ورقہ 238

4433
واہ واہ گولی نازک ہؤلی پنجیں پُھلیں تولی
سوہنی صورت سندر مُورت ٹردی ٹور ممولی
4434
چا رکاب سرے تے چلے گِن گِن پیر اُٹھاندی
ملکہ اگے نال گماناں مجرے کر دی جاندی
4435
سیف ملوکے دا سی بھائی جس باغے وچ ڈیرا
خوشئیں خوشئیں اوس بغیچے آن کیتو نیں پھیرا
4436
سیف ملوکے نے جدڈٹھی ملکہ خاتوں رانی
رو کر دھرتی تے چھنکائیوس اتھرواں دا پانی
4437
ویکھدیاں کجھ وس نہ رہیوس جھس گئی اگ غم دی
ہنجڑیاں کِر پیاّں جھولے بوند جویں شبنم دی
4438
نرگس دے پھُل وچوں ڈھہٹھے قطرے اوس کھری دے
لالے وانگن داغ کلیجے لایاسوز پری دے
4439
ڈبیاں رانگلیاں تھیںڈُلھے موتی ڈل ڈل کردے
یا ڈل اندر نیساں والے قطرے پئے ابردے
4440
ملکہ روندا ویکھ شزادہ کہندی نال دلاسے
سن توں ویرا ہوکھاں دھیرا ویکھ ربانے پاسے
4441
اج ویلا خوشحالی والا روون دے دن گزرے
کم تیرے دے حیلے لگے اسیں بندے بے عذرے
4442
تیرے کارن دلبر ولوں اوّل دی مہمانی
جوٹھا اس دا کھانا آندا ویکھ رکاب نشانی
4443
ایس رکابی وچوں اس بھی ہتھیں اپنی کھادا
پھر میں تیرے کارن منگیا جو کجھ رہیا وادھا
4444
آپ بدیع جمال پری نے کیتا اذن زبانوں
تاں ایہ کھانا چائیں چائیں دتا آن تسانوں
4445
سُن گلاں شاہزادے تائیں بہت ہوئی خوشحالی
کرن لگا تعظیماں اُٹھ کے نال ادب دی چالی
4446
کر کے ادب سلام ہزاراں دل دی نال دلیلے
بیٹھا تاں پھر کھانا دھریا ملکہ کُڑی وکیلے
4447
کر بسم اللہ کھادا کھانا سیف ملوک شزادے
شکر بجا لیاندا رب دا حدوں بہت زیادے
4448
گل بدیع جمال پری دی پچھن لگا ساری
دس ملکہ کے سخن تساں سنگ کیتے پری پیاری
4449
تساں سیاں کوئی ساعت ہوسی مجلس اسدی کیتی
کیکر حال حقیقت ساری اس مجلس وچ بیتی
4450
ملکہ خاتوں نے سبھ گلاں خوب طرح کردسّیاں
سُکے باغ مدّت دے اُتے رحمت باراں وسّیاں
4451
جتھوں شاہ پری سی پچھیا کے بنی شاہزادے
کوہ قافاں وچ پھر دا آیا کیہڑے نال ارادے

لفظالی:
پنجیں پھلیں تولی= اینی ہولی نازک کہ اوہدا بھار پنجاں پھلاں دے برابر ہوے۔، مجرے کرنا= سلام کورنش بجا لانا۔ رقص دی چونکی بھرنا، جھس گئی=جھُلس گئی ۔ بھُن گئی ، ہنجڑیاں= اتھرو ، کھری = مخلص۔ سچی، لالہ= پوست دا پھُل جس دی ہر پتی وچ کالا داغ ہوندا اے ، رانگلیاں ڈبیاں = رت دے اتھرواں والیاں اکھاں، نیساں = وساکھ دے مہینے دی خاص بارش جس دے قطرے سپی دے مونہہ وچ ڈگن تاںگوہر بن جاندے نیں ،دھیرا = حوصلہ مند۔ دھیرج والا ، ربانے پاسے= رب دے کھیل ۔ قدرت دے کم ، حِیلے= جتن وچ ، اذن = حکم ، خوشحالی= طبیعت دی خوشی، چالی= چال طور طریقہ، وکیل = وچولی ۔ یاری وچ دلال، تساں سنگ = تہاڈے نال ، ساعت= گھڑی ۔ گھنٹا، باراں = بارشاں، اوس قطرے= تریل تُبکے ہنجھو،