ورقہ 236

4396
دھن دلیری گھنی گھنیری سنی زبانی تیری
ایسا مرد اپرادھی کہڑا دس سہیلی میری
4397
ملکہ خاتوں کہندی اگوں دساں گی تک ویلا
محرم گل دا محرم کرئےے جس دم ملے اکیلا
4398
عاماں بے اخلاصاں اندر خاصاں دی گل کرنی
مِٹھی کھیر پکا محمد کُتیاں اگے دھرنی
4399
عاشق دی معشوقاں اگے چوری عرض پُچائیے
باجھ پِیّا تھیںبھیت سجن دا ہوراں نہیں سنائیے

کلام دا ست تت

4400
بھِیڑ ہجوم ہوائیں والی دور کریں جس ویلے
ساجن دی گل کہے وسیلہ جد چاہے تد میلے
4401
دوروں آیا یار ملے گا جاں ہو بہیں اکلا
رمز حقیقی کہے محمد پاء مجازی پلا
4402
پھیر پری نے مجلس ساری کولوں تُرت اُٹھائی
ہک پری ہک ملکہ خاتوں ہور نہ رہیا کائی
4403
سرداراں نوں رخصت دتی سر اندیپ چوپھیرے
باہر شہروں تھاں بتھائیں کرو قلعے وچ ڈیرے
4404
کجھ فوجاں جا لہئو قلعے وچ اوتھے رہو مقامی
کجھ جاؤ مڑ باغ ارم نوں پریاں ہو سلامی
4405
جس دن پھیر تیاری میری گھر دی طرفے ہوئی
اس دن حاضر ہونا سبھناں چیتا رہے نہ کوئی
4406
سبھناں حکم بجا لیاندا وانگن خاص غلاماں
کہن ثنائیں دین دعائیں نیوں نیوں کرن سلاماں
4407
چم زمین سلامی ہوکے اُڈیاں بنھ قطاراں
کونجاں ہار ہزاراں پریاں جاون نال بہاراں
4408
کئی ہزاراں مڑ کے گیاں باغ ارم ول گھر نوں
سر اندیپ اندر کجھ رہیاں سر پر من امر نوں
4409
ست سے سی سرکردہ رہیا لشکر نال تمامی
ست ہزار پری ہور خاصی پرت گئے سبھ عامی
4410
جو کجھ گرد شہر دے آہے اُچےّ تھاں اُجالے
برج جزیرے باغ ہجیرے چشمے پانی والے
4411
روضے گنبد محل چُبارے کوہستان سرائیں
مسجد اتے منارے قبراں ہور بلنداں جائیں
4412
سبھناں پریاں ڈیرے لائے تک جائیں من پُڑیاں
نال بدیع جمال پری دے رہیاں دوتن کڑیاں
4413
سر اندیپ نگر دی رانی ملکہ جیؤ دی مائی
ہر ہر قسم عجائب کھانے شربت شہد لیائی

لفظالی:
اپرادھی= مجرم پاپی خطاکار قانونی حداں دی اُ لنگھنا کرن والا ایتھے پری سیفل نوں اپرادھی آکھ کے خاص معنی ہیرو دے لے رہی اے اوہدا مطلب سپرمین ' ہیرو تے چمپین اے، تک ویلا= مناسب موقع تک کے ، ہوائیں = خواہشات ، وسیلہ = مرشد پاک ، پلّا = چادر دا کوئی کونا۔ پردہ،کونجاں ہار= کونجاں وانگراں ، سر پر من امر نوں = حکم نوں لازمی من کے ، اُجالے = اجلے روشن ۔ دوروں دسن والے، ہجیرے= دوپہر کٹن تے پسواں نوں پانی پلاون لئی بنائے گئے باغ، روضے= پھُلاں دے باغ ، من پُڑیاں جائیں = دل وچ کھبھن والیاں تھانواں ، ملکہ جیئو دی مائی= ملکہ صاحبہ دی ماں، تھاں بتھائیں = ہرتھاں تے، گھنی گھنیری= چوکھی ۔ ودھ توں ودھ،