ورقہ 226

4206
رے تے سین رلے سنگ میمے رسم بنی محبوبی
میمے دی گنڈھ نال دنداں دے کھول دکھائی خوبی
4207
باغ ارم دے روپوں آہی اس دی شکل نمونہ
صورت اندر پیدا ہویا گُل پھل گونہ گونہ
4208
اوہناں پھُلاں تے بھوراں وانگن ٹکّا بِندی والا
جیوں گلزار اندر آ بیٹھا حبشی بچہ کالا
4209
ٹھوڈی سی پھِنڈ صاف رُپے دی ٹکی باجھ زکاتوں
وچ ٹووا پرسیؤں بھریا چشمہ آب حیاتوں
4210
بغلاں موہنڈے طعنے مارن چنبے دے پھُل چٹّے
مثل کلی دی گھُٹّی دیہی سر تھیں لے لگ گِٹےّ
4211
سوہنا بدن پھُلاں دا دستہ پلے وچ چھپایا
کیتے جتن ہزار ہزاراں کسے نہ درسن پایا
4212
دو پستان صفائی والے نویں شگوفے اُگے
کالے بھور اُپر رکھوالے نظروں زخم نہ پُگےّ
4213
سینہ صاف صندل دی تختی جوڑ استاد بنائی
واہ استاد کریگر جس نے ایہہ پیوند لگائی
4214
پتلا چم سفید شکم دا جیوں کاغذ کشمیروں
ریشم قسم اُچی دا یا سی لچھّا سُوت حریروں
4215
لچ لچ کر دا منکا وِچ دا لک مہین بیانوں
پیر اٹھاوے تاں ول کھاوے اُٹھدی ڈرے زیانوں
4216
لکوں لے لگ پیراں تائیں کراں خیال نہ من دا
بادشہاں دے ستریں جائے کے مقدور سخن دا
4217
چاندی پیر تکے جد چاندی جاندی جان بچاندی
قد میں ڈھہندی عرضاں کہندی سجدیوں سیس نہ چاندی
4218
نازک پیر گلاب پری دے مہندی نال سنگارے
تلے دار بناتی پِنھیاں چمکن وچ ستارے
4219
کلغی مغزی نوک پنجے تے جڑت ہوئی فیروزے
پَنے تَلے پتاوے پلّے سبھ سُچے زردوزے
4220
پھوک چلائیے تاں اُڈ جاون وانگن سُوہیاں چڑیاں
کھِڑیاں کلیاں رتیاں جہیاں پیریں سوبھن کڑیاں
4221
حسن بدیع جمال پری دا وانگ بہار چمن دی
سُنبل وال مہین زنجیری ہر مینڈھی ون ون دی
4222
نرگس مست بیمار پری دے نین گوہڑے متوارے
چہرہ پُھل گلاب بہاری گُل لالے رخسارے
4223
پاڑ سٹے پیراہن گل دے چہرہ ویکھ گلاباں
گلدے گلدے عرق سدائے رل گئے وچ آباں
4224
لال گلال گلہاں ول تک کے داغ لگا گُل لالے
جمیّ رَت کلیجے اُتے پِیندا زہر پیالے

لفظالی:
پھِنڈ= گیند، کھدو، رُپا= چاندی، ٹکا بندی والا= گورے مُکھ تے لایا کالے رنگ دا تتولاجیہڑا گورے رنگ نوں نمایاں کردا اے،باجھ زکاتوں = عاشق لوک محبوب دے کسے سوہنے انگ نوں چُمکے آکھدے نیں اساں حسن دی زکاۃ لئی اے'باجھ زکا توں مراد اے حالے کسے غریب عاشق نے زکاۃ نہیں وصولی، بغلاں موڈھے۔۔۔۔۔۔=عام طور تے موڈھے تھلے بغلاں وچوں بدبو آوندی اے پر ایہ بغلاں چنبے نوں طعنے مار رہیاں نیں خوشبوولوں ودھ نیں ،ٹووا= ٹھوڈی اندر پئے ٹوئے نوں چاہ ذقن آکھدے نیں ، پرسے= پسینہ، کالے بھور = پستاناں دے نپل کالے ہوندے نیں جو کالے بھونڈ رنگے نیں اوہ راکھی کردے نیں پئی کسے دی بھیڑی نظر دازخم وی اوتھوں تائیں نہ پہنچے، حریر= ریشم ، وچدا منکا= ریڑھ دی ہڈی دی درمیانی گنڈھ، بیانوں مہین= اینا باریک اے کہ بیان نہیں ہو سکدا، بناتی پنھی= سرخ رنگ دی بانات دے سلیپر، کڑیاں = گٹے تے پاون والا گہنا ، سوبھن = سوبھادیون ۔سجن پھبن، زیانوں = نقصان توں ( کدھرے لک ٹٹ ای نہ جاوے) ہزاراں = ہزار داستاناں بلبلاں ،