ورقہ 9

دَر ذِکر آنکہ بعضی از عطایایئ الہٰی بذواتِ مُقدّسہ
بعض از انبیاء اختصاص یافتہ

عقل فراست دے دس حصے اللہ پاک بنائے
نَو ادریس نبی نوں بخشے اک وچ کُل سمائے
حلم کیتا دَہ حصّے خالق جو دُنیا وچ آیا
تنہا نَو سبھ نوح نبی نُوں اِک خلقیں ورتایا
صفوت دے بھی اللہ صاحب حصّے دس بنائے
اِک حصّہ وچ سارے علم نَو یحییٰ نُوں آئے
ایویں صبر کیتا دَہ حصّے نَو ایوب نبی نوں
باقی اِک رہیا سو ایہا ملیا خلق سبھی نوں
خالق پاک صلابت حصّے ایویں دس سوارے
تنہا نَو موسیٰ نُوں بخشے اِک وِچ عالم سارے
خط کتابت تھیں دَہ حصّے نَو عیسیٰ نُوں آئے
اِک دنیا وچ ساری ورتیا راوی لکھ سدھائے
حُسن جمال کیتا دَہ حصّے جِس وچ کُل سمائے
اِک حصّہ وِچ سارے عالم نَو یُوسف نے پائے
ہور فصاحت خلق بلاغت حصّے دس بنایا
ختم الرُسل محمد نوں نو اِک دنیا وچ آیا
ہور جو خوبی وچ نبیاں سو احمد وچ ساری
حمد ربا اَساں بَرکت سَرور آس نجاتوں ساری
جاں یُوسف دِی رُوح مُبارک دُنیا چھوڑ سدھائی
نُور فلک پر یوسف والا کر قندیل ٹکائی
رُوح محمد سَرور والی حکم ہویا رحمانی
یُوسف دا اوہ نور منوّر خود وِچ کرے نہانی
اوہا نُور جو یوسف والا احمد وِچ سمایا
محبوباں دے دل دا مقصد ہو دُنیا وچ آیا
نال طفیل رسول اللہ دے یاربّ بخش اساہاں
رحمت تھیں گھت قطرہ دھووِیں دفتر بھَرے گناہاں
حُب نبی وِی آل اصحاباں مقصد کریں ہمارا
دِل پُر نُور کریں اوس شوقوں جِس بن اَساں نہ چارا