ورقہ 284

5312
واؤ جُھلّے تاں پتر پاٹے نالے سَلے دانے
چوئی رس زمیں پر ڈھٹھی کِت گُن کٹھے لانے
5313
کالے بھور اشنائی کر دے مِلن پھُلاں دے تائیں
اک ڈِٹھا پھر دوجے تریجے لیندے پھرن ہوائیں
5314
یاری سچ پتنگاں والی شمع بلی آ چُکے
پھیر نہ کدھرے جاون جوگے لاٹ اندر سڑ مکے
5315
آدم بے وفا ہمیشہ اوّل نیونہہ لگاون
زُور کماون دلبر پاون جھبدے ہی رج جاون
5316
اِک چکھن دل نال نہ رکھن پھر اس نوں سٹ پاندے
دوجا ہور پسندے کر کے مگر اوہدے اُٹھ دھاندے
5317
جاں اوہ ملے محبت کر کے لنگھے کوئی دیہاڑا
بیہا کر کے منوں اُتارن پان ہوری نوں بھاڑا
5318
سَے سختی سَے رنج مصیبت جھاگ مِلن دلبر نوں
وِس پوے تاں رجن جلدی جانن نہیں قدر نوں
5319
آدمیاں دی یاری ایسی میں ایتھوں کے لینا
کاہنوں لا پریت دھنگانے جال مچھی ونج پینا
5320
دوجا مائی بابل میرا کد ایہہ گل منیندے
آدم زاد بے دیسی تائیں بیٹی اپنی دیندے
5321
جے اک ذرہ خبر اس گل دی پہنچے کن اوہناں دے
پل وچ مار گواون مینوں ڈاہڈے ظن اُنہاں دے
5322
دوجی جو گل تدھ فرمائی عشق محبت والی
رنج مصیبت دسیں جیہڑی مشکل سخت محالی
5323
اوہ بھی مینوں خبر نہ کوئی جھوٹھ کہیں یا سچی
کجھ اعتبار یقین نہ آوے پکی یا گل کچی
5324
تریجا ایہ بھی معلم ناہیں بے وفائی کرسیں
یا میں نال ہوویں گا چنگا عشق کماندا مرسیں
5325
آدمیاں دا عشق محبت قول اقرار زبانی
اِچرک توڑی نال نباہو جاں جاں نویں جوانی
5326
جاں کوئی روز گزارن کٹھے کرن پریت پُرانی
جوش وڈا تے گھاٹا وہلا جیوں کر ہڑھ دا پانی
5327
شاہپری ایہ گلاں کر کے عاشق نوں تمچائے
چلدے گھوڑے نوں جڑ چابک تا اوہدا ازمائے
5328
اندر عشق شزادے والا پیا وگاوے چھُریاں
عشق اوہدا ازمایا لوڑے کر کر رمزاں بُریاں
5329
دل وچ صبر قرار نہ آپوں شاہزادے پر مردی
عشق چھپائے یار ازمائے دھن ناری دی مردی
5330
کئیں طرح دے بولی طعنے شاہزادے نوں مارے
شربت نیونہہ پکایا لوڑے ماری عشق ازارے

لفظالی:
کِت گُن = کیہ فائدہ، ہوائیں لیندے پھرنا= خوشبواں سُنگھدے پھرنا ، زُور کماون = دھوکھا کرن ، دھنگانے= خواہ مخواہ، اُٹھ دھاندے=اُٹھ نسدے نیں ، بھاڑا = خوش کرن پسماون خاطر پیش کیتی گئی کوئی شے۔ کرایہ ۔ ورتن دا معاوضہ، بدیسی =پردیسی ، ظن = شک، محالی=محال، عشق کمانا= نیونہ لگاون دے سارے تقاضے پورے کرنا، اِچرک= اینا کُوچر، نباہو= نباہ کرن والے، وہلا=چھیتی چھیتی ۔ جھبدے۔ جلدی جلدی، ناری دی مردی=عورت دا مردانہ پن، تاء = چال دا جوش ، تمچانا= تا مچاؤنا ۔ شوق نوں تیز کرنا ، عشق ازارے= پریم دے روگ نے،وِس پوے=اعتماد کر لوے،