ورقہ 223

4151
ملکہ بدرہ ماں اوہناں دی ہور تمامی سیّاں
چامل چاء محبت کولوں ملن پری نوں گیّاں
4152
شاہ پری نے ملکہ خاتوں مل اوّل گل لائی
بعد اس تھیں پھر بدرہ خاتوں پھیر اوہناں دی مائی
4153
مائی اگے سیس نوایا متھے تے ہتھ دھرکے
اس نے اگوں سر منہ چُمے بہت محبت کر کے
4154
وارو وار ملن سب سیاں آکھن صدقے گیاں
جیوں دِیوے تے ڈھہن پتنگے تیویں ڈھہ ڈھہ پیّاں
4155
پریاں نال سیاں دا میلا خوب طرح دا ہویا
سراندیپ بہشت برابر حوریں بھریا گویا
4156
ساوریاں رنگ گورے سیاں کنک وِنّے رنگ پکے
شرم حضور کوئی کوئی کردی ہس ہس اکھ مٹکے
4157
ہکناں دے گل سوہے کُڑتے سر تے بھوچھن بگے
دھڑی سندھور لگے وچ شیشے چمک پری نوں لگے
4158
ہکناں دے سر سبز دوپٹے سوسن رنگی انگی
گھیرے دار سُتھن چُن لائی سُرمائی کر رنگی
4159
ہکناں سُرخ پوشاک تمامی پیراں تھیں لگ چوٹی
باغ ارم جیوں گھاہ ہرے وچ ساون چیج بہوٹی
4160
ہکناں چھاپے دار پوشاکاں جوڑے نال بناتی
پَبّ اٹھاون چال وکھاون کڈھ کڈھ چلن چھاتی
4161
ہکناں دے سرساوی چادر گل وچ کڑتے کالے
سُتھن جٹکی سر پر مٹکی ٹُرن کبوتر چالے
4162
موڈھے مارن باہاں اُلارن گردن لک مروڑن
حسن مروڑاں کرن اجوڑاں تروڑاں دے تروڑن
4163
نین کٹاراں بھواں کماناں نک خنجر بے دستے
نال سیاں دے کُھوہ گیاں دے گوٹھی ملّن رستے
4164
کنڈل دار دو زلفاں لٹکن بھِنّیاں نال پھُلیلاں
چلن بن کے جھانجر چھنکے منکے ہار حمیلاں
4165
کجلے پاون تے مٹکاون لاون داغ تِلاں دے
اوہلے بہ بہ گاون سوہلے ڈھولے گیت دلاں دے
4166
کے نکمیّ گل محمد چل اگیرے چلاں
پر جس ایہ فرمائش کیتی اس بھاون ایہ گلاں
4167
جس دی خاطر رکھ ارادہ کیتا ایڈ تگادا
ایہناں گلاں تھیں اوس جنے نوں ہُندی خوشی زیادہ
4168
دل میرا پر چاہندا ناہیں بِن درداں دی باتوں
نال ضرورت تھوڑی تھوڑی گل کراں اس ذاتوں
4169
بدرہ نوں گل لا پری نے بہت محبت کیتی
سر منہ چُمےّ نال پیاراں میل دوہاں جِند سِیتی

لفظالی:
چامل چائ= محبت دے جوش دیاں ٹنبیاںہویاں، محبت کولوں = محبت توں مغلوب ہوکے، ساوریاں = سانولیاں، کنک ونے= گندمی رنگ دیاں ، پکا رنگ = جو گورا نہ آکھیا جا سکے، شرم حضور= سامنے آون توں شرماون والی، سوسن= آسمانی رنگ دا پھُل ، چیج بہوٹی=بِیر بہوٹی ۔ بارش مگروں پیدا ہوون والا سرخ بناتی رنگ دا کیڑا، حُسن مروڑاں= روپ گمان دے نخرے ، اجوڑ کرنا= ناراضگی دا ثبوت دینا،تروڑاں دینا= کسے ہور دے نخرے دی پرواہ نہ کرنا۔ بے نیازی وکھانا، تروڑن = کسے دا مان گمان توڑ دیون، گوٹھی ملّن رستے =صحبت گوٹھ رکھن والے محبتی مِلن لئی رستہ ملّ کے کھلوتے ہوندے نیں ، سوہلے = تعریفی گیت، گیت دلاں دے = دلاں دی حالت دسن والے گیت، تگادا= تقاضہ' مصیبت ، اس ذاتوں = ایس قسم دی،