ورقہ 262

4881
ملکہ سُن کے گل خوشی دی جھبدے جھبدے آئی
جو گُذری شاہزادے اگے ساری کھول سنائی
4882
اہ پری دا آون جاون جے کجھ بولی ہسیّ
نالے مورت منگن والی خواہش بھاری دسی
4883
شاہزادے فرمایا ملکہ مورت تیرے بھانے
اک اک وال اوہدے مُل جانیں میں بِن قدر نہ جانے
4884
جے اکھیں تھیں اوہلے ہووے نیر نہ ٹھلن دیدے
وانگ اٹک دے اٹک نہ رہندے ہنجو درد رسیلے
4885
اوہ ڈاہڈی میں لِساّ جیکر مورت موڑ نہ دیوے
گھڑی نہ جرساں تے سڑ مرساں جیوں تیلے بِن دیوے
4886
صورت تے ہتھ لگے ناہیں مورت کیوںکھڑاواں
جے اک وال اوہدا کوئی تروڑے ویکھدیاں مر جاواں
4887
ہور کسے نوں ہے کے صرفہ دُکھیے جیو میرے دا
جے نقصان ہووے اک ذرہ کے پَھلکھڑے تیرے دا
4888
ملکہ خاتوں کہندی ویرا خطرہ رکھ نہ بھورا
کون کھسے ایہ مورت تیں تھیں نہیں کسے دا زورا
4889
مطلب تیرے کارن میں بھی مڑ مڑ عرضاں کر دی
مت مورت تک شاہ پری نوں جاگے حرص اندر دی
4890
وال اوہدا کوئی ڈِنگا چاہے تاں میں کرساں دنگا
نال ادب دے مورت تائیں تدھ تھیں رکھساں چنگا
4891
ان شاء اللہ مورت تائیں کجھ ارگاہ نہ لگسی
شاہ مہرے دی جوڑی تک کے کر دپری دل وگسی
4892
دوئے شکلاں ویکھ برابر حُب اوہدے تن رسسی
میں بھی قولوں سچی ہوساں مت تینوں منہ دسسی
4893
القصہّ شاہزادے تائیں ملکہ گل منائی
حرص امید ملن دی اْتے مورت ہتھ پھڑائی
4894
کر لاچاری گریہ زاری کہیا ملکہ تائیں
کیویں جلدی اس جانی نوں میرے کول پُچائیں
4895
ملکہ خاتوں نے لے مورت جا پری نوں دسیّ
ویکھ ہوئی حیران پری بھی تاب شکل دی جھسیّ
4896
کرکر نظر پچھاتی مورت ہر ہر جا سنبھالی
اپنی صورت نظری آئی ہور شہزادے والی
4897
حسن جمال کمال دوہاں تے انَت حساب نہ آوے
اونویں اکھیں ٹڈیاں رہیاں نہ کجھ آوے جاوے
4898
کنب گیا جی جُثہ جامہ مغز سرے دا پھریا
ہوش طبیعت تھاں نہ رہیوس آن کلیجہ کِریا
4899
عطر گلاب لگے چھنکاون تاں پھر ہوش سنبھالی
ملکہ نوں فرماندی بھینے دے گل مورت والی

لفظالی:
تیرے بھانے= تیرے خیال وچ، جانیں = انسانی جنداں ، اٹک =(١)اک دریا(٢) رُکے، صرفہ= ہمدردی ، پھل = نفع فائدہ، حرص= محبت، دنگا=فساد لڑائی، ارگاہ= سٹ پھیٹ۔ ٹھوکر، کرد= کارد۔ چھُری، تن رسسی= سریر وچ رس جائے گی، تاب شکل دی جھسی= شکل دی چمک دمک نے اوہدا کلیجہ کڈھ لیا،نہ کجھ آوے جاوے= بت بنی چُپ کھلوتی رہی،ٹڈیاں رہیاں=کھلی کی کھلی رہ گئیں اکھیں تاڑے لگیاں رہیاں، مغز سرے دا پھریا=دماغ چکرا گیا،کلیجہ کِریا= دل دی حرکت مٹھی پین لگی Began to Sink، گل دینا= پوری کہانی سُنانا،حُب=دوجے پاسیوں جواب مِلنوں بغیر یک طرفہ محبت،جے= جو،تیلے= تیل