ورقہ 287

5369
جے سجنا! توں ہس ہس ملدوں ہو جاندوں اتفاقی
تاں مینوں بھی چنگا لگدا جگ پر جیون باقی
5370
توں مُنہ کج اساں تھیں سُتوں نسیں پرے پریتوں
مینوں مرن بھلا اس عمروں شالہ جُگ جُگ جی توں
5371
ناقص عشق بندے دا تینوں ذرا پسند نہ آیا
بے اعتبارا نام دھرایا بے وفا کہایا
5372
اساں جیہاں دے منہ لگن تھیں تینوں شہرت آوے
ایہو جیہا رب بنایا چنگا کون بناوے
5373
مورت ویکھ وفایرانہ ایہہ کجھ میں تھیں ہویا
صورت ویکھ نہ کِرساںاگوں کے تدھ ہُٹّرڈھویا
5374
دنیا اُتےّ جیون میرا ہر گز کسے نہ کاری
توں مطلوب دلے دا ہے سیںتدھ نہ کیتی یاری
5375
یاری عمر سنواری میری آپ پریت نہ ہاری
جس نیتی سنگ نیتی آہی اوہو نماز گذاری
5376
لے لیا جو لینا آہا لِکھیا وچ نصیباں
بے پرواہاں نال محمدزور نہ اساں غریباں
5377
دنیا اُتے آون میرا یاری کارن تیری
جس کم آئیوس ہوندا ناہیں اس تھیں قبربھلیری
5378
یاری اندر عمر گذاری ویکھ لئیں اک واری
اینہیںاکھیں تینوں ڈِٹھا ہور نہ ویکھن کاری
5379
درسن لے کے جان وُچھنے پُنے آس ہماری
تیرے کول محمدبخشمرساں کھا کٹاری
5380
آخر تیک نہ ٹٹسی تاں بھی عشق میرے دا رشتہ
دفتر تیرے وچ لکھے گا گردن خون فرشتہ
5381
جاں رب سچا قاضی ہوسی آپ عدالت کرسی
اس دن اُٹھ تیرا لڑ پھڑساں عشق میرا تد ترسی
5382
جمل جہان سنے گا قصہ عشق ہووے گا ثابت
شاہنشاہ عدالت والا کرسی آپ عدالت
5383
اس دنیا پر چار دہاڑے کوئی ہسسی کوئی روسی
اوس جہان اساڈی یاری اللہ بھاوے ہوسی
5384
ایہہ گلاں کر کھچ کٹاری مارن اُتےّ ہویا
شاہ پری نے معلم کیتا ایہہ مویا کہ مویا
5385
وال اوہدا نقصانی ہویا جان میری ٹُٹ جاسی
میرے کارن جھاگ قضیئے آیا ہو اُداسی
5386
ظالم عشق میرے تک آندا مِتے کٹاری کھاسی
عاشق باجھ محمدبخشا کیکر حُسن سُہاسی
5387
ایہ مویا تاں میرے بھانے پیسی جگ ہنیرا
اس تھیں باجھ اک پلک جگت تے مشکل رہنا میرا

لفظالی:
اتفاقی = متفق ۔ ہم خیال، بندے= خاکی آدم ۔ انسان، منہ لگنا= یار مصاحب بننابے تکلف ہونا، شہرت = بدنامی ، ہُٹر ڈھونا= ڈھچر عُذر بہانہ پیش کرنا، کاری = کار آمد۔نفعے فائدے، نیتی(١) نصب العین دا فلسفہ Code of Ethics(٢) نمازدی نیت بنھی، آئیوس = میںآیا ، جان وچھنے = جان وچھڑے ( نکلے) ،آس پُنے= امید برآوے، رشتہ = دھاگا۔ تعلُّق، دفتر= اعمال نامے دا ریکارڈ ، عشق ترنا= عشق دا ہر امتحان وچوں لنگھ کے سچا کھرا ثابت ہونا، اُداسی= تارک الدنیا۔ دنیا توں رُس کے لاٹنک ہویا انسان ، متے= مبادا۔ کتے انج نہ ہوجاوے،