ورقہ 228

4244
ہوندے غرق جہاز دلاں دے لگدا کون کنارے
پر اس وہن محمد بخشا جو ڈُبےّ رب تارے
4245
جادوگر اُداس ایانے بِن پیتے متوارے
اوپر خماری کرن اسواری پھرن شکاری بھارے
4246
کٹ کٹ سٹن کٹک دلاندے لین جہان ازارے
کردے وار ہتھیار جنہاں دے سرمے سار سنگارے
4247
ہک واری دے ویکھن کارن سیکڑیاں سروارے
پاک شہید محمد بخشا ؒجو اس جھگڑے مارے
4248
تکن سات کریندا گھائل نک خنجر فولادی
اوہو قاتل اوسے اگے پھیر کُٹھے فریادی
4249
پتلا اُچّا نک پری دا دھار جویں تلواروں
لونگ بلاق سُچے دی تابش جھلک لگے چمکاروں
4250
سدھا تیر صفائی والا زہر الودی کانی
اڈدے پکھنو مار گوائے کیا طاقت انسانی
4251
کاتب لوح قلم دے لکھیا حکمت دی تدبیروں
وچ بسم اللّٰہ اللّٰہ اکبر الف ذبح تکبیروں
4252
متھا لوح ازل دے نوروں قلم آہا نک بھائی
مڈھوں اک اگوں منہ دوئے ناہی خط خطائی
4253
سُرخی لکھن والی آہی وات دوات نورانی
صوفاں سِر الٰہی نکلن اکھر عشق حقانی
4254
لکھن کے رُشنائی خونی سر خط عاشق فانی
بول تیرے توں گھول گھمائیے سے جُثےّ لکھ جانی
4255
سدا بہار گلاب گوہڑے دی وات کلی مکھ میٹی
صاف آواز پرم رس والا جیوں رانجھے دی سیٹی
4256
سوہنا سُرخ عقیقی تھیوا مہر ٹکی سلیمانی
موری مثل سوئی دے نکے آہی ذرہ نشانی
4257
سچا موتی سل ٹکایا کاری گراں سیانا
یا اوہ گرد پتاسہ مصری لذت دار مکھانا
4258
لعل لبان یاقوت سُچے سن شکر مصری ڈلیاں
لالی تے باریکی ولّوں گُل عباسی کلیاں
4259
پستہ مغز بادام گری سن جس ویلے منہ میٹے
گل کرے ونڈدے چھوہارے ہسے تاں پھُل ویٹے
4260
لالی ویکھ لباں دے والی والی مصر شہر دا
مورت اگے نال ضرورت ہوگیا سی بردا
4261
دند سفید ہیرے دیاں کنیاں گھنیاں گھنیاں لاراں
اُستا کار برابر کرکے رکھیاں خوب قطاراں
4262
یا ان بِدھے موتیں بِدھے گھت قدرت دیاں تاراں
یا اوہ چنبے کلیاں جڑیاں پنج چوکے ہک یاراں

لفظالی:
اوپر خماری۔۔۔۔۔۔ = نشہ ٹٹ جاون دی حالت وچ نشئی تے کاٹھی پالیندے نیںو چارے نوں ہور پینی پیندی اے، جادوگر۔۔۔۔۔۔ متوارے= مدھ بھرے نیناں دی تعریف کیتی گئی اے، ازارے=ازار روگ مرض، سار= لوہا(ہتھیار) ، سرمے سار سنگارے= سُرمے دا ہتھیار قتل کر رہیا اے، بُلاق= ناساں دے وچلے پردے نوں ونھ کے پایا گیا چھلا جس وچ اک قیمتی موتی وی ہوندا اے، تابش = چمک ۔ لشک، جھلک لگنا= تیز روشنی دا اکھاں توں جھلیا نہ جانا ویلڈنگ کرن والے اک خاص عینک ورندے نیں تاں جو جھلک توں بچے رہن، کانی= تیر ، زہرالودہ= جنہوں زہر دی پان دتی گئی ہووے ، الف= عربی الف دی شکل دی تلوار، بسم اللہ اللہ اکبر= تکبیر پھیرن ویلے پڑھیا گیا کلمہ ( ایس کلمے وچ الرحمن الرحیم دے لفظ موجود نہیں ہوندے)، منہ دوئے= ناساں ، ناہی خط خطائی= اک خط وچ وی کوئی غلطی نہیں سی، پرم = پریم عشق، سیٹی= مجھاں ہکن ویلے ماری سیکر۔ ہونک ، تھیوا= نگ ، وات= منہ ،گرد= ماحول احاطہ، ویٹے= ڈیگے ۔ کِیرے، گھنیاں گھنیاں لاراں = نال نال مِلا جوڑ کے بنائی گئی پال قطار ، موری= منہ دا گھیرا، ان بِدھے موتی= دند ،