ورقہ 244

4547
جس جائی اوہ مورت لکھی ہر ہر عیبوں خالی
نام اوہدا بھی لکھیا اوتھے قلم کریگر والی
4548
سوہنی صورت جو من کھسدی وسدی وچ دلاں دے
کول بہے تاں بول نہ دسے بھیت نہ کر دی واندے
4549
خوب شکل محبوب سجن دی کرے غریب نوازی
خونی نعمت عاشق تائیں دئے دناں دن تازی
4550
جادوگر دونین لُٹیرے دل نوں مارن والے
لعل لباں پر آب حیاتوں بھر بھر دین پیالے
4551
بادشاہاں نون تختوں سٹن کرن غریب نمانے
تاج غریباں دے سر رکھن واہ محبوب سیانے
4552
آپے لٹن آپے مارن آپے ذبح کریندے
آپ نوازن محرم کر کے سر پر تاج دھریندے
4553
آپے پاڑن آپے سیون آپے لاء بجھاون
آپ اُجاڑن شہر دلاندے آپے پھیر وساون
4554
آپ دُکھاون دکھیے تائیں آپ کرن غم خواری
آپ حبیب طبیب دلاں دے دارو دین ازاری
4555
صورت دلبر تے جند پرور سُن توں بی بی رانی
تیرے باجھ نہیں ہور دوجی توں گھٹ وچ سمانی
4556
حال حقیقت عاشق والی عرض کراں میں ساری
جیویں شاہنشاہ فرماوے حکم ہووے سرکاری
4557
سد نجومی حال حقیقت اوس پھٹے دل مردوں
اج دن پُچھ لئیں مت بھلکے مرونجیں اس دردوں
4558
تدھ پُچھی گل دسنی آئی نہیں تیرے تھیں ڈرئیے
اس مورت دی صورت تو ہیں ہے بھینے شاہ پرئےے
4559
سیف ملوکے دی ٹھگ توہیں لُٹ لیا جس راہی
دور وں بیٹھی نے چھِک آندا گھت عشقوں گل پھاہی
4560
ڈیرے تیرے دے در اتے ڈھٹھا آن بدیسی
جان جہان گھماء سجن توں سر قربان کریسی
4561
مورت تیری کملا کیتا دانشمند سیانا
شاہنشاہ مصر دا والی در در پھرے نمانا
4562
اوڑک آن تیرے در ڈھہٹھا کر کر بہتا ہیاّ
بھلا کرے رب تیرا بی بی سارشوہدے دی لئی آ
4563
شاہ پری پھر ہس کے کہندی سُن ملکہ غمخوارے
اپنے موہوں بناویں گلاں جوڑ مسودے سارے
4564
اوہ کتھے میں کتھے آہی سے کوہاں دیاں وتھاں
جوڑ مزاخ اولّے بھینے کریں نکمیاں چِتھاں
4565
ناری نار پری میں بندی اوہ ہے آدم خاکوں
میری اس دی نسبت کیکر نہ کر گل اس ساکوں

لفظالی:
جائی = تھاں تے ، واندے = ظاہر ، دناں دن تازی= ہردن کوئی تازی خونی نعمت میسر آوندی اے ، ازاری= ازار والا روگی، گھٹ = دل ، سمانی = سمائی ، چِھک =کھچ ، ہیّا = جگرا حوصلہ ۔ دلیری، مسودے = مضمون دی پہلی تحریر ، وتھاں = فاصلے ، چِتھاں = ناراضگی والے مذاق، خاکوں = خاک دا بنیا ہویا ، ساکوں = ساک دے بارے، جان جہان گھُما سجن توں = اپنی جان تے ایہہ دنیا سجن توں قربان کر دے، اوڑک = آخر کار، شوہدے= عاجز مسکین ۔ جند پرور= روح نوں پالن والی ،خونی نعمت= اجیہی نعمت جو عاشق دا خون کر کے مِلے ، بدیسی= پردیسی،مزاخ= مخول،