ورقہ 254

4732
باجھوں اکھر عشقے والے ہور نہ سبق پڑھایوس
رب استاد میرے نوں دیوے نیکی تے وڈیائی
4733
سوہنی صورت ویکھن کولوں منع نہ کریو بھائی
جمدڑیاں ایہ عادت مینوں پاون والے پائی
4734
ہے خوش واؤ سجن دی جاویں اندر باغ سجن دے
سرو آزاد میرے نوں آکھیں کر کے سیس نوائی
4735
باجھ دیدار تیرے تھیں سجنا! خوشی نہ دِسے خوابے
مکھ وکھاویں نہ چر لاویں آویں برا خدائی
4736
ہے واؤ جا آکھ سجن نوں ہے بک باغ ارم دے
کیوں تدھ سرگردانی مینوں وچ اجاڑاں پائی
4737
آپ سیاں وچ رل کے کھیڈیں ماریں موج نصیباں
کدے تے پُچھ غریباں تائیں جو ہوئے صحرائی
4738
شکرو یچن والا بنیا شالہ جُگ جُگ جیوے
کیوں نہیں پچھدا صلح کداہیں طوطی بُھکھ سُکائی
4739
مان حسن دا ٹھاکے تینوں ہے پُھل شاخ گلابی
پچھ نہیں گل بلبل کولوں جو تدھ کان سودائی
4740
نال سیاں دے رل کے جس دم مدھ خوشی دا پیویں
کر کھاں یاد مینوں بھی جس نے سِکدیاں عمر لنگہائی
4741
خبر نہیں کے رنگ اینہاں دا کس سببوں نسدے
گوہڑے نین سیاہ جنہاں دے کر دے نہ اشنائی
4742
حسن جمال کمال تیرے وچ ہور تمامی صِفتاں
ہکو عیب وفاء محبت نہیں اندر زیبائی
4743
ہے واؤ جد باغ ارم وچ جاسیں پاس پیارے
ہتھ بنھ عرض گذاریں اوتھے ہو کے میری جائی
4744
میں نت درد تیرے دی آتش سینے اندر جالاں
تلیاں وچ کڑاہ غماں دے جیؤں مچھی جل جائی
4745
جے جگ دشمن مارن والا توں ہک سجن ہونویں
موتوں ذرہ نہ ڈرساں کرساں دم دم شُکرالائی
4746
جاں جاں عاشق بجھے ناہیں محبوباں دے درتے
کد خلاصی کردا اس دی ظالم درد جدائی
4747
جلوہ روپ تیرے دا لُٹدا متقی شاہ گداواں
ایسی صورت سوہنی تائیں مت کوئی نظر نہ لائی
4748
توڑے دور پیا پردیسی یاد نہیں تدھ کیتا
میں مدھ پیواں سور تسانوں ہکدم نہیں خطائی
4749
ہے خوش واؤ فجر دی آنیں خاک اوہدے درباروں
اس سُرمے تھیں لے محمد اکھیں دی رُشنائی

لفظالی:
نہ پڑھایوس= اُوہنے مینوں نہ پڑھایا، وڈیائی= فضیلت ، سیس نوائی کر کے= سر جھکاکے، براء خدائی= خدا واسطے ، بک = ہرنی دا بچہ، ماریں موج نصیباں= اپنے بھاگاں دی موج مانیں ، شکرویچن والا بنیا=مٹھیاںمٹھیاں گلاں کرن والا محبوب، کداہیں = کدے، صُلح پچھنا= صلح مارنا ۔ کھاون دی دعوت دینا، بنیا= ہندو دکاندار جیہڑا کنجوس تے لاہے لابھ لئی چوکھا بدنام اے،مدھ= شراب، سِکدیاں = ملن دی اڈیک وچ تڑفدیاں ، میری جائی=میری تھاں تے ، جالاں = (١) جھلاّں(٢) جلاواں، تلیاں = تلی گئی ہاں، جل جائی= پانی دی دھی پانی دی پیدائش، جے = اگرچہ، شکر الائی، شکردے کلمے کہنا، سورنا= مدد لئی فریاد کرنا،