ورقہ 285

5331
چاٹ سلونی عشق چٹائے دلوں شہزادہ مِٹھا
تلخ جواب ترش رو کردی پِھکا جاوے ڈِٹھا
5332
شاہپری ایہ گلاں کر دی سیف ملوک حیرانی
نموّں جھان زمیںول ویکھے فکر پیا دل جانی
5333
دھرت پھرولے موہوں نہ بولے ہنجوں بھر بھر رووے
اکھ چُرا پری ول تکے جاں کوئی ویلا ہووے
5334
دیدے گِریاں تے دل بِریاں منہ پلچھی جِبھ سُکی
شایئت جیہڑی سُجھدی آہی آن اوہو گل ڈُھکی
5335
دلبر مینوں مُنہ نہ لاندا عشق پسند نہ کردا
کھُوہ پئی سبھ کیتی کرتی سکہّ بنیا زر دا
5336
آپ دلوں میں پورے کیتے حق محبت والے
لکھ میری اک ککھ نہ لتھی لعل بنے وٹ کالے
5337
آسے آسے عمر گذاری جھلےّ خار ہزاراں
مالی باغ نہ ویکھن دیندا آئیاں جدوں بہاراں
5338
روڑا قہر کلور سرے تے سڑدے بیج رلایا
گڑے گُمایا کھیت محمد جس دن ساون آیا
5339
ایہ دلیلاں کر شاہزادے اوڑک آسر چایا
نا امید جہانوں ہو کے مرن اُتے دل لایا
5340
شاہپری نوں آکھن لگا رتو بھر بھر روکے
ہو بے آس اوساس چلاکے جیون توں ہتھ دھوکے
534
ہے محبوب میرے دل جانی نہ کر ایڈ بے ترسی
اجے محبت میری نِندیں رب عدالت کرسی
5342
میں عاجز نا طاقت بندہ وانگن حال خراباں
ڈاہڈے نال سلوتر کیہی لائق نہیں جواباں
5343
مورت ویکھ اندر وچ تپیا عشق تیرے دا آرن
چوداں برس ہوئے گھر چھڈے صورت ویکھن کارن
5344
دولت مال خزانے چھڈے تاج تخت سلطانی
ماپے لشکر بھیناں بھائی دوست یار جہانی
5345
عشق تیرے دے رستے اُتّے ثابت قدم ٹکایا
دنیا تے مَا فِیہَا کولوں چِت چروکا چایا
5346
بِن دیدار تیرے تھیں مینوں حرص نہیں کوئی آہی
شمع جمال تیری پر پُہتا مثل پتنگ سپاہی
5347
شکر الحمد شماروں باہر پاک خداوند تائیں
صورت تیری دَسےّ باجھوں جان نہ کڈھی سائیں
5348
رُڑھے جہاز سمندر اندر ڈُبّا میرا ڈیرا
اوتھوں بھی رب رکھیا مینوں تکنا سی منہ تیرا
5349
پھر زنگیاں دی قیدوں کڈھیا آپ خداوند سچے
سگساراں دی شامت کولوں صحیح سلامت بچے

لفظالی:
چاٹ سلونی=عاشق معشوق اک دوجے دیاں کھٹیاں مٹھیاں گلاں سن کے سواد لیندے نیں گلے شکوے وی کسے پیارے نال ای کیتے جاندے نیں ، تلخ جواب۔۔۔۔۔۔= عشق وچ کوڑا جواب تے کھٹا مِٹھابنا لیندی سی پر سرد مہری والا پھکا جواب تے جھلیا ای جا سکدا اے، نمو جھان= چوکھا آزردہ ہو کے سر تھلے سُٹ کے نیم جان ہو کے ، دیدے گریاں = اکھاں روندیاں، دل بِریاں = دل غم وچ بھُج رہیا سی، منہ پلچھی= پسینے تے اتھرواں دا پانی لوُنا ہوندا اے جیہڑا چہرے تے جم جاوے اوتھے چٹی جہی تہ جم جاندی اے اجیہی پلچھی دے تیلے اُتے وی ہوندی اے، شائت= شاید ہو سکدا اے، کیتی کرتی= پچھلے سارے چنگے عمل تے قربانیاں، لکھ میر اک ککھ۔۔۔۔۔۔= میری دلوں کیتی لکھ محنت دا مُل اک ککھ وی نہ پیا ، وٹ کالے= کالے وٹے پتھر کالے کولے، روڑا قہردی= خشک سالی، اوڑک = آخر کار، اوساس چلانا= ٹھنڈے ساہ لینا ۔ ہوکے بھرنا، مافیہا = جو کجھ اوہدے وچ ہے،چِت چانا= دل چُک لینا بے تعلقی کرنا۔ اداسی ہونا، آرن= لوہا ر دی بھٹھی،