ورقہ 235

4377
تیری لوڑ کرن دی خاطر لشکر بہت چڑھائے
مرد زوراورجنگی خونی ہر ہر طرف دوڑائے
4378
ملک ولایت ہور اُجاڑاں وسدے شہر لوڑائے
کدھروں خبر نہ لبھی تیری سبھ گھریں مڑ آئے
4379
خشکی دے سبھ تھاں لوڑائے کدھروں پتہ نہ لگا
پر اِتروکے ماں میری سی کر دی ایہہ اُسرگا
4380
باپ میرے نوں کہندی آہی آ ہلک ڈِھلاں چھوڑو
وچ سمندر ٹاپو بندر ملکہ تائیں لوڑو
4381
دیواں پریاں دے ونڈ لشکر ہر ٹاپو ول ٹورو
ڈھونڈو ملکہ بیٹی میری نبی سلیماں سورو
4382
وہ قافاں دریاواں اندر ڈھونڈ کرو جگ سارے
ملکہ لبھے تاں رہ آوے نہیں اسی ہتیارے
4383
پٹ اُلٹ پہاڑ جزیرے ہؤو لوڑاؤ سبھے
پت ساڈی ہن تاہیں رہندی جے مڑ ملکہ لبھے
4384
بابل بھی اتروکے آہا ساعت روز تکیندا
طلباں خرچ مہم گھلن دا لشکر تائیں دیندا
4385
راکس دیو عفریت ہزاراں کردے سان تیاری
ہن تینوں رب آپ لیاندا لطف ہویا سرکاری
4386
نہ احسان مروت ساڈے نہیں کسے دے بھارے
ہک احسان اوسے دا ایہ بھی جس دے اگلے سارے
4387
ملکہ کہندی آہو میں تے لطف کیتا رب آپے
لیکن ہک سبب بنائیوس تاں چُک گئے سیاپے
4388
شاہ پری پھر کہندی ملکہ چھوڑ نہورے بہئو کھاں
کے سبب بنایا مولیٰ سچ اسانوں کہو کھاں
4389
ملکہ خاتوں کہے پری نُوں کے گل دساں تینوں
مصر شہر دا ہِک شہزادہ اوس چھُڑایا مینوں
4390
پھیر بدیع جمال پری نوں چمک لگی اس گلوں
کون کوئی شاہزادہ ایسا آیا ہے کِت ولّوں
4391
غیرت غصہّ کھادِلے وچ پُچھدی ملکہ تائیں
کون شاہزادہ کیسا جیہڑا گیا اجیہّاں جائیں
4392
پریاں تے عفریت مریلے راکس دیو بہادر
اوس قلعے وچ جاون جوگا نہیں کسے دا بادر
4393
آدمیاں تے جناں وچوں جو جو لوک قد آور
اس گردے وچ پہنچ نہ سکدے جے سوہون زوراور
4394
باشک ناگ سنسار وڈیرے مچھ سمندر والے
اس گِردے وچ پہنچ نہ سکدے نہ پنکھی پروالے
4395
کے مہم بنی شاہزادے ایسی بھاری کائی
کس آفت نے چالیاندا جاوڑیا اس جائی

لفظالی:
لوڑ = تلاش ، اترو کے = ایتکاں ۔ ایس سال ، اُسرگا= کسے اساری دا منصوبہ ۔ پلان ، سورنا= عقیدت پاروں کسے بزرگ نوں بوہڑن لئی یاد کرنا، لوڑاؤ=ڈھونڈاؤ، رہ آوے= عزت وقار قائم رہ جاوے، سرکاری= اللہ تعالیٰ دی ، گردے = احاطے ۔ ماحول، بادر= حیثیت۔ توفیق ۔ مجال حوصلہ، نہین= ورنہ ۔ دوجی صورت وچ ، نہورے = گلے شکوے ، بھارا= قرض وانگوں سرتے احسان دا بھار،میں تے = میرے اُتے، چمک لگنا= رقیبانہ کِند۔ دُکھ لگنا ،چُک گئے =ختم ہو گئے، طلباں = تنخواہاں ۔ مُلازم دا کوئی بِل ، لطف = مہربانی، ساعت روز تکنا= گھڑیاں تے دن گننا، ہتیارے= لوکیں سانوں ظالم قاتل سمجھن گے پئی خبرے کُڑی وچ کیہ کج ویکھیا نیں تے کڑی وی اندرو اندر ای جیوہتیاکر چھڈی نیں ،