ورقہ 277

5178
دل مومن دا شےشہ بنیا اک دوئے دے کارن
پر جے سان عشق دی دھرکے خوب زنگاراُ تارن
5179
نور یقینوں روشن ہووے چمکے نال صفائی
صِقل ہوئے تاں سبھ کجھ دِسے نظر کرے ہر جائی
5180
گگن پتال نہ چھپن دیندا چیز تکے ہر ول دی
دُور بین انگریزی لاکھاں اس اک نال نہ رلدی
5181
دلبر نوں کوئی تنگی پہنچے عاشق دا دل کھُسدا
توڑے سے کوہاں پر ہووے پتہ نیاوے اُس دا
5182
حضرت مہتر یوسف تائیں جاں کھوہ سُٹیا بھائیاں
مصرے وچ زلیخا بی بی پِیڑاں عشق ہلائیاں
5183
چیر سریر کباب بنایا مہینوال چنگیرا
سوہنی نے بِن دسیاں جاتا ایہ عاشق دا بیرا
5184
سسیّ موئی تھلاں وچ تسیّ بھاہ غماں دی سڑکے
پُنوں موڑ لیاندا عشقے کیچم کولوں پھڑکے
5185
رانجھے نے جد کن پڑائے جھلیّ دُکھ قہاری
رنگ پورے وچ ہیر سیالے لگ گئی بیماری
5186
لیلاں لہو چھڈایا گھر وچ یار نہ ڈٹھا وگدا
وچ پہاڑاں مجنوں تائیں لہو چُھٹا اُس رگ دا
5187
سیف ملوک پری دے عشقے کیتا سی مستانہ
اُتوں پیتے مدھ پیالے ہویا مثل دیوانہ
5188
گاؤندیاں چِت ہویا اُداسی لگی چِھک سجن دی
کاہلا پے کے اُٹھ کھلوتا لین ہوا چمن دی
5189
اکھیں بلن چراغاں وانگر پھردا مست دیوانہ
جھُلی واء سجن دے پاروں آن دتوس پروانہ
5190
ہر ہر چوک عراق تکیندا پھردا سی شاہزادہ
مغز چڑھی خوشبو پری دی لگی چِھک زیادہ
5191
زلف پری دی مشک خُتن دی دُھم گئی ہر پاسے
گل پھُل باغ بغیچے سارے مل لئے اس باسے
5192
وقت بہار چمن وچ رونق ہر بُوٹے ہر گُل دی
نرم نسیم محبت والی خُوب معّطر جھُلدی
5193
سبزہ تیز زبان تریلوں کردا دُر فشانی
نعمت کولوں ہریا بھریا کہندا حمد رباّنی
5194
رُکھ تونگر نال دِرم دے چھتر چڑھے فیروزے
حمد ثناء الٰہی آکھن آہلنیاں وچ بوزے
5195
بوٹا ویل تمامی ہریا پھُلاں رنگ ہزاراں
گاون بھور سنواں لگاون مثل طنبور ستاراں
5196
چنوں چودھیں رات نورانی چن سرے پر آیا
روشن عید دہاڑے نالوں جُمل جہان سُہایا

لفظالی:
کارن= لئی ، شیشہ= آینہ' آہنہ )پہلاں لوہے دا بنیا ہوندا سی(، صقل ہونا= زنگار لاہ کے پالش ہونا کدورت توں صاف ہو نا، ول = طرف، لاکھاں=لکھاںای، بیرا=گوشت قیمے دی کنی، بھاہ= اگ، پتال = پاتال تخت الثریٰ انتہائی تھلے دی حصے دی دھرتی، رنگ پورا= کھیڑیاں دا پنڈ ہیر دے ساہورے، مدھ = شراب، چھِک = کھِچ، عراق= دریا کنڈھے رونق داربستی، سجن دے پاروں پروانہ آن دتوس= ہوا نے سجن ولوّں رقعہ لیا دتوسو، باسے=باس نے، در افشانی کرنا= موتی سُٹنا ۔ قطرے ڈیگنا، چھتر= وڈی چھتری کینوپی، بوزے= لمی ڈنگی چُنج والا پنکھی، فیروزہ= نیلگوں قیمتی پتھر Turquoise، سنواں لگاون= سمان بنھن ،جُمل جہاں سُہایا= سارا جگ سجایا پھبایا،