ورقہ 255

4750
ہے سلطان حسن دی نگری راج سلامت تیرا
میں پردیسی ہاں فریادی عدل کریں کجھ میرا
4751
تدھ بن جان لباں پر آئی جھلیادرد بتیرا
دے دیدار اج وقت محمد جگ پر ہکّو پھیرا
4752
عشق فراق بے ترس سپاہی مگر پئے ہر ویلے
پٹن بند سٹن وچ پیراں وانگر ہاتھی پیلے
4753
صبر تحمل کرن نہ دیندے ظالم بُرے مریلے
تدھ بن ایویں جان محمد جیوں دیوا بِن تیلے
4754
بستر نامرادی اُتے میں بیمار پئے نوں
دارو درد تساڈا سجنا! لے ازار پئے نوں
4755
ذکر خیال تیرا ہر ویلے درداں مار لئے نوں
ہے غم خوار ہکلی جائی بے غمخوار پئے نوں
4756
چنتا فکر اندیشے آون بنھ بنھ صفاں قطاراں
وس نہیں کجھ چلدا میرا قسمت ہتھ مُہاراں
4757
پاسے پاسے چلی جوانی پاس نہ سدیا یاراں
ساتھی کون محمد بخشا درد ونڈے غمخواراں
4758
مان نہ کیجے روپ گھنے دا وارث کون حسن دا
سدا نہ رہسن شاخاں ہریاں سدا نہ پھُل چمن دا
4759
سدا نہ بھور ہزاراں پھِرسن سدا نہ وقت امن دا
مالی حکم نہ دے محمد کیوں اج سیر کرن دا
4760
سدا نہ رست بازاریں وکسی سدا نہ رونق شہراں
سدا نہ موج جوانی والی سدا نہ ندیئیں لہراں
4761
سدا نہ تابش سورج والی جیونکر وقت دوپہراں
بے وفائی رسم محمد سدا ایہووچ دہراں
4762
سدا نہ لاٹ چراغاں والی سدا نہ سوز پتنگاں
سدا اڈاراں نال قطاراں رہسن کد کلنگاں
4763
سدا نہیں ہتھ مہدی رتے سدا نہ چھنکن ونگاں
سدا نہ چھوپے پاء محمد رلمل بہنا سنگاں
4764
حسن مہمان نہیں گھر باری کے اس دا پھِرمانا
راتیں لتھا آن ستھوئی فجری کوچ بُلانا
4765
سنگ دے ساتھی لدی جاندے اساں بھی ساتھ لدانا
ہتھ نہ آوے پھیر محمد جاں ایہ وقت وہانا
4766
سدا نہیں مرغایاں بہنا سدا نہیں سرپانی
سدا نہ سیاں سیس گنداون سدا نہ سرخی لانی
4767
لکھ ہزار بہار حسن دی خاکو وچ سمانی
لاپریت محمد جس تھیں جگ وچ رہے کہانی
4768
مگر شکاری کرے تیاری بار چریندیا ہرنا
جو چڑھیا اُس ڈھینا اوڑک جو جمیا اُس مرنا

لفظالی:
ہے= اے، پٹن بند= قیدی یا پاگل دیان زنجیراں کھول دیندے نیں، ایویں جان= انج سمجھ لئیں، دارو درد تساڈا= تساڈا درد ای میرے لئی دارو اے ، ازار = بیماری، ہکلی جائی= تنہائی وچ ، پاسے پاسے = (١) اصل مرکز توں ہٹ کے (٢) پاس دا پاس کر دیاں ادب لحاظ دا دھیان کر دیاں، وارث= اجیہا مالک جیہڑا اپنی ملک کسے دے نانویں وی لوا سکے حسن کِسے دی ملکیت وچ نہیںہوندا،ورد ونڈے غمخواراں= چنتا فگر اندیشے ای میرے غم خوار نیں ایہو میری ہمدردی کررہے نیں ، ہزاراں = بلبلاں۔ ہزار داستاناں، تابش = چمک ۔ سیک ، دہراں = زمانیاں، اڈاراں = پروازاں ، رتے = رنگے ، چھوپے = چار پونیاں دا کٹھ ،چھوپے پانا=کُڑیاں دا کسے بھوہرے وچ کتن دا مقابلہ کرنا،کوچ بلانا= کوچ دا اعلان کرنا ، وہانا=گزر یا ہویا، سمانی = سماجانی ایں ، چڑھیا= اُسریا۔ اُچا تعمیر ہویا،ستھوئی=اوٹھ تے سفر کرن والا،