ورقہ 248

4623
ملکہ دے دل خوشیاں ہویاں مولیٰ آساں لایاں
ہک دوجی دی انگل پھڑ کے باغے اندر آیاں
4624
ٹُر ٹُر سیر کرن وچ باغے پھر پھر لین ہوائیں
چوک عراق پھوہارے ویکھن چشمے حوض سرائیں
4625
رنگ محل چبارے دھولر بھوہرے باراں دریاں
اوس حضوری باغے اندر پر نہ مارن پریاں
4626
سبزہ وانگ پوشاک خضر دی پاک ہویا جل نہاکے
پُھل گلاب سکندر وانگر بیٹھے تخت سُہاکے
4627
ناز آزاد صحیح سلامت جھولن سرو کھلوتے
کلیاں بنھ قطاراں کھلیاں در یتیم پروتے
4628
نرگس مست محبت کیتا شاہ پری دیاں نیناں
عرض کرے سر کڈھ شگوفہ میں بھی درشن لینا
4629
ہتھ کھلارچنار کھلوتے زاہد ہار کنارے
کرن دعائیں مولیٰ سائیں پری دکھاکر مارے
4630
سوہا مکھ کشادہ کر کے بن تن روپ اُجالا
وِچلا داغ وچھوڑے والا کھول دسے گُل لالہ
4631
کیلے کھلے اکیلے جھولن شاہ پری ول پکھّے
آکھن ٹھنڈے ہوکے کھاؤ چرخ پھلے دے رکھے
4632
اُٹھ اُٹھ نمدی شاخ چنبے دی جویں گوروول چیلا
گل عباسی مار اواسی کہے نشے دا ویلا
4633
شاہ پری مکھ دسن لگی بھُکھ چُکسی سُکھ پاساں
تروٹک جاسی نشہ چڑھے گا جاں انگ اس سنگ لاساں
4634
رنگا رنگ بہار پھلاں دی جیوں کُڑیاں وچ میلاں
بھر بھر چھج پھُلاں دے کڈھن ویلاں دین رویلاں
4635
سنبھل سُرت پری ول تکدا سُنبل کھلیں والیں
ساوا پیلا ہو ستبرگہ کہندا مکھ وکھالیں
4636
اُچا ہو سفیدہ نازک تکدا راہ پری دا
ہار سنگار نہ گنتر جوگا ڈالی ہری بھری دا
4637
سیؤ سیوا دار کھلوتے ناکھاں مصری جہیاں
تارن نذراں رُکھ چمن دے سجریاں تے بہیاں
4638
چائی انب کھلوتے ڈالے انب گئے سن بھاروں
شاہ پری رس چوپے ساڈی یا خوش ہوئے اچاروں
4639
خوب خبانی سی رنگ رتی داغ نہ رتی لگا
شاخاں لٹک زمیں پر آیاں مل پری دا اگا
4640
تربوزے خربوزے مِٹھے سردے ہرے بھرے سن
گلگل چوٹے کھٹے مٹھے نِنمبُو سنگترے سن
4641
کھلے بٹنگ بے ٹنک کنارے پک ہوئے رس والے
شاہپری ول ڈِگ ڈِگ پیندے مت سانوں مُکھ ڈالے

لفظالی:
دھولر= شاہی محلWhite house، بھوہرے= تہ خانے۔ پرائیوٹ ہال ، حضوری باغ= بادشاہ لئی مخصوص باغ، گلاب= گلاب نوں پھُلاں دا بادشاہ آکھیا جاندا اے چنار دے پتے اوس کھلے پنجے ورگے ہوندے نیں جہدے وچ کجھ وی پھڑیا نہ ہوئے زاہد دنیا دیاںدو لتاں چھڈ کے خالی ہتھ ہوندا اے ، درشن= دیدار، زاہد ہار= زاہد وانگوں ، اجالا= روشن ، سوہنا، لالہ = جس دی سرخ پتی تے اک کالا داغ ہوندا اے، چرخ= گھُمن والے ٹرے جنہاں وچ مہمان من پسند دا پھل لین لئی چرخ گھماکے اپنے سامنے کر لیندا اے، تروٹک = کمی ۔ گھاٹا ۔ اُباسی نشے دی تروٹک پاروں آوندی اے، میل = کڑی والے گھر شادی وچ آئے لوکاں دا اکٹھ، رویل= اک پھُل رائے بیل جدوں رویل دے پھُل بوٹے توں بار بار ڈگن تے معلوم ہوندا اے بوٹا ویل دے رہیااے ، سُنبل=اِک خوشبو دار گھاہ جہدے سٹے گُندیاں میڈھیاں وانگوں ہوندے نیں،چوٹے= چوکھے کھٹے، انب جانا= سریر دے کسے انگ دا بھار تھلے آ کے یا اکو تھاںٹِک کے تھکاوٹ پاروں دُکھی ہونا، اگا ملّنا= استقبال لئی اگے کھلورہنا،