹھ واہن والا۔ پُنوں ، سُہاوے= سوہنا لگے ، گھٹ = دل ، آن دسالے= لیاکے وکھاوے، عزت بیگ= مرزا عزت بیگ مہینوال دا اصل ناں سی، طے = عراق شام دے جنگلاں وچ دسدا اک قبیلہ، نجد= بابل والے پاسے دا ملک عرب۔ عرب دا پہاڑی علاقہ، سرگاہنا= سرپیراں نال مدھنا، گھٹ= دل ، لِیْ مَعَ اللّٰہِ وَقْتٌ= ٹ ک اسرار المرفوعہ حدیث نمبر 764میرا اللہ تعالیٰ نال اک ویلا اے ،شاہ شمس = شاہ شمس تبریز ٹ ک شخصیتاں ، ہکسے سخنوں = اک ای گل توں انا الحق کہن توں ، اعظم شافعی مالک حنبل= اہلسنت وجماعت دے فقہی اماماں دے ناں نیں ، بھاہ بھاہ کرنا= خوشی نال بھخنا،لطف کیتا = مہربانی کیتی، دس پانا= کسےبارے اطلاع دینا، بُجھنا= آپ گویڑ لاکے معلوم کر لینا،