ورقہ 233

4344
ساک اشنایاں بھائی چارے ورتن بھاجی سارے
اِسّے کارن کر دی خلقت اوسر آون کارے
4345
اوسر متر پر کھن ہوندا وچ غریبی ناریں
دُدھل گاںازماون ہوندی پھگن ماہ بہاریں
4346
اوکھے ویلے کاری آوے بھلیاں دی اشنائی
اڑیا آکھن دی لج پالن جو انسان وفائی
4347
دنیا تے جو کم نہ آیا اوکھے سوکھے ویلے
اُس بے فیضے سنگی کولوں بہتر یار اکیلے
4348
سُکھاں عیشاں موجاں اندر ہر کوئی یار کہاندا
سنگی سو جو تنگی تک کے بنے بھنجال دُکھاندا
4349
کول ہووے تاخَیراں اندر یار اشنا کہاوے
دُور مہم پیاں دُکھیاری چیتا منوں بھلاوے
4350
اوڑک نفع ہوویگاکتھوں ایسے سنگ دو رنگوں
سڑ دا یار تکے سڑ جاوے سنگ نسنگ پتنگوں
4351
ہک بیڑی پر موجا ںمانے ویکھدیاں ہک رُڑھدا
اس رُڑھدے نوں پھڑ یوس ناہیں داؤ جیہدا سی پُڑدا
4352
کاہدا سنگ محبت کیہی کے ایسی اشنائی
مویاں گیاں تدھ یاد نہ کیتا خوشئیں عمر لنگھائی
4353
ماں میری دی دھی کہاویں بھینو نال سہیلی
اوکھے ویلے کم نہ آئی ایں ساڈا بھی رب بیلی
4354
تیرے جیہی سہیلی ہووے پری اصیل شہزادی
کے لائق اس بے وفائی حدوں بہت زیادی
4355
میں عاجز بے چاری ہوئی رہی اچر وچ قیداں
نہ کوئی بھائی چارہ ڈِٹھا واقفیاں امیداں
4356
قلزم دے شہزادے مینوں رکھیا سی وچ بندی
بندی دے سر بنی قہر دی سخت مصیبت مندی
4357
ماں پیؤ بھین بھرا وچھُنّے سنگ سیاں تدھ جہیاں
پیا وچھوڑا دل دا چوڑا سے پیڑاں سِر سہیاں

لفظالی:
اگے= اگ، ورتن بھاجی= کسے خوشی غمی دے موقع تے اک دوجے نوںرسم رواج سیتی چیزاں دا لیون دیون ، اوسر آون کار ے = موقع بھیڑ بنی تے کم آون، اوسر متر پرکھن ہوندا وچ غریبی ناریں =دوست بھیڑ بنی تے عورتاں کنگالی وچ پرکھیاں جاندیاں نیں ، دُدّھل = ودھ دین والی، پھگن ماہ بہاریں = پھگن دے مہینے موسم وچ ، اڑیا = پنجابی مٹیار دا اپنے محبتی نوں بلاون لئی ورتیا لفظ جو برابری تے ات بے تکلفی ظاہر کردا اے جدوں پنجابی مٹیار کسے اک گبھرو نوں ''وے اڑیا'' آکھدی اے تاں اپنے آکھے تے قائم رہن لئی کسے ہور نوں اوہ عزت نہیں بخشدی، اِچر = ایناں چِر، چوڑا= سلوپائزننگ وانگوں چُڑھ چُڑھ کے مارن والا لماّ روگ، سنگ نسنگ پتنگوں = دوستی تے ان جھک نڈر پتنگ دی اے ، سنگ دو رنگوں = منافقاں والی دوستی، دا ؤ= پانی وچ رڑھ یا ڈُبی ہوئی چیزنوں باہر کڈھن والا کنڈا Cleaver،