ورقہ 246

4585
اَرِنی اَرِنی بولے ناہیںکھیہڑا ساڈا چھڈے
نا محرم دیدار نہ پاسی لکھ چلیہے کڈھے
4586
ماں ملکہ دی سُندی آہی شاہ پری دیاں گلاں
دل وچ فکر کتیوس ہن میں بھی کرن حمایت چلاں
4587
ہسدی ہسدی اندر آئی کہیوس شاہ پری نوں
ہے بیٹی من لئیں نہ موڑیں ساڈی عرض دھری نوں
4588
کے ہویا جے ملکہ پچھے ہک واری منہ دسسیں
سَر سُکےّ مچھ مردے اُتے ساون بدلی وسسیں
4589
چریں وچھنّی ملکہ خاتوں پھر تینوں رب میلی
اوس شزادے کڈھی قیدوں پھاتھی جان اکیلی
4590
ملکہ نے اس قیدے اندر قول اقرار پکائے
تیرے نال ملانا کیتوس تاں دوئے رل آئے
4591
ملکہ نے سنگ اس دے کیتیاں شرطاں قسم سوگنداں
تاں اس نے کڈھ آندا اوتھوں توڑ اجیہاں بنداں
4592
تاہِییں مڑ مڑ تیرے اگے کرے سوال بتیرے
کیویں ایس گلوں رہ آوے شرم اوہدا ہتھ تیرے
4593
بدرہ تائیں کہیں سہیلی مینوں بھی ماں ماتاں
اساں دوہاں دی بھی ایہ خواہش من دھیے سن باتاں
4594
کدے سوال نہ کیتا تیں تھیں اساں دوہاں بھی اگےّ
کے ہویا اک گل منیں گی بری تینوں کیوں لگے
4595
کہیں مسافر راہی اس نوں نالائق بے چارا
مصر شہر دا نہیں شہزادہ لعلاں دا بنجارا؟
4596
بادشاہی چھڈ آیا ناہیں تیرے کان بدیسیں؟
ایڈی انت نہ چنگی دھیئے کیوں دیدار نہ دیسیں
4597
گھر در ماپے بھیناں بھائی تخت ولایت سٹ کے
ہاہو نیر سمندر ٹھِلہاّ لین عشق دے لٹکے
4598
بے انداز جہاز رُڑھائیوس باز نہ آیا عشقوں
جرم گوائیوس قدر گھٹائیوس کے پھل پایا عشقوں
4599
عیشاں سٹیاں قیداں کٹّیاں کیتیاں چوڑ ترٹیاں
تدھ پچھے ایہ پربت کچھے واہ دتیاں تدھ کھٹیاں
4600
باپ تیرے تھیں باپ اوہدا بھی گھٹ نہیں شہزادہ
کیوں اپنا مُل پاویں دھئیے اُس تھیں بہت زیادہ
4601
لائق قدر تیرے دے کیہڑا اس تھیں ہور اُچیرا
اوہ شاہاں دا شاہ ہے دھیئے ہر کوئی اُسدا چیرا
4602
کے ہویا اج عشق تیرے نے ہولا کیتا ککھوں
باپ اوہدے تھیں منگیا لوڑیں وال نہ دیوے لکھوں
4603
ہک واری دیدار دسن تھیں شان کریں شرماندی
رب ڈاڈھا تک آئیں دھیےئ لکھی کے کرماں دی

لفظالی:

ارنی ارنی= ق م الاعراف ١٤٣ مینوں اپنا آپ وکھا، کھِہڑا = پِچھا۔ رستہ ، چلیہے= چھلے ۔ چالیھ دناں دے وظیفے،عرض= عرضی درخواست، سر=کھلوتے پانی دا ذخیرہ۔ تلا، پھاتھی= پھسی ہوئی، بنداں = قیداں ، رہ آوے =عزت وقار قائم رہ جاوے، ماتاں = ماں لئی زیادہ عزت دا لفظ ، کان=کارن۔ لئی ، انت = انتہا پسندی ۔ کٹّر پن، ہاہو نِیر= پانی وچ سب توں ڈوہنگھا تھاں ، لٹکے= ہُلارے دا سواد، جرم گوانا= اپنے آپ نوں Declassکرنا، جان بجھ کے جنم گھرانے دیاں سہولتاں ترک کرنا، ترٹی چوڑ کرنا= اپنا ککھ نہ چھڈنا۔ڈھیر نقصان کرنا، کھٹیاں = کمائیاں معاوضے مزدوریاں ، رب ڈاڈھا۔۔۔۔۔۔= خدا دا خوف کرتوں اپنی قسمت لکھی تے نہیں نا دیکھ لئی کیہ پتا تینوں پچھتانا پوے،