ورقہ 234

4358
ہک ہکلی سُولیں سلھی وچھڑی سنگ قطاروں
کوکاں کوک قہر دی جیونکر ترٹی کونج اُڈاروں
4359
تلیاں پھاٹاں ہتھ مروڑاں ہوئی حیران نمانی
تلیاں وچ کڑاہ غماں دے جیوں مچھی بِن پانی
4360
تنگ پیوس کوئی سنگ نہ ساتھی پھاتھی جا کُتھاویں
باپ میرے دی پیش نہ جاندی سو وس لاوے بھاویں
4361
وس تیرے سی اوہ اُپرا لاجے توں آہر کریندی
قلزم دے شہزادے تائیں فوجاں سنے مریندی
4362
باپ تیرے دا لشکر بھارا ودّھ اس تھیں سو حصہّ
تسیں اساڈی مدّد کر دے جھب مُک جاندا قصہ
4363
باپ تیرے دے اگے بھینے آہی گل سکھالی
جے ہک وار تیاری کردا پریاں دیواں والی
4364
قلزم دے دریا دے توڑی فوجاں دے گٹ بھجدے
دھونسے شتری ڈھول نقارے طُرم طنبورے وجدے
4365
پریاں دے گھُنکارے پیندے دیو مریلے گجدے
قلزم دے سر کر دے تک کے یا ملدے یا بھجدے
4366
جس شاہزادے مینوں کھڑیا جاں ایہ بازی ہردا
بانہہ میری پھڑ دیندا اونویں ماری وا کے کردا
4367
تساں اگے کجھ چیز نہ آہے دیو قلزم دے سارے
مار مندال اوہناں نوں کردے تسیں میرے چُھٹکارے
4368
خیر کسے پر دوس نہ کوئی لِکھی سی درگاہوں
کیتی بند خلاص میری بھی ہویا کرم الہٰوں
4369
ایہہ اُپرالا میرے والا کدی تساں تھیں ڈُھکدا
ستر کرسی ساڈی توڑی ایڈ احسان نہ مکدا
4370
غیبوں ٹور مؤکل دتا مرد بھلا اخلاصی
آپ احسان کیتا رب والی قیدوں ہوئی خلاصی
4371
ظالم نفس دیوے دی قیدے رب کیتا خصمانہ
غیبوں میل مؤکل دتا کامل پیر یگانہ
4372
اوسے توں میں گھول گھمائی دھن اوہ ویر پیارا
اوہو بابل اوہو مائی اوہو بھائی چارہ
4373
اوسے دا احسان مروّت اوسے دی وڈیائی
جس نے قید اولیّ وچوں ہمّت کر چھڑکائی
4374
بھلا ہووے اس مرد سچے دا شالہ دوہیں جہانی
بہت پیار محبت کر کے مِلس پیارا جانی
4375
سُن کے گِلے اُلاہمے سچے شاہ پری کملانی
عذر بہانے کر کر کہندی سُن توں ملکہ رانی
4376
باپ میرے نے بہتی واری کیتے سے سمیانے
فوجاں سنے تیار کرائے سر کردے مردانے

لفظالی:
سُولیں سلھی= کنڈیاں ۔ درداں دی ونھی ہوئی، اڈاروں = ڈار توں ،کڑاہ=کڑاہے، اپرالا= امدادی جتن، آہر = کم دے جتن دی منصوبہ بندی، دھونسا=نقارہ ، شتری= اوٹھ تے رکھ کے وجاون والا نقارہ، طرُم= فوجی بگل،مندالنا= مدھو لنا۔ رگڑنا مندا حال کرنا، گٹ = ٹروپ ۔ جتھے، ماری دا کے کردا= مجبوراً اوہ کیہ کر سکدا سی، گھنکارے= پراں دی گھُوکر، سترکرسی= ستر پیڑھیاں تائیں ، دھن = شاواشے۔ تعریفی جملہ، چھڑکائی= آزاد کرائی، سے سمیانے= سو طرحاں دے سامان۔ سو ترکیباں،ڈُھکدا= ساڈے کول اپڑدا، اخلاصی= مخلص ۔ رضا کار، موکل= اوکھے کم تے ان ہونے کم نوں کرن والا جن یا فرشتہ ، کملانی= مُرجھا گئی ، مِلدے = خیر خواہی نال استقبال کردے،مِلس= اوہنوں مِل جاوے،