ورقہ 221

4113
سراندیپ بہشت شزادہ روح تیرا سن بھائی
اوتھے یار دیدار دئے گا جس دی ترے کمائی
4114
ہر ہک نوں دیدار ہوویگا کافر مومن تائیں
کافر ویکھ لقا قہر دا لیسن سخت سزائیں
4115
مومن نوں دیدار ملے گا نال اخلاص پیاراں
باغ ارم وچ کول سجن دے کرسن بیٹھ بہاراں
4116
ہر بیتے وچ رمز فقر دی جے تدھ سمجھ اندر دی
گل سُنا محمدبخشاؒ عاشق تے دلبر دی
4117
بہت ہویا خوش وقت شہزادہ صاعد کول بلایا
اس بِن ہور آہا جو کوئی کولوں دور کرایا
4118
صاعد تائیں دے مبارک کہیا شزادے بھائی
اج بدیع جمال پری ہے اس نگر وچ آئی
4119
آن شراب کباب تمامی چنگ رُباب ستاراں
عطر گلاب خوشی دے ساجے جو لائق سرداراں
4120
لے لے نال دوئے دل جانی صاعد تے شاہزادہ
باغ اندر آ بیٹھے کر کے ڈیرہ خُوب امادہ
4121
سیف ملوک کہیا سُن بھائی جانی یار سفر دا
ہوروں ہور ہویا ہن میرا حال احوال اندر دا
4122
خوشی کمال میرے دل آئی ہویا چین ہزاراں
سُکاّ باغ دلے دا کھڑیا ساوا وانگ بہاراں
4123
پُہتی آن دماغ میرے وچ خوشبوئی دلبردی
میٹی کلی گلاباں والی کھولی واؤ فجردی
4124
چوداں برساں دی سردردی تروٹک سخت عمل دی
آن نشے دا ویلا ہویا ڈھل رہی پل جھل دی
4125
دلبر دا مکھ لال پیالہ مدھ حسن دا بھریا
ساقی قدرت والے مینوں آن تلی پر دھریا
4126
آیا مساں لباں دے نیڑے ہور سبھو غم بھُلّے
تُفوںتُفوں جند کرے محمدؒمت ہتھون چھُٹ ڈُلھّے
4127
پریاں نوری لوک کہاون جُثے جامے پاکی
دھکے دے کھدیڑے ناہیں میں بیچارہ خاکی
4128
اوہ بیٹی شاہپال شاہے دی ایس ولایت مَنّی
میں ایتھے پردیسی توڑے مصر اندر ساں سنیّ
4129
خبر نہں کے ہوندا بھائی باب اساڈے اِتھے
شان اوہدی دے لائق ناہیں میں کتھے اوہ کتھے
4130
پر جے مہر پِیا دل پاوے مالک آپ دلاں دا
لَاتَقْنَطُوا مِنْ رَّحْمۃ یارا قول سچا فرماندا
4131
ایہ گلاں فرما شزادہ غسل وضو کر پاکی
بن تن سیج اُتے چڑھ بیٹھا زیور پہن پوشاکی

لفظالی:
جس دی ترے کمائی= جہدے اعمال ٹھیک منے جاون گے، ساجے= ساز سامان، قہر دا لقائ= خدا تعالیٰ دی قہاری نوں جھلدے ہوئے، ساجے=سامان، اخلاص پیاراں = خلوص تے پیار نال ، بَیتے = بیت شعر، خوش وقت= اچھے موڈوچ، اندر= باطن ، آن = لے کے آ۔ انتظام کر ، چنگ = ستارورگا ساز، امادہ= ساز سامان نال تیار، تروٹک = کمی ۔ گھاٹا ، عمل = نشہ ، پل جھل= پلک جھلک، مدھ= شراب ، جند تفوں تفوں کرے= دل نوں دُھڑکو لگا ہویا اے، چھٹ = ڈِگ کے، کھد یڑنا= زبردستی چِک کے کڈھ دینا، توڑے = بھانویں ، سنّی= ثانی کسے دوسرے دے مقابلے وچ نامور، پِیا= محبوب ، لا تقنطومن رحمتہ= ٹ ک ق م الزمر ٥٣ اللہ تعالیٰ دی رحمت توں نا امید نہ ہووو،