ورقہ 243

4528
حکم اوہدے دا طوق گلے وچ شوق سندا کن بالا
طلب حضور اوہدے دی خاطر کرن ضرور کُشالا
4529
موجاں عیشاں خوشیاں طلباں جو جو سن وچ دنیا
رب گھرے وچ دتیاں اس نوں سب مراداں پُنیاں
4530
ہک جھورا اولادے والا گھر وچ بال نہ کھیلے
دولت مال بھرے کدسوبھن مائی باپ اکیلے
4531
دوہری وار کراں گل کاہنوں قصہ کو تاہ ایہا
اوّل آخر توڑی ملکہ سبھ قضیہ کہیا
4532
شاہزادے دے جمّن والا نالے علم پڑھن دا
نالے صورت دی تک مورت غم دی اگ سڑن دا
4533
مورت اُتےّ عاشق ہونا شاہزادے دا سارا
یک بیک سنایا ملکہ سفر قضیّہ بھارا
4534
کلمے لفظ بہوں خوش نقطے نال تلازمیاں دے
ملکہ دُرّ پروتے وانگن بھلیاں آدمیاں دے
4535
نال اداکلام رسیلی خوش خوش سخن الائے
لعل زمزّد سلّ محمد کن پری دے پائے
4536
مڈھوں قصہّ ٹور لیاندا ذرہ ذرہ کر سارا
باغ میرے وچ اوہ شاہزادہ ہے غریب بے چارہ
4537
شاہ پری فرماندی ملکہ پُچھ شاہزادے تائیں
دنیا اتے صورت کیہڑی اس مورت دی سائیں
4538
کیہڑے شہر ولایت رہندی صورت اس دلبر دی
پَٹیا جس نے ایہ شاہزادہ رونق ملک مصر دی
4539
اوتر تھیں سن سوتر ہوئے بابل مائی اس دے
سوتر تھیں مڑ اوتر کیتے بری جدائی اس دے
4540
ایسی ظالم قہر کنندی ہے کوئی جائی کس دی
سیف ملوک شہزادے ڈٹھی سوہنی مورت جس دی
4541
گرد کیتا جس مرد اجیہا فرد ہویا چھڈ شاہی
سینے سان چڑھائیاں نیناں سخت کٹاری واہی
4542
پھِرے دوالے بند سپاہی ملکو ملک اداسی
کسدے عشق مہاروں پھڑیا کدھر ہکلّا جاسی
4543
صورت دا کجھ پتہ لگاسُو یا کوئی سُکھ سنیہا
یا امید سجن دی اُتے ایویں رُڑھدا رہیا
4544
ایسا دلبر کون کوئی ہے از غیبوں دل کھسےّ
اکھیں نظر نہ پوے محمد کول گھرے وچ وسےّ
4545
ملکہ کہندی بھینے تینوں تتی واء نہ لگے
سیف ملوکے تھیں ایہ گلاں پُچھ لیاں میں اگے
4546
جس صورت دا عشق شہزادے میں اوہ ڈٹھی ہوئی
اج اس مجلس ساڈی اندر حاضر دسدی سوای

لفظالی:
طوق = گل وچ پایا لکڑی دا چُوکھٹا جو کسے آقا دا قیدی یا غلام ہوون دی نشانی اے، شوق سندا= عشق دا ، کن بالا= کناں وچ پیا مندراجو کسے دے مرید چیلا یا غلام ہوون دی نشانی سی، پُنیاں = پج گیاں ۔ پوریاں ہو گیاں۔ کشالا= دُکھ مصیبت قضیہ ۔ جھگڑا ، طلباں= خواہشاں ،کد سوبھن =زیب نہیں دیندے۔ پھبدے نہیں ، جھورا = کسے محرومی دا شکوہ ، قضیہ = معاملہ ۔Problem، تلازمے = کسے مضمون نال متعلق ضروری مواد، دُر پروتے = موتی پروئے ، غریب = مسافر ، صورت = اصل چہرہ ، مورت = کسے صورت دی تصویر، اوتر = بے اولاد ، سوتر = صاحب اولاد ، جائی = بیٹی ، فرد =عوام وچوں کوئی اک شخص، دوالے بند= پٹی بنھّن والا مستعد سپاہی ، اداسی = تارک وطن،