ورقہ 270

5052
کدے کدے ایہہ دوہڑے آکھے درد و چھوڑے چایا
شاہزادے دے مونہوں ہو کے چاہیے سخن سنایا
5053
میں پردیسی نوں اج آئے شالہ رات کرم دی
یار سجن دے کوچے اندر جال ہوئے ہر دم دی
5054
دل وچ چاہ نگاہ کر ویکھاں صورت اصل صنم دی
دلبر نوں جا کہے محمد کون خبر اس غم دی
5055
زلفاں منہ اوہدے دی حرصوں ایہ جیوڑا بے چارہ
کفروں فارغ تے اسلاموں بیٹھا پکڑ کنارا
5056
دل آرام ارام دلے دا کھڑیائے لُٹ سارا
شالہ کدے ارام دیوے گا مِل کے یار پیارا
5057
باغ بہاراں تے گلزاراں بن یاراں کس کاری
یار ملے دُکھ جان ہزاراں شکر کہاں لکھ واری
5058
اُچی جائی نیونہہ لگایا بنی مصیبت بھاری
یاراں باجھ محمد بخشا کون کرے غمخواری
5059
غم بہتے غمخوار نہ کوئی گِن گِن دسّاں کیں نوں
جس دے پچھے جرم گُمایا مکھ نہ دسیوس میں نوں
5060
جے کجھ باب میرے دُکھ کر دے ہے کے خبر کُسے نوں
سوئیو جانے قدر محمد تن من لگدی جے نوں
5061
ڈٹھے باجھ پریت لگائی ہو گیا جس ہونا
ہسن کھیڈن یاد نہ مینوں پیا عمردا رونا
5062
دلبر مکھ وکھاندا ناہیں داغ میرا کس دھونا
ساجن دا در چھوڑ محمد کیں در جا کھلونا
5063
اپنے آپ لگائی یاری یار کہاں دلبر نوں
بے پرواہ تراما گِندے ایس اساڈے زر نوں
5064
سورج دی اشنائیوں کے کُجھ لدھا نیلو فر نوں
اُڈ اُڈ موئے چکور محمد سار نہ یار قمر نوں
5065
شاہ پری دی چاہ میرے دل راہ تکاں ہر ویلے
مت رب سچا مہریں آوے یار میرے سنگ میلے
5066
پاشطرنج محبت والا سِر سِر بازی کھیلے
ویکھ دیدار محمد سردھڑ واردئےے اُس ویلے
5067
ایسے طرح شہزادہ کردا درد منداں دے جھیڑے
کاسہ لے شرابوں بھریا جاں کھڑدا منہ نیڑے
5068
کہندا شاہ پری اج ہوندی ایہ کاسہ اوہ پیندی
میرے نال کریندی گلاں جاں مستانی تھیندی
5069
ایہ پیالا دارو والا پی دُکھیارا تھیساں
کر کر یاد بدیع جمالے پیساں جاں جاں جیساں
5070
ایسے طرح پیالے پیتے مغز چڑھی آ گرمی
تپ تندور ہویا اندرونہ جاگی آتش جرمی

لفظالی:
شالہ= اللہ کر ے، جال= گزاراں، دل ارام = محبوب نے، جَرم گوانا= خاندانی وقار دا لحاظ نہ کرنا اپنے آپ نوں declass کرنا، میرے باب=میرے نال، چاہ= چاہت ' خواہش، کفروںفارغ= کفر وچ شمار نہیں ،اسلاموں کنارا= اسلاموںباہر اے، جائی = تھاں تے، زرنوں تراما گِندے نیں = ساڈے سونے نوں تانبا آکھ کے ساڈی نیت خلوص تے شک کردے نیں، چکور= اوہ پنچھی اے جیہڑا اُڈاُڈ کے چن تائیں اپڑن دا ناکام جتن کردا رہندااے پر چن نوں اوہدی محبت دی کوئی خبر نہیں ہوندی اجیہی اک پاسی محبت نوں حُب آکھدے نیں ،نیلو فر= کنول ۔ کُمیاں دا پھُل جیہڑا صرف سورج نوں ای اُڈیکدا رہندا اے نہیں تے منہ لپیٹ کے پیا رہندا اے، سر سر بازی کھیلنا= جھوٹھا ہوون یا ہارن دی صورت وچ سر لُہان لئی تیار ہوونا، دارو=علاج، دُکھیارا تھیساں= ہوری وی دُکھیا ہوواں گا،جے= جو۔ جِس،