ورقہ 224

4170
ملکہ دے ول ویکھ پری نوں بہت ہوئی خوشحالی
شُکر کرے جے پھیر لیاندی بھین میری رب والی
4171
جیوندیاں منہ اس دا ڈِٹھا لدھی گئی گواتی
اس بِن جیون ساڈے بھانے آہی بُری حیاتی
4172
مولیٰ سنگ ملائے مڑ کے کرم جگائے سُتے
ہو دلشاد پری چڑھ بیٹھی تخت سنہری اُتے
4173
مائی نے پھر کول پری دے آن چوگردے ڈھویاں
عود اکبر تے عنبراشہب مشک اذفر خوشبویاں
4174
مُشکاں دی کجھ حاجت ناہیں عجب جمال پری نوں
تازی شاخ گلابی سادی پُھلاں نال بھری نوں
4175
س دے قدر موافق آہی ایہ ہر چیز کمینی
ہر ہر وال اوہدے سنگ آہا لکھ لکھ نافہ چینی
4176
ٰصِفت اوہدی دی گل محمد کس منہ نال الاواں
منہ نِکا گل بہت وڈیری کیکر آکھ سناواں

شاہ پری دے رُوپ دی تعریف

4177
کاغذ قلم زبان میری وچ ایہ بیان نہ مِٹدا
عقل فکر ہن عاری ہویا کھلا سروسر پِٹدا
4178
ہر ہر تھاں مریندی آہی چوکڑیاں ودھ ہر نوں
ملی سزا طبیعت تائیں اوس فضولی کرنوں
4179
حسن بیان نہ ہُندا اس دا قصے دی فرمایش
لیک طبیعت اپنی والی کرساں کجھ ازمایش
4180
ول ہوندا کمتالی وچوں تاں افسوس نہ رہندا
تھوڑی بہتی صفت شکل دی اوڑک میں بھی کہندا
4181
جیؤں شاعر پنجابی کردے اوہ کم تُرت کری دا
پراوہ صفت نہ لائق ایتھے اُچاّ روپ پری دا
4182
اُجلا روپ پری دا بھائی پھیر طبیعت میری
پڑھنے والے کرو نہ طعنہ ہوگ کلام اچیری
4183
جیؤں محبوباں دی گل دسدے نظمی مرد حسابی
کجھ کجھ ڈول ہوویگی اوہو کدھرے ہوگ پنجابی
4184
جوجریاں دی لذت بہتی نرے ہکلے ماسوں
لذت دار سلونا بھائی لؤ محمد پاسوں
4185
پر جاں کٹ جگر دے بیرے میں کباب بناواں
رت دلے دی پانی پاکے غم دی اگ پکاواں
4186
پر جس ویلے کھاون والے ادھ کھادے مکھ موڑن
حاضر رہے نہ جیو اساڈا خوشی دلے دی تروڑن

لفظالی:
خوش حالی= طبیعت خوش ہوئی، لدھی = مل گئی، چوگردے ڈھویاں= دوالے ڈھیر لا دتے،مشکِ اذفر= خوشبو پاروں سب تون عمدہ کستوری، عنبر اشہب= کالے رنگ دا خالصعنبر ، عنبر = سمندر دی خوشبو دار سُکی جھگ، قدر = شان ، الاونا= اُچی اُچی مونہوں کڈھنا، نہ مِٹدا= نہیں سما ندا، فضولی= وادھو حرکت، لیک = لیکن۔پر، عاری = ننگا ۔ خالی کسے وڈیائی توں بناں، کمتالی= رجُھیواں۔ کم فرصتی، تُرت = چھیتی، اُجلا= روشن ۔ صبح، جو جریاں = ساگ وچ پکا یا گوشت،نظمی مرد حسابی= حسن دے تناسب نوں بیان کرن والا شاعر ، نرے ہکلے ماسوں = صرف خالص گوشت توں ، ادھ کھادے= ادھا کھا کے، مُکھ موڑن = نفرت کر کے کھانا چھڈ بہن،عود اکبر=کالے رنگ دی خوشبو دار لکڑی جنہوں عود سوز وچ ساڑ کے محفل نوں خوشبودار کر دے نیں،