ورقہ 259

4824
کنڈلاں والی سوبھے سر تے جھنڈ معنبر کالی
ہر ہر وال دلاں دی پھاہی دُدھ دہی گھت پالی
4825
لاہ لاہ کرے شعاع متھے دا جوبن جوت متابی
مِرگ جنگل دے ہار سنگارے گوڑھے نین شرابی
4826
متھا صاف سمند حسن دا جوبن چڑھیاں لہراں
تاب بیتاب کرے جیوں سورج روشن وقت دوپہراں
4827
طاق بہشتی دو بھروٹے یا محراب مسیتوں
خونی نین دِسن متوارے گُوڑھے رنگ پریتوں
4828
ابرو مثل ہلال درخشاں یا اوہ سخت کماناں
پلکاں تیر خدنگ نشانی سل جاون دل جاناں
4829
تیز کٹار سوار بہادر ظالم نین سپاہی
نک کھنا فولادی ترکھا دھار سنواری آہی
4830
کھنے تیر کمال کٹاراں چمک کڈھی ہتھیاراں
پریاں حوراں ویکھ شزادہ جان کرن سرواراں
4831
یوسف ثانی چن اسمانی لعل مثل رخسارے
روپ اوہدے تھیں باغے اندر نور بھرے رُکھ سارے
4832
چہرے تے چمکار حسن دا تابش ودھ انگاروں
سندر بدن پُھلاں دا دستہ دانہ سُرخ اناروں
4833
صورت سیف ملوکے والی اُجلی باغ بہاروں
ویکھن سات کھڑے دل کھس کے شاہ جمال ہزاروں
4834
سوہنا ویکھ جوان فرشتے ہو حیران کھلوندے
تکدے رہن اسمانی تارے ساری رات نہ سوندے
4835
ہر ہر نقش شکل دے وچوں لاٹ شمع دی بلدی
جلدی حور پری دی تک کے جند نمانی جلدی
4836
نونہال حسن دے باغوں گلبدن سی سادہ
بدر منیر چمکدا چہرہ بے نظیر شاہزادہ
4837
سر اُتے کستوری بھنی جھنڈ لوی خشخاسی
نین متّے بیمار عشق دے نرگس مست اُداسی
4838
روپ انوپ بھرے رخسارے جیوں گل وقت بہاراں
نوری ناری خاکی بادی تک تک ڈھہن ہزاراں
4839
دند سفید ہیرے دیاں کنیاں دُر یتیموں لڑیاں
سُرخ عقیق اندر دند لہراں خوب کریگر جڑیاں
4840
سُوہنے اوٹھ مِٹھی گل والے مثل اُچے یاقوتوں
عاشق بھُکھے لاغر رکھے قوّت پان اس قُوتوں
4841
بازو لوہڑے چاندی خاصوں گرد کریگر ڈولے
پِیہنڈے تے زور اور سوہنے شےراں وانگر ڈولے
4842
جیوں چاندی دی آرن ہوندی موہنڈے گوڑے بھارے
چِترے وانگن گردن دسدی لِنگ زور آور سارے

لفظالی:
سوبھے= زیب دیوے سجے پھبے، معنبر= عنبر دی خوشبووالی، لاہ لاہ کرنا= چمکنا۔ ڈلہکنا، متابی جوت= چن دا چانن، سمند= سمندر، متوارے= متوالے ، کھنا= کھانڈا۔ چودھاری تلوار، سرواراں= سر توں واری کوئی شے، رُکھ = درخت، تابش= چمک ۔ سیک ، کھس کے= اپنے کولوں کھوہ کے محبوب نوں پیش کرن لئی تیار، جلدی = چھیتی۔ سڑ دی، کستوری بھنی جھنڈ = سردے وال کستوری بھنے سن، روپ انوپ= حسن بے نظیر، اوٹھ= ہوٹھ۔ لب، پیہینڈے=نِگّر۔ مضبوط۔ پیڈے، لِنگ= سریر دے انگ ، ڈولے= بازو دیاں مچھلیاں،لوہڑے= کپاہ دے ویلنے وچ لکڑ دے رولر سڈول نرم گداز تے تلکنے، گوڑا= گوڈا، آہرن = لوہے دا اک سخت اٹ ورگا ڈلا، قوتوں = خوراک توں ،تاب= گرمی۔ سیک ، بیتاب= جھل نہ سکن والا،