ورقہ 288

5388
شاہ پری نے معلم کیتا ہے ایہ یار موافق
روئے زمیں تے اسدے جیہا نہ کوئی دوجا عاشق
5389
عشق محبت میری اندر صادق مرد بھلیرا
ایسا سوہنا یارمویا تاں پیسی جگ ہنیرا
5390
شاہپری نے نال شتابی ہتھوں خنجر پھڑیا
کہن لگی شاہزادے تائیں گل سُنیں اک اڑیا
5391
جس جھگڑے دا شاہد نہ ہووے قسموں سچا کِردا
کرتوں قسم یقین لیاواں خون کریں کیوں سردا
5392
سچا کُوڑا معلم ہووے قسموں دانشمنداں
مسلمان یقین لیاون کرن جدوں سو گنداں
5393
جے کوئی کُوڑی قسم اٹھاوے سو ایمان کھڑاندا
قسم کرا جو منے ناہیں دین اوہدا بھی جاندا
5394
آدمیاں تے جِناّں سبھ نوں دین ایمان خزانہ
جو ہارے سو خوار ہمیشہ اندر دوہاں جہاناں
5395
جے تدھ سچ دلے وچ ایہوجے کجھ کہے زبانوں
کر کے قسم منامن میرا مرنا ہیں کیوں جانوں
5396
جے توں سچا عاشق نکلیں تاں مینوں بھی بھانویں
مویا ہویا مُڑ جیویں ناہیں داغ میرے دل لاویں
5397
ایہ کوئی شرط ِعشق دی ناہیں مرنا کھا کٹاراں
کر کے ضد کرن کم ایسے بھدر'یاں چھُری ماراں
5398
سیف ملوکے کہیا بی بی توں ہیں بہت پیاری
تیری قسم اساڈے بھانے سبھ قسماں تھیں بھاری
5399
پر جے ہور کرا ویں قسماں تاں اوہ بھی میں کرساں
سچ کہساں تے قدم تیرے پر ہتھ دوئے چادھرساں
5400
دھوڑ مبارک قدم تیرے دی جو ہے سرمہ میرا
پہلاں قسم اِسے دی بی بی عشق کماساں تیرا
5401
نبیاں ولیاں دی جو بیعت قسم اوہدی پھر چاواں
پھیر پیو دا متھا بی بی عاصم شاہ جس نانواں
5402
پھیر کہاں میں قسم ربے دی جس سبھ عالم پایا
واحد لاشریک ہمیشہ نہ جمیا نہ جایا
5403
دینھ چن جس نے روشن کیتے آ پنیوں خود نوروں
حسن محبت تینوں مینوں کیتی بخش حضوروں
5404
بے پرواہی لاڈ تکبّر محبوباں سنگ لایا
منت داری گریہ زاری عاشق دے بھ پایا
5405
جو میں حال حقیقت اپنی تینوں آکھ سنائی
سچو سچ ایویں ہی گزری نہ وچ ذرا خطائی
5406
سفر قضیئ جتنے جھاگے سبھ جھاگے تدھ کارن
درد فراق تیرے دا سینے ہر دم تپدا آرن

لفظالی:
موافق = ڈُھکواں پھبواں۔ مطابق، اڑیا = ٹ ک 279، سوگنداں= سونہاں قسماں ، کھڑانا= گوانا۔گُم کر دینا، بھدر= پاکھنڈی ۔ دھوکھے باز، چھری مار= ضدی جیہڑ ے کسے رحم دل ساؤ توں دان منگدے نیں نہ ملن تے اپنے ڈھڈوچ چھری مارن دی دھمکی دیندے نیں، عشق کمانا= عشق دا ہر تقاضہ پورا کرکے عشق توں سچیاں ہونا، پایا= اُپایا دا مقامی اُچارن ۔ تخلیق کیتا، سنگ= نال، منت داری= احسان مند رہنا، بھائ= بھاگ قسمت وچ ، خطائی= غلطی ، آرن = لوہار دی بھٹھی،سچاکِرنا= سچا ثابت ہو نا، کِرنا= ڈِگ کے وکھرا ہو جانا،