ورقہ 260

4843
لک مہین عجائب گردا چَیڑی چھات جنے دی
دل وچ پری کہے جس جایا دھن اوہ ماء جنیندی
4844
کُولے پٹ دوپٹ سُہائے جندر قدرت چڑھ کے
موگریاں استاد بنایاں چنن رُکھوں گھڑکے
4845
گوڈے شےشے گرد لاہوری کاری گر چمکائے
پنیاں سن روں دار عجائب گل نہ کیتی جائے
4846
نازک پیر ابریشم لچھے بہت مہین انگشتاں
سوہنے ویکھ کرن ول چا کر دھو دھو پین انگشتاں
4847
نازک سوہنا بدن گلابوں رنگ رس بھریا بنّا
حسن جمال کمال اوہدے دا نہ کوئی حدنہ بناّ
4848
جاں منہ طرف زمیں دی کردا ہوندی دھرت نورانی
جاں سِر اُچّا کر کے ویکھے لاٹاں چڑھن اسمانی
4849
صورت ویکھ ہووے چن داغی غیرت کھا حسن دی
لگے تیر عطارد تائیں چُھٹے قلم لکھن دی
4850
زُہرہ نوں تک زہر پرم دا وچ کلیجے دھاوے
ہاروتے ماروتے وانگن لہ اسمانوں آوے
4851
گلناری مکھ تک کے سورج آن چھپاوے رسماں
یاری لاوے پگ وٹاوے دوست بنے کھا قسماں
4852
دھاڑ پوے مریخے تائیں کالے کجل کٹک دی
ہو حیران بہے وچ خانے چوکی چھوڑ فلک دی
4853
مشتری اکھر ویکھ حسن دے شاہزادے دے ورقوں
چھوڑ قضا دیوان عشق دا کرے مطالعہ سبقوں
4854
روپ سچے دا عشق کماوے عین سعادت پاوے
سعداں نال کرے اشنائی اکبر سعد کہاوے
4855
کالا چور زحل اسمانی گورا ویکھ شاہزادہ
بنے غلام حلالی حبشی ثابت رکھ ارادہ
4856
سوہنی بنھنی سوہنی صورت سوہنا قد رنگیلا
سوہنا خط اتے جھنڈ سوہنی خوش آواز رسیلا
4857
بن بن پئے پوشاکی ساری روپ چڑھے ہر دیسوں
خوشبوئی کستوری ہُلے آون کالے کیسوں
4858
بنّھ ہتھیار سوار ہووے جاں چڑھدا طرف شکارے
گولی کھا بِندی دی ڈھہندے مرگ جنگل دے سارے
4859
صورت ویکھ شہزادے والی وگدا وہن کھلووے
ڈر سنسار لگے تھر کنبا جاں ہتھیار وہووے
4860
شاہ پری دی نظری آئے نین ایانے روندے
ہر پِمن دے والوں موتیں ہنجوں ہار پروندے
4861
چہرے تے پرسیئوں قطرے جوش بخارالم دے
جیونکر پھُل گلاباں اُتے سے موتی شبنم دے

لفظالی:
گِردا= محیط ۔ گولائی، چیڑی چھات= چوڑی چھاتی، جایا= جمیا، کولے پٹ= ریشم ورگے نرم، سُہائے = سوہنے لگدے سن ، جندر= خراد ، موگریاں= مُنگلیاں، چنن رکھوں = صندل دے درختوں ، شیشہ گرد= ایسا ماہر مداری جیہڑا کسے بوتل صراحی وچ پئی مائع دا رنگ بدل دیوے، انگشتاں = پیراںدیاں انگلیاں ، حسن دی غیرت کھاکے =ودھیرے روپ دا حسد کر کے، عطارد = ٹ ک تفصیلاں ، زہرہ= ٹ ک شخصیتاں ، پرم = عشق ۔پریم ، ہاروت ماروت= ٹ ک شخصیتاں ،دھاڑ= حملہ آور ڈاکواں دا گروپ، مریخ = ٹ کتفصیلاں، پگ وٹانا= پکے یار دوستی دی نشانی لئی اک د وجے نال پگ وٹا لیندے نیں دوہاں دی عزت سانجھی ہو جاندی اے ،چوکی= حفاظتی یا انتظامی مقصد لئی بنایا مرکز جتھے سپاہیاں دا اک دستہ ہووے،مشتری = ٹ ک تفصیلاں ، سعداں = سعدین ۔ زہرہ تے مشتری دونویں مبارک ستارے مشتری سعد اکبرتے زہرہ سعد اصغر اے،کیس= سر دے وال، ورقوں= چہرے دے خط توں حسن دے اکھر پڑھ کے انصاف دی کچہری وچ انصاف دا کم چھڈ بہندا اے تے عشق دے سبق دا مطالعہ شروع کر دیندا اے ،پِمن= جھمنیاں۔ مژگاں