ورقہ 266

4957
مٹھی کس اندر ہڈ بھنے تن من اچویں پالا
کھاون پیون نیندر تائیں ملیا دیس نکالا
4958
بھیت نہ دسدی تے جند جھسدی کر دی اجے سنبھالا
ظالم عشق محمدبخشا پڑدے پاڑن والا
4959
آلی بھولی نوں از غیبوں چِنگ پئی وچ جھولی
گُڈییں کھیڈدڑی سُکھ سوندی آدکھاںہُن رولی
4960
کیکر نال سجن دے ملساں کر کر چنتا ڈولے
درد ابال نہ مٹے محمدایہ ماری جے بولے
4961
آپے پھیر تحمل کر دی دل نوں دے دلیری
کدی تے رب ملاسی سانوں رکھ اوسے دی ڈھیری
4962
صورت ویکھ شزادے والی کردی صفت ودھیری
ویکھو بھیناں کیسی صورت روشن کرے ہنیری
4963
اوّل جس دم باغے اندر شہزادہ سی ڈٹھا
وکیا جیؤ کیتا دل سودا کھول دتا غم چِٹھا
4964
مغز اندر سوداء عشق دا وڑیا سی اس ویلے
مورت ویکھ دوبارے پائیوس بلدی اوپر تیلے
4965
باز عشق دے پنجے مارے عاجز کیتی پھڑ کے
پکڑن سات نہ طاقت چھڈی بولے یا مڑ پھڑکے
4966
شاہزادے دے تل دانے تے مرغ دلے دا آیا
کنڈلاں والی جھنڈ شتابی پھاہیاں لا پھہایا
4967
سُنبل وال پریشاں آہے سیف ملوک جوانے
ویکھ پری چت ہویا پریشاں جیوں قیدی بند خانے
4968
درداں مار نمانی کیتی بھج گئے سبھ چارے
چارے طرفاں کھاون ڈُھکیاں اگ لگی جگ سارے
4969
اندرو اندر جردی آہی گھُٹ لہودے بھردی
دردی سیاں بیدن پچھن بھیت نہ دسے ڈردی
4970
وچو وچ افسوس کریندی ہئے ہئے میں کے کیتا
محبوبے دا حسن ڈٹھا سی جیؤ عشقے کھس لیتا
4971
اوہو اس دا رام پیارا لگّن جس دی آہی
رام ڈِٹھا آرام گوایا وُڑھی کلام الٰہی
4972
آخر تیک نہ چھٹن جو گا جو پھا تھا اس پھاہی
دھاڑو عشق محمد بخشا لْٹے پاہندی راہی
4973
واہ واہ بھاگ نصیب تنہاں دے یار جیہناں تے وکیا
سچے عشق عاشق دے دل نوں پا مہاراں چھِکیا
4974
عاشق اُتے عاشق ہووے جو محبوب ہتیارا
اوڑک بدلہ لئے محمد پر جے کرے سہارا
4975
عاشق کہندے عشق محبت شیشہ ہے روحانی
حال عاشق دیوں دلبر تائیں دسدا کھول نشانی

لفظالی:
مَٹھی کس = ہلکا بخار، پالا= سردی ٹھنڈ، اچویں = بے سکونی تے اضطراب، جند جھسدی= جان ببھُدی اے ، سنبھالا= احتیاط ، از غیبوں= غیب ولوّں، گُڈیئیں= گُڈیاں نال، چنتا= فکر۔ اندیشہ ، ڈھیری= اُمید ، دل دا مرغ آیا= دل آ گیا، جھنڈ= سردے وال، سُنبل =خوشبو دار گھاہ جہدے سِٹے گُندناں میڈھیاں وانگوں ہو ندے نیں، چِت= دل ، چارے = علاج،کھاون ڈُھکیاں = کھاون نوں پیاں، اوہو اس دا رام ۔۔۔۔۔۔= محاورہ اے جاں پرکسی کی لگن ہے واں پر اس کا رام، رام = معبود، چھُٹن جوگا= چھٹن دے قابل، پاندھی= مسافر،وِکیا= آپ دل دے بیٹھا، چِھکیا= کھِچیا، ہتیارا= ظالم ، اوڑک = آخر کار، سہارا= صبر،جیوکھس لیتا= دل کھوہ لیا، وُڑھی = وگی ۔ وَرہی،ہئے ہئے= ہائے ہائے،