ورقہ 237

4413
سر اندیپ نگر دی رانی ملکہ جیؤ دی مائی
ہر ہر قسم عجائب کھانے شربت شہد لیائی
4414
عطریاتاں تے خوشبوئیں مغز کیتے ترتازے
سڑ دے عُود رباب کریندے مٹھے نرم اوازے
4415
ملکہ بدرہ شاہ پری نے نالے سبھناں سیاں
کھادے کھانے جومن بھانے پھِر خوشبوئیں لیاں
4416
تھال سنہری بھر بھر رکھے قلیےئ زرد پلاؤں
کجھ کھادے کُجھ ودھے جیہڑے چان لگے اس جاؤں
4417
شاہ پری دے اگوں جیہڑا ودھیا سی کجھ کھانا
ادھا سی اِکیں زیادہ رب معلَم کے جاناں
4418
ملکہ خاتوں آپوں اُٹھ کے چا لئی اوہ تھالی
شاہ پری تھیں پچھن لگی بن کے وانگ سوالی
4419
ہے سندر مُکھ پرئیے بھینے ایہ دل میرا کہندا
ہک بندہ بیمار چروکاباغ اساڈے رہندا
4420
اوہ عاجز پردیسی شوہدا بہت غریب نمانا
جے آکھیں تاں بھیجاں اس نوں جوٹھا تیرا کھانا
4421
ایہہ تبّرک تیرا کھاسی خیر ازاروں پاسی
لوُں لوُں نال دُعائیں دیسی دُکھ اوہدا جد جاسی
4422
شاہ پری نے ہس کے کہیا کم مناسب جیہڑا
عقل تیری وچ چنگا لگا ٹھاکن والا کیہڑا
4423
میرے ولوں دے شتابی جس نوں تیری مرضی
دُکھ نہیں کجھ مینوں بھینے جے سُکھ پاوے مرضی
4424
درد منداں دے درد ونجائے جے میرا پس خوردہ
دے طعام شراب شتابی گرم ہووے افسردہ
4425
واہ نصیب غریب بندے دے کئی دناں دے بُھکھے
دلبر دا پس خوردہ لبھے امن پوے وچ کُکھے
4426
ڈٹھے باجھ پیارا جانی دے اوّل مہمانی
لگے آس نراس بندے نوں دور ہووے حیرانی
4427
شاہ شمس تبریزی جوٹھا ہک گُھٹ سرخ شرابوں
ملاں رومی نوں جو دتا ہویا کرم جنابوں
4428
شالہ دولو دمڑی والا جوٹھا اپنا کھانا
دیوے میں بھُکھے نوں تاہیں رج رج موجاں ماناں
4429
جے اوہ مرشد مہریں آوے جوٹھا گھُٹ پیالے
ملاں رومی والے مینوں سچے سخن سکھالے
4430
پڑھنے سننے والے تائیں تاہییں لذت آوے
منگ نسنگ محمدبخشا مت اوہ کرم کماوے
4431
اگے بھی سبھ کرم اوسے دے اگوں بھی لکھ آساں
مدد خاص اوہناں دی کولوں قصہ کھول سناساں
4432
شاہ پری دا جُوٹھا کھانا ملکہ خاتوں چایا
باہر گھر تھیں آ کر میئیں گولی نوں چکوایا

لفظالی:
عطریاتاں= کئی قسم دے عطر جمع دی مثال اولیاواں انبیاواں،عُود= کالی خوشبودار لکڑی جس دی دھوں خوشبوئی مجلس نوں دتی جاندی اے ،قلیئے= پہلاں بھُن کے پھر شوربے دار بنایا گوشت، اِکیں = یاکے، چراکا= بڑے چردا، آزاروں خیر= بیماری توں شفا، مِیاں= زنان خانے دا خسرا نوکر، مرضی=مریض ۔ روگی، پس خوردہ = جُوٹھا ۔کھا کے چھڈیا ہویا، افسردہ = ٹھنڈ نال سکڑیا۔ پیار دی گرمی توں وانجیا ہویا، ککھے=پیٹ ۔ ڈھڈ، شاہ شمس تبریزی= مولینا روم دے مُرشد جو اک مشہور فقیر سن ، سرخ شرابوں= شراب ارغوانی دا معرفت دا ، جنابوں= اللہ دے درباروں ، شالہ= شا للہ۔ اللہ بھاوے ، دولو= سخی مرد، دمڑی والا = حضرت پیرے شاہ غازی جو اک دمڑی دا چڑھاوا لے کے خوش ہوندے سن، دمڑی= چھوٹا دام سِکہ۔ پیسے دا چوتھا حصہ تے روپیےئ دا (٢٥٦/١) حصہ، پیالے = پیاوے، نسنگ = بنا ں جھجک توں ، مت = شائد ، گولے = غلام ،