ورقہ 283

5293
شاہ کہے منہ لگن والا ایہو ویلا تیرا
دامن پاک سجن سنگ ملیےئ لگے نیونہہ پکیرا
5294
پری کہے نیونہہ لاون اوکھا پریاں نال تسانوں
اُڈ جائیے پھر ہتھ نہ آئیے کون ملے مُڑ سانوں
5295
شاہ کہے نیوں اُچی جائی لاندے نہ شرمائیے
جے ملیا تاں واہ بھلیرا نہیں سِکدے مر جائیے
5296
پری کہے چھڈ کھہڑا میرا اُٹھ جا جدھروں آئیوں
پردہ ستر اُٹھایا لوڑیں کس شامت نے چائیوں
5297
شامت عشق تیرے دی چایا تاں اس جائی آیا
کِت ول جاواں تیرے پچھے پچھلا جرم گُمایا
5298
جو ملکہ دی مائی تینوں مٹھا ددّھ پلایا
قسم تینوں اس دُدّھے بی بی سُن میرا فرمایا
5299
گل میری سن ساری پوری کن دلے دے دھرکے
نہیں رہیا ہن زور جرن دا بول پیا تد مر کے
5300
کہیا بدیع جمال پری نے قسم کیتی تدھ بھاری
دس اسانوں کے گل تیری چاسُنساں اک واری
5301
شاہزادے پھر حال حقیقت مڈھوں پکڑ کہانی
آخر توڑی سبھ سنائی جو اس نال وہانی
5302
سُن کیفیت شاہ پری نے صاف جواب سنایا
تیرا میرا ملنا مشکل کس روا فرمایا
5303
میں پری توں آدم زادہ کد ایہ نسبت ہوئی
اگلی مدت وچ اوہناں دے ساک نہ ہویا کوئی
5304
جیہڑے ساک نہ ہوے اگے اج کوئی کد کردا
قوموں باہر نہ ناتا دیندا خواہ ہوے کوئی مردا
5305
لنگ لو کیک سبھی کوئی رکھدا چوہڑا موچی باتل
رہی گئی نوں ہر کوئی جانے سبھ لوڑے حق باطل
5306
کمیں اتے کنگال کمینے ایہ گل کہیں نہ بھاوے
دھی چوہڑے دی سید منگے پھر دیندا شرماوے
5307
نیچاں دے گھر اُوچ وڈیرے ناتے کیتے لوڑن
وس لگدے کد دیندے میاں توڑے گھر در چھوڑن
5308
آدمیاں تھیں اوچ کہاون پریاں ٹبر ناری
ناری دی اشنائی جا کر چھوڑ پری دی یاری
5309
پریاں تھیں کے حاصل تینوں جو ہتھ آون ناہیں
بے وفا کمینہ آدم چِت لیاون ناہیں
5310
بے وفائی کم تساڈا پریاں لوک وفائی
بے قدراں دی اُلفت مندی نیچاں دی اشنائی
5311
نیچاں دی اشنائی وچوں کسے نہیں پھل پایا
کِکّر تے انگور چڑھایا ہر گُچھا زخمایا

لفظالی:
منہ لگنا= منہ نال چھوہیا جانا ، سنگ= نال،نیونہہ= عشق،پکیرا= ودھیرا پکا،سِکدے = ملن دی اڈیک وچ تڑفدے، کھہڑا= رستہ ۔ پِچھا، اٹھایا لوڑیں=چُکیا چاہنا ایں ، شامت = بدنصیبی، چائیوں = چُکیا ۔ اُبھاریا۔ اُکسایا، جرم گوایا= خاندانی عزت وقار نوں چھڈ بہنا، وہانی = بیتی گذری، لنگ=اپنی ذات ولوں آئی شرم۔ حیا۔ لج، لوکیک= لوک لجیا۔ لوکائی توں شرم، روا= جائز، باتل = خانہ بدوش۔ پکھی واس، چھج بانھے۔ برڑ، رہی گئی=لتھی چڑھی ۔ اپنی عزت بے عزتی دا احساس،اُوچ = سپیریر۔ اعلیٰ درجے دا، ناری = (١)اگ توں پیدا ہوئی مخلوق (٢) خاکی عورت ۔ عام آدم زادی، ٹبر = خاندان،چِت لیاون = خاطر تلے لانا، لوک وفائی = وفادار قوم،اگلی مُدّت= بیتے سمے وچ،