ورقہ 276

5159
اسیں تسانوں سِکدے سجنا! تدھ نہیں دل سِکدا
آن کھلے در تیرے اُتے کیوں خالی مُڑ چِکدا
5160
جے تلوار میرے سر ماریں ڈھال نہ رکھساں اگے
مت تیرے اعمالنامے وچ نام میرا بھی لگے
5161
جس دے عشق لتاڑ گُمایا خاکو نال رلایا
قدم چُماں گا عُذر کراں گا جے اوہ نظری آیا
5162
میں اوہ عاشق کچا ناہیں ظلم تکاں بھج جاواں
جان منگیں تاں حاضر کرساں نہ کجھ عذر لیاواں
5163
خوش بخوش رہاں جے رکھیں کدی بیزار نہ تھیندا
در تیرے دی خاک نمانا پیراں ہیٹھ ملیندا
5164
اسدا بھی نت فکر اندیشہ مت کوئی بُرا ولوہنا
چا ایتھوں کھڑسُٹے کدھرے پھیر اس دا کے کھوہنا
5165
عشق نہیں ہو چکا تھوڑا سہیا وچھوڑا لما
دے دیدار تے پال بندے نوں چاکر ہاں بِن دمّاں
5166
ہر کوئی عیش عمر دی کردا آپو اپنی جائی
میں دکھیارا دُکھاں جوگا دائم بھاء جدائی
5167
جاں ایہ بول غماندے بولے سیف ملوک بتیرے
شاہ پری نوں رہی نہ طاقت پرت ٹُری ول ڈیرے
5168
پھُرنا کِریا تے سر پھریا جوش طبیعت چایا
پرت ٹری گھر پہنچاں کیویں رکھیں شرم خدایا
5169
کھا گئے اوہ بول کلیجہ ڈولی مُول نہ بولی
شاہزادے دی صورت مُٹھی آ دُکھاں جند رولی
5170
طاقت تران نہ رہی آ جُثے مُٹھی مُٹھی نٹھی
اوڑک گِردی کھا اگیرے باغ اوسے وچ ڈھہٹھی
5171
ساس اُداس اُڈن پر آئے ہوش گئی اُڈ ساری
اکھیں تاڑے لگیاں رہیاں نظر سجن ول دھاری
5172
دھوڑ و دھوڑ ہوئے رخسارے نین بھرے سنگ مٹی
ساوی پیلی ہوئی آ دیہی چنبے کلیوں چٹیّ
5173
کالی زلف رُلی وچ گھٹے ناگ جویں ادھ مویا
لوہو پانی رلیا ملیا نیر اکھیں تھیں چویا
5174
کُٹھے وانگ کبوتر پئی آسرت سنبھال نہ کوئی
نازک دیہی تڑف تڑف کے زخمی زخمی ہوئی
5175
بھُل گئے اوہ شان تکبّر جان چلی ہو راہی
وانگ شہید رہے وچ پِڑدے تیغ عشق تن واہی
5176
آب گئی کجھ تاب نہ رہیوس زرد ہویا رنگ پیلا
شاہزادے نوں خبر پچاون آیا عشق وسیلہ
5177
عاشق کامل مرد اللہ دے خاصے لوک حضوری
ظاہرآکھ سناندے بھائی ایہہ گل پکی پوری

لفظالی:
سِکنا= اُڈیک وچ تڑفنا، چِکنا= طاقت ور ت کے دُور نسانا، مت= شائد،عذر کرنا= معافی منگنا، ولوہنا= گرد باد۔ واورولا۔ بگولا، چا = چک کے ، بے دماں= بن تنخواہوں، بھائ= بھاگاںوچ، پھُرنا کِریا= دل گھٹیا ۔ کلیجا بیٹھیا، کھا گئے اوہ بول= بولاں نے چوکھا اثر کیتا، ڈولی= ڈول گئی ۔ اندر وں ہل گئی، مُٹھی= دھوکھے نال لُٹی گئی، گردی کھانا= بھوانٹلی چکر آونا، اکھیں تاڑے لگنا=اکھاں جھمکیاں بغیر لگاتار نگاہاں دے مرکز ول ویکھدیاں رہنا، دھارنا= مستقل طورتے اختیار کرنا،سنگ=نال، کُٹھے= تکبیرنال ۔ حلال کیتے، کوہے ، پِڑ= میدان ، آب=چمک دمک، تاب= وٹ ، وسیلہ= وکیل وچولا، لوہو پانی رلیا ملیا ہوونا=لہو پانی ورگا پتلا ہوکے ہومو گلوبن گھٹ جانا، حضوری لوک= ہر ویلے حاضری وچ رہن والے لوک،