ورقہ 253

4715
جے لکھ گالیں طعنے دیوے نالے منہ پھٹکارے
اس تھیں چنگا کے اسانوں اس سنگ بات کریندے
4716
کیتی قسم بتیری واری دل دے روگ نہ دسساں
جان لباں پر رہی نہ طاقت تاں ہن ظاہر پَیندے
4717
مکھ پیاد اآب حیاتی اسیں موئے ترہائے
جل بن مچھلی وانگ محمد رہیے کچر تپیندے
4718
جے محبوب پیارا ہک دن وسے نال اساڈے
جاناں اج ہما پکھیرو پھاتھا جال اساڈے
4719
مثل حباب سروں سٹ ٹوپی جل خوشیاں دے ڈُباں
پئے پچھاواں اس داجے وچ جام زلال اساڈے
470
چڑھ چناّ! تے کر رُشنائی کالی رات ہجر دی
شمع جمال کمال سجن دی آ گھر بال اساڈے
4721
دلبر دے درجاء نہ سکدے حوراں ملک اسمانی
کد مجال سلام کرن دی مثل کنگال اساڈے
4722
سوہنی صورت ویکھ لباں توں واری جان پیاری
مت ہک گُھٹ لبھے اس جاموں ایہ خیال اساڈے
4723
کہندا پھیر خیال زلف دا جان نہ جان پیارے
ایسے کئی شکار پھساندے پھاہیاں وال اساڈے
4724
نا امید سجن دے در تھیں نہ ہوساں نہ مُڑساں
کدے تے رحم پوے گا اس نوں ویکھ وبال اساڈے
4725
خاک اوہدے در والی والا جس دم میں دم ماراں
مِٹھی واؤ جنت دی پھر دی مغزدوال اساڈے
4726
ہے واؤ اس عشق میرے دی رمز پیاّ کن پائیں
آکھیں ہتھیں مار، تُساںنوں خون حلال اساڈے
4727
جے اوہ ایہہ گل منے ناہیں صاف جواب سناوے
آکھے شالہ ہون نہ ایسے نفر بے حال اساڈے
4728
کہہ اگوں ہے شاہ حسن دے بادشہاں در منگتے
مڈھ قدیموں بَہندے آئے بھائیوال اساڈے
4729
کرن گدا سجن دے کوچے بادشاہی تھیں چنگا
جے اوہ پاوے آپ محمد خیر رومال اساڈے
4730
موتے نالوں بری جدائی مینوں یار سہائی
لطف خدائی لیسی بدلہ ہور نہ میرا کائی
4731
ڈیرا یار میرے دا اُچا عالی شان جہانوں
کر فریاد اُچیری ساری ہے جند درد دکھائی

لفظالی:
اس تھیں چنگا کے اساں نوں = ایہدے نالوں ہو رکیہ چنگا اے کہ اوہدے نال گل تے کرای رہے ہاں،تپیندے= تڑفدے، وسے= آباد ہووے۔ گوڑھے تعلق رکھے،حباب = بلبلہ، جام زلال = نایاب ٹھنڈے تے مٹھے پانی دا پیالا۔ ہما = فرضی پنچھی جس دا سایہ وی بندے نوںبادشاہ بنا دیندا اے، پچھاواں = پرچھاواں ، زلال= چھوٹا کیڑا اے جنہوں نچوڑ کے عرب ٹھنڈا تے مٹھا پانی حاصل کردے سن، مت = شائد، مغز دوال= مغز دوالے، دم مارنا= ساہ لینا۔ سونگھنا، کن پاونا= سُناونا، بھائیوال = حصہ دار۔ رقیب۔ ہم پیشہ،( منگتے تے مانگت وی میرے نالدے جوٹی دار نیں ) سہائی= برداشت کرائی، لطف خدائی= اللہ دا کرم، ( جیہڑا میرا ساتھی بنے گا)صاف جواب سناوے= مارن توں انکار کرے ، بہندے آئے= در تے بہندے آئے نیں ،