ورقہ 241

4490
پری پچھیندی دس توں ملکہ کتھے تیک گئی سیں
ایس ترنجن ساڈے وچوں اُٹھی کس لئی سیں
4491
ملکہ خاتوں نے فرمایا بھیت نہ دسن ہارا
باغے وچ گئی ساں بھینے کم آہا ہک بھارا
4492
ویکھ ہجوم نہ پُچھی اگوں شاہ پری گل کوئی
کے کم سی تدھ باغے اندر پھیرا آپ کیتوئی
4493
مجلس تھیں پھر اُٹھ کھلوتی شاہ پری من بھانی
ملکہ بدرہ دی پھڑ انگل بھوہرے وچ سدھانی
4494
بھوہرے دے دروازے دوہرے سنگل قفل چڑھائے
سیاں پرت گیاں پھر اندر بیٹھ رہیاں اوہ ترائے
4495
بھوہرے دی تعریف محمد ساری آکھ نہ سکدا
جنت دا ہک خانہ آہا جھل مل نور چمکدا
4496
نوری برج شمس دا خانہ نالے دو سعدیناں
شمس پری سعدین پچھانوں ملکہ بدرہ بھیناں
4497
ملکہ اوہ جس ملک فلک دے بابل دے کھوہ پائے
بدرہ بدر آکاش حسن دا صفت نہ کیتی جائے
4498
اگے بھی اس بھوہرے اندر شاہ پری سی بہندی
ملکہ بدرہ باجھ سہیلی پاس نہ کوئی رہندی
4499
عاماں دا اوہ تھاں نہ آہا خاصاں باجھ رفیقاں
اس جائی کوئی مِٹدا ناہیوں بن محرم صدیقاں
4500
بیٹھ رہیاں جد تراے بھیناں شاہ پری پھر بولی
ملکہ خاتوں نوں فرماندی کر گل ہولی ہولی
4501
توں اساں وچ وڈی بھین ایں نالے سگھڑ سیانی
دیس بدیس ڈٹھے تدھ بہتے خیبر خشکی پانی
4502
سردی گرمی سختی نرمی خوشیاں وقت قضیّے
تیرے جیڈ نہ ڈٹھے کسے ماں میری دیے دھیےئ
4503
بھوہرے اندر تریوے جنداں ہور نہیں کوئی نیڑے
چُپے وچ ہُسڑ دا جیوڑا کون دہاڑ نبیڑے
4504
کر کوئی گل کہانی ایسی جیہڑی سُنی نہ اگے
سُن سُن اثر اندر وچ دھائے چنگی دل نوں لگے
4505
ملکہ پچھدی کہی کہانی کول تساڈے پھولاں
سُنی کنیں یا اکھیں ڈٹھی یا سرورتی کھولاں
4506
کہیا بدیع جمال پری نے ملکہ بی بی خاتوں
اکھیں ڈٹھی تے سرورتی سچی بات سنا توں
4507
کنیں سنیاں گلاں اندر کوڑ طوفان بتیرے
پاؤں سیر بناندی خلقت ابھرگھنے گھنیرے
4508
جھوٹھے نغمے چا اُٹھاون جس وچ سچ نہ ماسا
بے وقوف منن سچ اس نوں کرن سیانے ہاسا

لفظالی:
ترنجن = زنانہ تفریحی محفل، من بھائی= ہر دلعزیز، بھوہرا= تہ خانہ ، سنگل قفل= کنڈی جندرا، سدھانی = چھیتی نال چلی گئی، مٹنا= سمانا۔ اندر وڑ کے اک مک ہو جانا، سعدین = دو مبارک ستارے زہرہ تے مشتری( ملکہ خاتون تے پری بد یع الجمال )، نوری برج شمس خانہ= برج ثور جہدے وچ سورج ٢٠ اپریل نوں وڑدا اے شمس توں مراد پری بدیع الجمال ،بِن محرم صدیقاں = ہمراز مخلص دوستاں دے بغیر، خیبر = قلعے'پہاڑی دی اُچی فصیل وچ گھریا قلعے وانگوں تھاں،جیو ہُسٹردا= جی اداس ہوندا اے ، ابھّر = منن دے ناقابل ناجائز۔ ادا کرن دے ناقابل ، جھوٹھے نغمے= ققنس دے نغمے جیہڑے فرضی کہانیاں وچ ای سنے جا سکدے نیں ، آکاش = اسمان ۔ عرش،