ورقہ 10

افزائش گُلزارِ عالم بگلر وی یوسف و فَوت شُدن مادرِ مہربان دَرایّام
رضاعِت اوو پرورش یافتن دَرکنارِ شفقتِ عمَّہ

اس دنیا دے ماتم خانے کتنے حاکم آئے
وارو وار زمانے اپنے جگ وچ حکم چلائے
قدم مبارک صفی اللہ دا اس دنیا وچ آیا
حکم الاہوں جس دے تائیں ملکاں سِیس نَوایا
تاج نبوت سر تے دَھریا شرف مِلے دَرگاہوں
فرزنداں نُوں راہ ویکھائی کُل سفید سیاہوں
دُنیا فانی چھوڑ چلن دِی آخر واری آئی
شیث ہویا وچ دنیا رہبر شرف نبوت پائی
چھوڑ کبوتر خانہ دنیا شیث نبی جاں دَھایا
حکم رسالت پاک جنابوں تاں ادریس لیایا
جاں ادریس خدا دے حکموں چھوڑ زمیں سدھایا
نوح نبی وچ خلقاں رہبر ہو دُنیا وچ آیا
اِبراہیم نبی دِی واری مُدّت پِچھے آئی
پھر اِسحاق نبی نُوں جگ وچ ملی وڈیائی
لگا وچ کنعان وَلایت پھِر عَلَم یعقوبی
مال کثیر فراغ عبادت حاصل کُل بخوبی
ہور آرام قبائل عزت تاج نبوت والا
اللہ نے فرزند دِتے تِس ہر اِک قدر اُجالا
ارجواں نام نبی دی زَوجہ چھے پُت اُس نے جائے
نام یہودا سبھ تھیں وڈا اَندر قدر سوائے
مارواں نام حرم دا بیٹا سی شمعون پیارا
دُوجا وِیر چھوٹیرا اِس تھیں سَکّے ایہا دویارا
مالیا ہور حرم دو بیٹے پیغمبر گھر جائے
بن راحیلے جایاں دوہاں ایہہ دس گنتی آئے
تے راحیل پیاری زَوجہ بھین ارجواں سَندی
ایہہ مائیں دِیاں دِھیاں دوویں آیا وِچ پیوندی
آپس وچ دو سکیاں بھَیناں اَندر اوس زمانے
جمع روا وِچ اِکت نِکاحے رَبّ دے وِچ فرمانے
دو دِھیاں راحیلے جائِیاں تے دو بیٹے جائے
یُوسف بنیامین دوہاں دے پیو نے نام رکھائے
سبھ یعقوب نبی دے بیٹے باراں گنتی آئے
سُورج چندوں دُون سوائے حُسن سبھاں نیں پائے
جاں دُنیا وچ آیا یُوسف کھولی چشم نقابوں
چمکوں لشک فلک تک گیا کھُلّا نُور حجابوں
بَرق دَرخشاں لعل لباں وِچ رَس مِس نُور چمکدا
جے سَو عاقل لِکھے مثالاں حرف نہیں لکھ سکدا
چہر مُبارک شعلے نوری شکل سبھے نورانی
کیا کہاں اوہ کِس دے جیہا ہور نہ اُسدا ثانی
اَگے قحط جگت وچ چھایا تس دِن رہیا نہ کائی
ارزانی وِچ دیس ازغیبوں خوشی دِلاں وِچ آئی
سُکیاں نہراں جاری ہوئیاں وگِیاں وِچ جہاناں
خُشک دَرخت پھلے پھل پھُولوں خنداں گُل بُستاناں
وِچ پہاڑاں گھاہ اَنگوری کُھلیاں گُل گلزاراں
جنگل سبز زمّرد رنگیا تازہ وَقت بہاراں
خوشخبراں وچ گھر گھر گئیاں خوشیاں دے پروانے
چُکیا گیا اندھیر جہانوں روشنیاں کنعانے
پیغمبر دے بیٹا ہویا یوسف نام رکھایا
فرش زمیں دا ہیٹھ قَدم دے فخر بڑے وِچ آیا
جانوراں کُل ہر شے وحشی تِس دِن جشن منائے
ویکھ فرشتے جلوہ نوری حیرانی وچ آئے