ورقہ 281

5255
سر پیراں تک چادر تانی انگل رہی نہ باندی
شرم کنوں پس پردے ہوکے عاشق نوں فرماندی
5256
کون کوئی توں کتھوں آئیوں صورتمندجوانا
شیر دلیر بہادر سوہنا دسیں روپ یگانہ
5257
کے اشنائی تیری میری بیٹھوں آن سرہاندی
نا محرم نوں ہتھ لگاویں انت کہی تدھ آندی
5258
لئیں پیار پری دے موہوں ہوکے آدم زادہ
کتھوں شوخی تے گستاخی ِسکھی آ ایڈ زیادہ
5259
سر میرا تُدھ جھولی دھریا لئیں کلاوے دیہی
انگ ملاندا سنگیں ناہیں ایڈ بے شرمی کیہی
5260
نہ تدھ خوف خدا دا آوے نہ کجھ سہم شہاں دا
باپ میرا سلطان دیواں دا شاہنشاہ کہاندا
5261
جے اک ذرہ خبر اس گل دی دیو پری کوئی پاوے
بوٹی بوٹی کرکے تینوں وانگ کباباں کھاوے
5262
جھڑک پری دی سُن شہزادہ عرض کریندا روکے
بہت نمانا درد رنجانا ہینا جیہا ہوکے
5263
ہے محبوب میرے دل جانی اکھیں دی رُشنائی
دل جانی دا جان دلے دی تدھ بن ہور نہ کائی
5264
امن قرار دلے دا تو ہیں عمر حیاتی میری
تو ہیں موج جوانی والی عیش خوشی سبھ تیری
5265
توہیں دین ایمان بندے دا توہیں لطف الٰہی
تو ہیں طاقت نین پراناں توہیں دنیا شاہی
5266
ہوش سنبھالا عقل دانائی فہم طبعیت میری
صورت پاک تیری ہے بی بی سخن جمعیت میری
5267
گھُنڈ اُتاریں درسن دسیں مکھ توں پلا لاہیں
تاں میں نال تیرے دوباتاں کرساں جے اوہ چاہیں
5268
شاہ پری نے کہیا اگوں نہ کر ایڈ دلیری
میں پری توں آدم زادہ کے گل میری تیری
5269
نا محرم نوں منہ نہ دساں ہوش سنبھالے ہوندے
نال میرے کے مطلب تیرا نین دسالیں روندے
5270
جنس رلی رل گلاں کر دی نا جنساں کے گلاں
میں ناری توں خاکی بندہ نال تیرے کیوں رلاں
5271
سیف ملوک کہیا نہیں کیتی میں کوئی مفت دلیری
جس دم جان لباں پر آئی نال محبت تیری
5272
شرم حیا پرہیز نہ رہیم نہ کوئی خوف کہیندا
سرورتی تاں جانے بی بی کیونکر دُکھ سہیندا
5273
آدم پریاں کس بنائے ہکو سِرجنہارا
حسن عشق دا نام لکھائیوس نور اِکو مُنڈھ سارا

لفظالی:
باندی=واندی۔ ننگی ۔ ظاہر،یگانہ=منفرد۔نویکلا،انت لیاونا=آخر چُکنا،دیہی کلاوے لینا= سریر نوں دوہاں ہتھاں نال گھٹ کے جپھی پانا، انگ ملانا =سریر دے کسے حصے نوں مخالف جنس دے کسے حِصے نال ملانا ایہدے وچ اکھ توں لے کے کوئی وی انگ شامل اے ،ہینا =ادنیٰ۔عاجزنمانا، دردر نجانا=پریم پیڑدا دکھیا،لطف الٰہی =رب دی مہربانی ،نین پراناں دی طاقت=اکھاں تے دوسرے انگاں دی سکت،سنبھالا=)شعور ادراک دی قائمی ، جمعیت=دل دا سکون، ہوش سنبھالے ہوندے=بقائمی ہوش وحواس ،دسالیں =دکھاویں،نہ رہم=مینوں نہیں رہیا، کہیندا=کسے دا ،سرورتی=ہڈیں وا پری ،دکھ کیونکر سہیندا= دکھ کویں سہیا جاندا اے،سر جنہارا=خالق