ورقہ 269

5014
نیند حرام ارام نہ رتی شام پئی بِن شاموں
من کا منکا ہویا شکستہ کد جُڑے بِن شاموں
5015
عشق زوراور تے منہ تانا گھوڑا باجھ لگاموں
راہ کُراہ نہ ویکھ محمد بھجدا جا مقاموں
5016
شاہ پری دل چاہ سجن دی کیتا گھاء بھلیرا
پرتے پاس اوساس مریندی چت اُداس ودھیرا
5017
چِھک پیا دی سون نہ دیندی پئی کلیجے کُنڈی
شاہزادے ول جایا لوڑے لاہ دلے دی گھُنڈی
5018
جیونکر سسیّ کیچ نگر ول سِکدی تھل وچ دھائی
یار ملے بن صبر نہ آوے مشکل سہن جدائی
5019
نرم سراندوسیج پھلاں دی روڑاں وانگر پُڑدی
سول نزول اندر وچ چِھکاں ہر گز اکھ نہ جڑُدی
5020
پلنگھ پلنگ تے سیروں شیروں دسّن کھاون والے
پاوے راکش کھلے چوگٹھے باہیاں ناگ ڈنگالے
5021
دانوں تھیں غم دھاون بہتے اُٹھے ہو اکٹھے
کر دے کم اٹھوہیاں والا دُکھ آئے سُکھ نٹھے
5022
سینے اُتے زلف پریشاں ناگنیان جیؤں ڈنگدی
ہار سنگار نہ بھاوے کوئی خوشی نہ رہیوس انگ دی
5023
ظالم چِھک اندر وچ لگی پلک ارام نہ دیندی
شرم حیا بتیرا ٹھاکے پر حُب زور کریندی
5024
کاری سانگ سجن نے ماری گُجھی رڑک مریندی
ڈل ڈل کر دے نین محمد سرد اوساس بھریندی
5025
اوڑک سیجوں چِھک اُٹھائی عشقے پکڑ بُلاقوں
لے مہار چمن ول ٹریا نکل گیا جیؤ باکوں
5026
ظالم عشق بے ترس قصائی رحم نہیں اس آوے
نازک بدناں مار رُلاندا سم نہیں اس آوے
5027
نازک پیر رکابوں دُکھدے بادشہاں دے بیٹے
جنگل باریں پھرن اواہنے مارے عشق لپیٹے
5028
یوسف نال کیہی اس کیتی جانے سبھ لوکائی
پھیر زلیخا نام شہزادی تختوں سٹ رلائی
5029
بارھاں کوہ گھراں تھیں باہر یوسف دا بند خانہ
پیر پیادی راتو راتیں کھڑدا عشق دیوانہ
5030
کیچ نگر دا راج بھلایا لے کے دیس نکالے
کپڑ پنڈ پُنوں سر چاندا دھوندے پَیندے چھالے
5031
سسیّ نازک بدن شزادی تھل مارو وچ وڑدی
اس ظالم نوں ترس نہ آیا ویکھ پیاسی سڑدی
5032
کام کنور نوں تخت چھڈایوس ہویا جنگل دا واسی
سر پیراں تک حال شکستہ اجے بھی چِت اُداسی

لفظالی:
شام پئی بن شاموں= محبوب دے بغیر یعنی محبوب نوں اڈیکدیاں ہویاں شام پئی گئی، شام= ٹ ک تفصیلاں ، کد جڑے= سری کرشن جی دی سکھی دا ہار ٹٹ گیا سی تے شام سندر نے جوڑ دتاسی ، منکا= قیمتی موتی زمرد، منہ تانا= منہ ترانا۔ منہ زور بے قابو، کُراہ = پُٹھا راہ ، مقاموں = ہر مقام توں اگانہہ لنگھدا جا ، گھائ= گھاء ۔ پھٹ۔ زخم، اوساس مارنا= ٹھنڈیاں آہیں بھرنا، گھُنڈی = گنڈھ ۔ ناراضگی، سیج = چھیج ۔ بستر، پُڑنا= چُبھنا۔ سیروں = پلنگھ دے سر والے پاسے دی لمی لکڑ ،پلنگ = چیتا ، ڈنگالے= ڈنگ مارن والے بشئیر، دانون = پلنگھ دی پواندی کسن والی رسی، انگ = سریر دا کوئی حصہ ، بلاق=ناساں دے وچلے پردے نوںونھن والی نتھلی جہدے وچ اک موتی ہوندا اے، باک = واک ۔ کہنا حُکم، اواہنے = ننگی پیریں ، کام کنور = مشہور عاشق کام سروپ جہیڑا سر اندیپ دی شہزادی کام لتا نوں ویاہون وچ کامیاب ہو گیا سی،