ورقہ 264

4919
دانشمند پری پھر بولی پکا پتہ دسالے
نام بدیع جمال کڑی دا بیٹی شاہ شہپالے
4920
اوہ اگوں شاہ رخ دا جایا اوہ اولاد تساڈی
اگوں آپ سیانے صاحب حاجت کے اساڈی
4921
دتا حکم نبی نے اگوں صورت نقش بناؤ
تاں میرے دل ہووے تسلی کر تصویر دکھاؤ
4922
پری عجائز مورت کارن کیتا فکر اندردا
ترے سے ہور حکیم سیانا ہر اک اہل ہنردا
4923
ہور کئی تاریخاں والے دین جو غیبوں خبراں
کرن لگے تدبیر شکل دی تک تک زیراں زبراں
4924
کر تدبیر عجائز ہوراں اک تصویر بنائی
اطلس لے بہتّر رنگا اس پر خوب سُہائی
4925
زینت زیب ہزاراں کیتے وانگن باغ بہاراں
لے گئی پھر پاس نبی دے مورت نقش نگاراں
4926
دیکھ رہیا حیران پیغمبر ست دن تے ست راتاں
واہ خالق جس بندے کیتے صاحب ایڈ صفاتاں
4927
اٹھویں روز مصوّر تائیں نالے ہور حکیماں
خلعت تے زر دولت بخشی وافر مال نعیماں

لفظالی:
دسالنا = دس پانا۔ دسنا، جایا= جمیا، حاجت= مجال، بہتر رنگا= بہتررنگاں دا،سُہائی= سجائی، صاحب = مالک، مال نعیماں= خوشی تے آنند سکون والا سامان، سرفرازی دینا= اُچا مرتبہ دے کے عزت افزائی کرنا، منصب = دربار وچ درجہ۔ پنج ہزاری دس ہزاری دا خطاب،لِکھی= کھچی Draw کیتی، کرکے بہت تمیزاں= اک اک رنگ دی پچھان کر کے ، سردار عزیزاں = مصردے بادشاہ نوں عزیز آکھدے سن۔ا جہے بادشاہواں دا سردار ، سُہایا=سجایا، سرگردانی=پریشانی، اوڑک= آخر کار ، حریروں = ریشم دے، پرکالے= ٹکڑے کھڈی توں لتھے کپڑے دا خاص ناپ تھان،ساعت=گھڑی ۔ قسمت دا گیڑا، دیواں = دیاں دا،ڈھو= اچھا موقع،