ورقہ 232

4320
دنیا داراں دے گھر دیندابیٹے ولی الٰہی
ولیاں دے گھر پیدا کردا میرے وانگ گناہی
4321
قدرت اس دی دا کجھ مینوں انت حساب نہ آوے
سُکی لکڑ سِرّ حقانی بن رباب سناوے
4322
وہنی صورت سِرّ الٰہی عام نہ سمجھن سارے
خاصاں باجھ محمدبخشا کون کرے نستارے
4323
وقت نا وقت پچھان فقیرا گُجھی رمز نہ کہو کھاں
قصّہ تروڑ اُچیرا ہوویں بیٹھ نچلا رہو کھاں
4324
ملکہ خاتوں شکل پری دی ویکھ تعجب ہوئی
دم مارن دی رہی نہ طاقت گل نہ کردی کوئی
4325
ایسی صورت ایسی سیرت ایسا روپ نورانی
دھن خالق جس ایہ بنائی مظہر حسن حقانی
4326
پری بُلائے ملکہ تائیں ملکہ بول نہ سکدی
پئی ہلائے گل کرائے اوہ مڑ بِربِر تکدی
4327
جاں کجھ ہوش ٹکانے آئے اوکھی ہو کے بولی
شاہ پری نوں کہندی بھینے میں تیرے توں گھولی
4328
حسن جمال کمال تیرے دی جھال نہ جاندی جھلی
کَنّ ڈورے جِبھ گُنگی ہوئی ہوش گئی میں جھلیّ
4329
آب تیری تک تاب نہ رہیم ہو غرقاب رہی میں
گل نہیں ہو سکدی ایہ بھی مندے حال کہی میں
4330
یاد مینوں ہک سُخن نہ رہیا ناں اندر وچ پھردا
کن نہ سُندے منہ نہ ہلدا حرف نہ جیبھوں کِردا
4331
شاہ پری پھر ہس کر یہیں سر ملکہ دا پھڑ کے
سینے اپنے سنگ لگایا نال پیار پکڑ کے
4332
ہتھ موہیں تے پھیرن لگی نال محبت خاصی
لذت گل دی تاہیں جس دم سوہنے ہون اخلاصی
4333
رحمت دا ہتھ پھیرن سرتے دین پیار لباں تے
پھُلاں جیسے سخن اس ویلے پھرن ہزار لباں تے
4334
ایسے بھاگ لگن گے کس دن دائم شگن وچاراں
سینے لاپُچھے گا گلاں سوہنا نال پیاراں
4335
ملکہ والا سفر کٹیں تے مار دیوے نوں آویں
مدّت پچھے ملیں محمد تاں سوہنا گل لاویں
4341
نال پیار پری دے ملکہ بہت ہوئی خوشحالی
مٹ گئی اوہ مست خماری ساری ہوش سنبھالی
4342
دل وچ کہندی یارب سائنیا سیف ملوک بے چارا
ایسی آفت ڈٹھیاں ہویاں کیکر کرگ گذارا
4343
ایسی شوخ لڈکی صورت شان گمان بھری ہے
ویکھن سات مرے گا بھانویں خونی ایہ پری ہے
4344
اوہ پتنگ ایہ لاٹ اگے دی مرسی بُھج اتھائیں
سیف ملوکے دی رب سائنیا کیویں جان بچائیں
4340
پھیر پری نوں آکھن لگی نال زبان رسیلی
ہے بھینے توں پریاں وچوں ہیں شاہ پری رنگیلی
4341
بدرہ تے تدھ ہک دوئی دی ماؤ دا دُدھ پیتا
ماں تیری نے نال اساڈے بھائی چارہ کیتا
4342
حق تیرا ہن ساڈے اُتّے ساڈے حق تیرے تے
ہوندے زور احسان مروت کیتوئی نہیں میرے تے؟
4343
میں پر ایڈ مصیبت گذری باہر حد شماروں
رہیوس قید دیواں دی اندر دور اپنے گھر باروں

لفظالی:
سر حقانی = الٰہی بھیت ، نستارے کرنا= پار اُتارا کرنا نجات دلانا۔ چھٹکارادلانا، نچلا= پر سکون ۔نفس گم کردہ چُپ چاپ، دم مارنا= ابھا سرنا۔ کُسکنا، بِربِرتکنا= بِٹ بِٹ تکنا، تاب نہ رہنا= جھلن دا حوصلہ نہ رہنا، کریہیں = کے، اخلاصی= مخلص ۔نیّت دے کھرے، ڈِٹھیاں ہویاں = نظارہ ۔جھلدیاں ہویاں ، غریب نوازی= غریب دی پالنا، کیکر کر گ گذارا= کویں نارمل زندگی گذارے گا کتے بے ہوش تے نہیئں ہو جاوے گا،لڈکی =لاڈلی ،گمان= غرور تکبر، بھانویں = عین ممکن اے،ناں= نام،آب =چہرے دی چمک، شگن وچارنا= آون والے سمے بارے اپنے علم نال کوئی فال کڈھنا۔ ویں آونسی پانا،غرقاب ہو رہی میں =میں آب وچ غرق ہوئی Awe of the beautyنال وہناں وچ ڈب گئی،