ورقہ 242

4509
جیؤں ہن کہندے دہلی اندر کنکے دامینہ ُوٹھا
اوتھوں آئے کہن نہ ڈٹھا سُنیر تُرن اُپٹھا
4510
چنگے چنگے سُگھڑکہاون جھگڑے کرن اس گل دے
عقل قیاس نہ لوڑن مولے بے عقلاں وچ رلدے
4511
سنیاں گلاں تے کے باور باجھوں علم کتابوں
جو عالم دے موہوں سُنیےئ سوئی کھری حسابوں
4512
یاجو سائیں والے آکھن اوہ سچ من تمامی
پکی جان کلام اوہناں دی ذرہ نہیں وچ خامی
4513
توڑے الٹ پلٹ فرماون وچ قیاس نہ آوے
گجھی رمز ہوسی سب سچی کون اوہناں بِن پاوے
4514
سائیں والے سدا سکھالے رب دے بالے دیوے
مست الست شراب وصل دے ہر دم رہندے کھیوے
4515
جیؤں جیؤں لکھیا ویکھن بھائی اکھر لوح قلم دا
والے جتنا فرق نہ پاون دین پتہ ہر کم دا
4516
باور کرو یقین لیاؤ گل اوہناں دی اُتے
آیت وانگر سچ کر منوں توڑے بھچھن سُتےّ
4517
ہائے ہائے گل پری دی بھائی پھر برطرف رہی ہے
شاہ پری نے ملکہ تائیں ایہو بات کہی ہے
4518
ڈٹھیاں سنیاں گلاں اندر ہوندا فرق بتیرا
اکھیں ڈِٹھی کہیں کہانی ایہو مطلب میرا
4519
ملکہ خاتوں بی بی بولی نال زبانے مِٹھی
اوہ فصاحت اتے بلاغت پری نہ اگے ڈٹھی
4520
بول رسیلے رنگ رنگیلے علم عقل چترائی
مُرلی بینسریوں کجھ اُتے وچ آواز صفائی
4521
عاشق سچے دی پھر سچلی دردوں درد کہانی
سُن کے پتھر وچوں نکلے اتھرواں دا پانی
4522
خوب بنا تنا کہانی ملکہ جدوں سُناندی
تیر جیہی تاثیر کلیجہ چِیر دوسلّو جاندی
4523
شاہ پری نوں آکھن لگی کن دھر بھینے پرئیے
عجب کہانی درد رنجانی تیرے اگے کرئیے
4524
ملک مصر دے سی ہک وسدا تاج تخت دا والی
عاصم بِن صفوان شزادہ شان بیانوں عالی
4525
ہتھیں بدھیں گولے اس دے چالیھ ہور شزادے
انت حساب شماروں حدوں لشکر اوس زیادے
4526
ہک روایت والا کہندا سترّ تختاں والے
عاصم شاہ اگے دن راتیں خذمتگار سِکھالے
4527
ہور روایت ایہ بھی تریجی چار ہک سے شہزادہ
بدھے لک کریندے خذمت وافر گنج امادہ

لفظالی:
وُٹھا= وسیا ، سُنئیر= سنن والے سامعین، اُپٹھا=پُٹھے پاسے، کے باور = کیہ اعتبار اے، سائیں والے= اللہ والے ولی اللہ،کِھیوے = مخمور نشئی، بھچھن= بھاچھن بھاکھن گل کرن ۔ آکھن ، گل برطرف رہنا= گل سٹ پائی جاونا۔ گل تے غور نہ ہوونا، فصاحت= کسے بولی دے محاورے روز مرے دے مطابق بولی والیاں وانگوں بولن دا انداز، بلاغت= موقع محل دے مطابق لفظ ورت کے اپنا مطلب چوکھا واضح کر دین داعمل، سچلی= سچ تے قائم ۔ حق تے مبنی، دوسلوّ = دُسر ۔ آر پار لنگھ کے ، ہتھیں بدھے = غلامانہ انداز نال دست بستہ،سِکھالے = سکھیا پائے ہور تربیت یافتہ ٹرینڈ، گنج = کسے جنس دا وڈے توں وڈا ذخیرہ ۔ چھُپیا خزانہ، امادہ= اماندہ نہ سماون میون والا ،مُربی = مراد اے ملکہ خاتون توں ،بینسری= مراد اے شاہ پری،