ورقہ 267

4976
عاشق نوں از غیبوں دسدا سندر روپ گمانی
کون مجاز محمد بخشا ہر اک سرحقانی
4977
جاں جاں توڑی دھرتی انبر کُرسی عرش مُنارے
لوح قلم تے جنت دوزخ حور فرشتے سارے
4978
تاں تاں تیک نکاح عشق دے نہیں ترٹن ہارے
عاشق تے معشوق محمد دائم نویں پیارے
4979
بدرہ خاتوں ملکہ خاتوں کے ویکھن مُڑ سیاّں
کیسر ورگا رنگ پری دا زلفاں گل وچ پیاّں
4980
منہ کُملانا حال پریشاں شوخیاں بھج گیاں
محرم بید محمد مرضاں ویکھدیاں لبھ لیاں
4981
شایت عشق شزادے والا چڑھیا گھٹاں بناکے
لُٹ لیوس دل شاہ پری دا بدھوس سنگل پاکے
4982
ہولیں ہولیں ملکہ خاتوں پچھن لگی جا کے
بھینے روگ طبیباں کولوں رکھیے نہیں چھپاکے
4983
جے مرضوں چھٹکارا چاہیں دے بیداں ہتھ باہاں
بیدن دس اندر دی ساری دردوں منگ پناہاں
4984
دارو تلخ سیانا دیوے نہ کر وات پچھاہاں
شالہ پھُری علاج محمد خیر تیری میں چاہاں
4985
پیر طبیب اسیں سبھ روگی غفلت مرض لِٹائے
اوسے دے ہتھ دیئیے باہاں ویکھ نبض دُکھ پائے
4986
نشتر مار محبت والی ہفت اندام چھُڈائے
کڈھے لہو غلیظ بدن تھیں شربت صاف پلائے
4987
کام کرو دھوں لوبھ ہنکاروں مِٹھیوں رکھ کرائے
پُھلکا دال غذا الونی اوہ بھی گھٹ کھلائے
4988
نامرادی دی پَھک پھکی کرنا جو فرمائے
ملیاں کامل بید محمد خیر ہوئے دُکھ جائے
4989
ملکہ خاتوں ایس طرح دے جتن کئیںکر تھکی
شاہ پری نے بھیت نہ دسیا مار چھڈی جپھ پکی
4990
عذر بہانے بھیکھ زنانے کر کے گل بھُلائی
اتنے وچ نماشاں ہویاں رات پَون تے آئی
4991
ہر کوئی آپو اپنی جائی جا ارامی ہویا
صاعد چن کھلوتا پاہرو شاہ سورج گُف سویا
4992
کر کٹیاں دے ترنجن نکلے جیوں رل گاون کُڑیاں
کھِڑ کھِڑ ہسّن تے دل کھسن چلن جُڑیاں جُڑیاں
4993
ڈولی تُری چنے دی بن کے گاوندیاں سنگ چلیاں
تر نگڑ بنھ قطار کھلوتے دف بجاون ٹلیاں
4994
قطب مہراج کھلوتا قائم دام درم ورتاون
دو قطبین دوارے اتے گِن گِن خیر دواون

لفظالی:
از غیبوں = اللہ تعالیٰ ولوّں ، گمانی= تکبر بھریا، مہاراج= لاڑا،کُرسی = اٹھویں اسمان تے تخت الٰہی دا مقام، پیارے= پیار وچ ، کیسر = زعفران جہدا رنگ بہت کھٹا پیلا ہوندا اے جورت دے گھاٹے دی نشانی اے، بیدن = روگ ، وات = منہ ، پھُرنا= اثر کرنا، فلکا= سُکی پتلی ہولی روٹی، الونی = لون توں بغیر، کرنا= عمل، خیر ہونا= مکمل صحت ہونا، نماشاں= شام ، جپھ= جپھی، پکی جپھ مار چھڈی= بھیت نوں سینیوں باہر نہ کڈھیا، بھیکھ= بھیس، گُف= انھیری غار،کرکٹی= کونج دی قسم دا اک پنکھی کھتیاں تاریاں دا جھُرمٹ جو چن دے کول بندا اے،ترنگڑ= تاریاں دا اکٹھ بنات النعش Orion،