ورقہ 229

4263
خوب سنجاف چٹے تے سوہے کنگری چوٹی داراں
گلیاں ہار محمدبخشا سُرخ دِسن دند لَہراں
4264
طوطے وانگن جیبھ مِٹھی سی مینا بولن والی
آکھے میں نہ بولن والی ہر اک نال سُکھالی
4265
ٹھوڈی سیو باغ ارم دا بہی سی رس والی
جھلّے لکھ اسیب نہ پہنچے اس دے کول سوالی
4266
چوہا پاک آہا وچ ٹوآ جو بِن پانی بھریا
ٹھوڈی ہیٹھ سلاک جڑی سی مچھ حسن دا تریا
4267
گاٹا مثل صراحی کچ دی بوتل صاف بلوری
سُرخ شراب لہو بھررتے شےشے گرد لہوری
4268
یا ماہی دی مرلی آہی مائل کرے حیواناں
یا قرنا آخر دی سُن کے نکلن پَونوں جاناں
4269
شیریں شکر نرم آوازہ رسلے بول رنگیلے
تلخ جواب مِٹھے مُنہ وچوں سن کپیندے بیلے
4270
مٹھا ہاسہ ماسہ ماسہ دند نہ کردی ننگے
صاف لمی تے پتلی گوری گردن مثل کُلنگے
4271
طوطے قُمری نالوں سوہنی کوئل وانگن بولے
چھنکے گل کٹوری جیسی موتیں بھر بھر تولے
4272
باہاں لوہڑے رنگ رنگیلے چنن چیر بنائے
استاکار ازل دے یارو جندر چاڑھ سُہائے
4273
یا اوہ باغ حسن دے وچوں چنبے نویاں شاخاں
لچکن جوڑ مروڑ کریندے چال مثل گستاخاں
4274
انگلیاں دس پُون سلایاں چاندی کھری سلاکاں
نوہیں مہندی بن بن بہندی لہو ملے غمناکاں
4275
یا اوہ کلکاں سُوہیاں آہیاں شنگرف بھریاں نوکاں
یا شاطر یا تیر اجل دے رت پیون سبھ لوکاں
4276
چھاتی تختی صاف چنن دی خوب کریگر گھڑکے
چاندی دے دو پھُل لگائے میخ لوہے دی جڑ کے
4277
شان گمان مخول تکبرّ لاڈ تے بے پرواہی
بے رحمی تے ستم بے ترسی خؤبے مہری آہی
4278
نازک جُثہّ پھُل چنبے دا اَلّامکھن سیالا
دُھنی تھیں خوشبوئی ہُلاّ مشک تتاری والا
4279
نِکیّ نِکیّ چال لڈکیّ ہنساں کھگاں جیہی
رنگ گلابی شکل متابی پھُلیں تُلدی دیہی
4280
ٹور لٹکدی وانگ کبک دی گردا لک مروڑے
پبّ اُٹھاوے رب بچاوے کچی تند تروڑے
4281
حوراں نالوں حسن زیادہ پریاں دی سرداری
یوسف ثانی روئے زمیں تے صورت رب اتاری

لفظالی:
سنجاف = جھالر۔کور، گُلیاں ہار= گُلیاں وانگوں ، گُلیّ= مکئی دے سٹے دا اوہ حصہ جہدے وچ دانے جڑے ہوندے نیں،لَہراں = لاراں ۔ قطاراں ،'' میں نہ'' ۔۔۔۔۔۔ سُکھالی= اپنی نفی کرن نال جھگڑے مُکے ہر اک نال اتفاق ہویا، چوہا = چشمہ ٹ ک چوہا سیدن شاہ( چاہ ذقن) سُلاک= سونے چاندی دا اندر کھُبھّیا تار، سلاق = جوانی دے جوش پاروں نکلیا کل مہاسہ ایہہ کل ٹھوڈی دے ٹوئے وچ حسن دا مچھ بن کے تردا جاپدا اے،شیشہ گرد= بوتلاں وچ پئے رنگ دار مائع دا رنگ تبدیل کرن والا مداری، آخر دی قرنا= قیامت دا صور ۔ بگل ، پَونوں= ہوا نال ( خوف نال ہوا سر کے جاناں نکل جاون ) شیریں شکر= ٹ ک شخصیتاں ، بیلا کپنا= وقت کاٹنا۔ ویلا لنگھانا، کلنگ= کونج ، پنچھی ۔ لم ڈھینگ، لوہڑے = کپاہ دے ویلنے دے لکڑی دے بنے رولر جو نرم گداز تے سڈول ہوندے نیں ، جندر = خراد،پُون سلائیاں = پونیاں وٹن والیاں کانے دیاں تیلیاں ، دو پھُل = پستان ۔بُبے ، الاّ = کچا جنہوں گرم نہ کیتا ہووے، ہنس =بطخ ورگا موتی چگن والا شاہی پنکھی، کھگ = پنچھیاں دا راجا ، سیالا مکھن= سردی سیال دا مکھن ڈھلا نہیں سگوں سخت ہوندا اے،ماہی=رانجھے، گاٹا بلوری=شفاف شیشے ورگی گردن وچ پیون دا رنگ صاف دسدا اے ،