ورقہ 245

4566
آدمیاں دا کم ہمیشہ بے وفائی کردے
اول لا پریت پیاری اکثر بازی ہر دے
4567
محبوُباں دا نیونہہ لگادن کر کر مکر بھُلاون
جاں دلدار ملے گل لاوے جھبدے ہی رج جاون
4568
ٹھگی دغے فریب بتیرے کر دے نال سِیّاں دے
جاں دل وس کرن تاں پاون بھس سِر وس پیاں دے
4569
پریاں نالوں ہور طرح دا آدمیاں دا چالا
ایہ دو جنساں وکھو وکھی رلا نہ نسبت والا
4570
پریاں دائم لوک وفائی پالن قول زبانی
جانی نالوں اُتّم جانن جس نوں آکھن جانی
4571
ساڈے بھانے آدمیاں دی یاری بہت نکاری
عاشق بن بدنام کریندے وچ ولایت ساری
4572
جاںمعشوق پیارا لبھے رج رج لین کلاوے
اس نعمت دا قدر نہ جانن کوئی ورلا مُل پاوے
4573
ملکہ خاتوں بدرہ خاتوں بدھے ہتھ شتابی
منت کرکے شاہ پری ول ہویاں پھیر جوابی
4574
تیری ساڈی مہر محبت گوڑھا بھائی چارہ
بہت پیارا مِٹھا کُڑئیے حدوں بے شمارا
4575
اساں شزادے نال پکائے پکے قول اگیرے
اللہ بھاوے میل دیاں گے شاہ پری سنگ تیرے
4576
ہتھ تیرے ہُن لاج اساڈی بول کریں اوہ سچّے
نہیں تاں اسیں قیامت توڑی اس ولوں ہاں کچّے
4577
اسیں بھی ایتھے شاہ ملک دے اوہ شاہ مصر شہر دا
دُوجا اس وڈیائی کیتی جیسی کوئی نہ کردا
4578
اوس شریک بھرا سجن تھیں کریں نہیں شرمندے
رکھ لئیں پت ساڈی ایتھوں شاہ پرئیے دِل جِندے
4579
صاف جواب پری نے دتا سُن توں ملکہ خاتوں
نا محرم نوں منہ نہ دساں اس گلوں باز آ توں
4580
میں کوئی لُنڈ اُچکی ناہیں ماں پیو میرے کیہے
راہیاں نال کراویں یاری چھوڑ خیال اجیہے
4581
شان میری دی لائق جاتوئی اوہ مسافر کوئی
گلیئیں رُلدیاں نوں منہ دساں لاہ شرم دی لوئی
4582
کے دیدار میرا تک سکسی اوہ غریب بے چارا
نالائق نوں کیوں دسالاں جوبن اپراپارا
4583
ایہو قدر میرا تُدھ پایا واہ ملکہ واہ ملکہ
ایسے ویسے نوں کد ملسی رُوپ میرے دا جھلکہ
4584
چُور ہووے کوہ طور نہ جھلے نور حضوروں جھاتی
لَنْ تَرَانِی آکھ اُس تائیں ہو رہو چُپ چپاتی

لفظالی:
جھبدے ہی رج جاون= چھیتی ایFedupہو جاون ۔ تنگ آجاون، سیاں = (١) سینکڑیاں (٢) محبوب، بھَس= خاک ۔کھیہ ۔سواہ، وفائی=وفادار، اُتم = اعلیٰ ۔ پہلے نمبر تے، جانی = جان' ولائت= مُلک، کلاوے لینا= دوہاں ہتھاں دا دائرہ بنا کے گھُٹ کے جپھی پانا، وِرلا = شاذو نادر' کوئی کوئی، مُل پانا= قدر کرنا، جوابی = سوالی دا اُلٹ، اللہ بھاوے= ان شا اللہ، کچے = شرمندہ ، وڈیائی= عظمت ۔ احسان ، شریک = بادشاہی جلال وچ حصہ دار، لنڈ = لُنڈی ۔ غیر ذمہ دار۔ جنہوں پُچھ پرتیت کرن والا نہ ہووے، کیہے= کنی شان والے، اپراپارا= جہدی روایت مثال پہلاں موجود نہ ہووے، جھلکہ = جھلک تھوڑے چر لئی دیدار، لن ترانی= توں مینوں نہیں ویکھ سکدا، ٹ ک ق م الاعراف ١٤٣۔،ایہو قدر۔۔۔۔۔۔=کوئی قدر نہیں پایا،