ورقہ 270

5033
بے نظیر وطن تھیں کھڑیا قید دیواں دی پایا
نجم نساء بناکے جوگی جنگل قاف کُہایا
5034
نونہال حسن دے باغوں خوب جوان پٹوئی
منگدا خیر سجّن دے نگروں لاہ شرم دی لوئی
5035
پورن بھگت مُلک دا راجہ بھوہرے اندر پلیا
لِنگ کپائے کن پڑائے بِھیکھ منگیندا چلیا
5036
گوپی چند گیا چھڈ دولت مایا مال خزانے
پکڑ رومال گدا کریندا ہر بوہے ہر خانے
5037
خوب شکل فرہاد شہزادہ والی چین شہر دا
تیشہ پکڑ پہاڑ کپیندا دھن اوئے عشقا مردا
5038
عزّت بیگ سوداگر لاکھی دانشمند وزیروں
مال چُگاندا بالن چاندا کرے کباب سریروں
5039
اک اکلّی نار بچاری سوہنی تری چنہاواں
رُڑھدی ویکھ اس رحم نہ آیا پھڑکے بنےّ لاواں
5040
رانجھا تخت ہزارے والا مائی باپ لڈکاّ
بھائیاں دا سردار پیارا چودھریاں دا ٹِکاّ
5041
جا سیالیں چاک سدایا چالیا دُکھ کھارا
دُھپاّں پالے کپرّ جالے کر دا سخت سہارا
5042
ہِیر سیالیں لاڈیں پالی چوچک باپ امیرے
راتیں کالی ماہی بھالے بن جنگل جھل چیرے
5043
ریشم پیر سلّن دبھّ سوُلاں جیوں سوُئی پٹ لیرے
رانجھے پاڑے کن محمد ناگ لڑایا ہیرے
5044
اوراں دی کے گنتر کرنی سیف ملوکے ہوندے
کے کُجھ عشق سہایا اس نوںپتھر بھی سُن روندے
5045
اوہو عشق پری ول آیا لے ہتھیار تمامی
کیکر سیج اُتے انگ لائے چائی بے ارامی
5046
چوری اٹھ ٹری ول باغے کیڑ نہ کیتی کسے
عشقے صبرچلایا کہندی کیویں دلبر دِسّے
5047
پیر پیادی چُپ چپاتی باغے اندر آئی
چُھپ نظارہ کرے حسن دا چوری دی اشنائی
5048
کے تکدی شاہزادہ اگے بیٹھا اک اکلاّ
بلدی شمع پتنگ جلیندے عشق کھڑی کر ہلاّ
5049
پیندا بیٹھ شراب شہزادہ پھڑیاہتھ پیالا
لوہو دل دے وانگر سوُہا صاف شراب اُجالا
5050
کاسہ مست تلی پر رکھے کر بھر پور شرابوں
گاوے گاون درد فراقوں تار ہلا ربابوں
5051
لمیّ رات وچھوڑے والی پل جھل سکھیاں بھانے
جے کوئی قید عشق دے اندر قدر اوہو کجھ جانے

لفظالی:
بے نظیر = ٹ ک تفصیلاں ، نونہال= ٹ ک تفصیلاں ، پورن بھگت = سیالکوٹ دے راجے سالباہن دا پتر باراں سال بھوہرے اندر پلیا تاں جو اوہنوں کوئی منحوس نظر نہ لگے ۔ اوہدی مترئی ماں لُونا اوہدے روپ تے وک گئی تے اونہوں اپنی چھیچ تے چڑھن لئی پریر یا پورن نے صدق نہ ہاریا لونا نے اوہدے اُتّے الزا م لایا پئی پورن نے میری عزت نوں ہتھ پایااے راجے نے اوہدے لِنگ کپاکے انھے کھوہ وچ سٹایا تے گورو نے پورن نوں بھگت بنایا تے بھیکھ منگن واسطے گھل دتا ۔ آخر لونا وی بد نیتی ظاہر ہوئی تے راجے لونا نوں معاف کر دتا گیا، گوپی چند= ایہہ راجا تخت چھڈکے فقیر ہو گیا سی،فرہاد = شیریں دا عاشق، عزت بیگ= مہینوال دا اصل ناں، کاسہ = پیالا، لڈکا= لاڈلا ، ٹکا = متھے د ی سجاوٹ دا گہنا، کھارا= ٹوکرا، کیڑ= آہٹ، اُجالا= شفاف، جنگل قاف کہایا= جنگلاں پہاڑاں وچ مارو سفرکرایا