ورقہ 257

4788
جاں اوہ منزل پوری ہوندی موہوں لہندی لوئی
وت نہ کاری آوے توڑے سو مت دیوے کوئی
4789
شاہزادے دے عشق پری نوں دتیاں آن دعائیں
بندگی تے تعظیم بی بی جی خالی پرت نہ جائیں
4790
برخورداری دے اسانوں ہُن آئے گھر تیرے
مساں مساں اج لبھئیں واندی کر کر بہتے پھیرے
4791
نِکی اتے لڈکی بن کے بُہتی عمر لنگھائی آ
پیہنا بھا پیا ہن کُڑئیے بادشہاں دا پائی آ
4792
مگر تیرے ہن اسیں پیادے مشکل ستریں وڑنا
والی شہر مصر دے اگے بنھ کے تینوں کھڑنا
4793
شاہ پری فرماندی اگوں برخورداری دے کے
پردے نال اکوار بندی نوںجاون دیویں پیکے
4794
میں بیٹی شاہپال شاہے دی پریاں دی شہزادی
بنھ کھڑن دا آکھیں مینوں نہ کر گل زیادی
4795
عشق کہیا میں بنھ بنھ کھڑیاں تدھ تھیں بھلیاں بھلیاں
مائی بابل پِٹ پِٹ تھکے واہاں مول نہ چلیاں
4796
مغرب دی شاہزادی اگے بی بی نام زلیخا
بنھ کھڑی تاں کس چھڈائی تُدھ بھی اوہو لیکھا
4797
سُکی نہ ہُن جاسیں ایتھوں آ دکھ جھولی پالَے
پالے رب پریتاں اگوں نیونہہ سجن دا لالَے
4798
دینا ہے محصول عمر دا جنسوں روک وٹالَے
ترسی کول صراف محمد کھوٹا کھرا وکھالَے
4799
کھوٹے کھڑسیں تروٹے کھاسیں سوٹے پیسن نالے
سونا تراما کرسن جس دن پا کٹھیالی گالے
4800
گھت زنجیر کرن گے قیدی شاہ عدالت والے
ڈاہڈے کول محمد بخشا کون کرے اپرالے
4801
ٹر دی ٹردی گل محمد چھوڑ چلی اوہ رستہ
تنگ پیا دل دس کہانی مکدا ہووے فستہ
4802
جے سبھ گلاں لکھن لگیں جوجو ہادی گھلدا
ہوروں ہور پون وچ رمزاں قصہ صاف نہ چلدا
4803
عشق بدیع جمال پری نوں آ پایا ہتھ پکا
جس نوں پھڑدا ہے بنھ کھڑدا نہیں کسے دا سکا
4804
مان گمان گئے بھج سارے دل ارمان نہ رتی
سڑ دی گل نہ کر دی موہوں وانگ دیے دی بتی
4805
وک گیا جی چِھک سجن دی ہِک اندر ہتھ پایا
کُنڈی لگی مچھلی والا حال پری پر آیا
4806
صبر قرار آرام نہ رہیا شام ڈٹھا جس ویلے
شام تلک دل جردا ناہیں آکھے ہُن کوئی میلے

لفظالی:
مونہو ں لوئی لہ جانا= شرم ۔ لوک لجیا جگ ہنسائی دی پرواہ ختم ہوجانا، کاری آنا= کار آمد ہونا، برخورداری دینا= صحبت مجلس وچ بے تکلفی دا لطف اٹھاون دا حق دینا، واندی= لُگی۔ اکلی، پیہنا= چکی پیسن دا کم ، پائی= چار ٹوپے یا دس سیر دانے،پیادے= پیدل نوکر ۔ نال رہن والا معمولی نوکر، واہاں = وس ۔ اختیار، سُکی = جرمانے سزا توں بغیر، عمر دا محصول = دنیا تے زندگی گذارن دا ڈیوٹی ٹیکس، جنسوں روک وٹالے= جنس دے کے نقدی دے سکے لے لئے، ترنا= کھوٹے کھرے دا فیصلہ ہو کے قبول ہو جانا، سونا تراما کرسن= جِنھوں توں غلطی نال سونا سمجھیا ہویا اے اوہنوں تانبا ثابت کر دین گے، فستہ=جھگڑا۔ بکھیڑا، سکا = عزیز رشتے دار، ارمان= ارام ۔ افسوس ۔ حیرت، جی وک گیا= دل محبوب دے حوالے ہو گیا، ہک= سینے، شام= شا م سُندر۔ محبوب