ورقہ 290

5426
شاہ پری پھر رہ نہ سکی عشقے صبر تروڑے
سیف ملوکے دے گل لگی مُنہ میلے انگ جوڑے
5427
شاہزادے دے موہیں اُتوں لے پیار نہ رجدی
مل مل یارے شکر گزارے گھڑی غنیمت اج دی
5428
پھیر پری فرماون لگی قسم مینوں اُس ذاتوں
جس وچ غلط نہیں اک ذرہ قدرت اسم صفاتوں
5429
جتنی تدھ ظہیری کٹی نال محبت میری
اس نالوں بھی بہت اسانوں طلب محبت تیری
5430
لوں لُوں اندر تو ہیں تو ہیں دل بھی تیرا خانہ
جس دم دا توں ملیا بیلی کیتا لکھ شکرانہ
5431
جو دن باجھ تیرے تھیں گزرے یا د جدوں اوہ آون
سے افسوس ایہناں دا مینوں تدھ بِن کیوں وہاو ن
5432
اگلے روز حیاتی والے مشکل دِسدے مینوں
شالہ یار نباہو ہوویں میں ور پاواں تینوں
5433
ایسے طرح کریندی باتاں دردوں لاڈ پیاروں
اکدوجے دا سر منہ چمن کرن غماں دا داروں
5434
غم اندوہ جو گزرے آہے کڈھن باہر ضمیروں
کُس کُسے نوں دیہن دلاسے دکھ ونڈن دلگیروں
5435
حرص محبت بہت ودھائی ہتھ مارے دل کھچوں
بعضے ہور محابے بھائی دور ہوئے سن وچوں
5436
سیف ملوک کریندا رمزاں کیسے بول عجائب
جاں اوہ موہوں کڈھن لگیےئ دل وچ ہوندے غائب
5437
شاہپری بھی کرے مزاخاں عاشق دا دل لیندی
کہندی بہتیاں ناریں وچوں حرص گھنی تدھ کیندی
5438
شہر زناں دی بی بی جیہڑی اوہ بھی بیگم تیری
ہور زنگن شاہزادی نالے رکھدی حرص گھنیری
5439
ہور جِنھاں توں ڈٹھوں اکھیں نام تیرا لے جیون
سبھو مدھ محبت والا یاد تینوں کر پیون
5440
اک تھیں اک چڑھندیاں سبھو صورتمند جواناں
حرص اونہاں دی تروڑ کریں گا میں اک نال یرانہ
5441
سیف ملوکے ہس کے کہیا سُن بی بی شاہ پریئے
حسن تیرے دا کوئی نہ ثانی جے جگ کٹھا کریے
5442
جے ہر جُون ہزار اٹھاراں خوب شکل بن آون
سبھ ہوون محبوباں ناریں حوراں وانگ وکھاون
5443
ہار سنگار پوشاکاں سُچیاں بنت بنا بنا کے
سبھو مینوں بخشے سائیں حاضر ہوون آ کے
5444
قسم ربے دی وال تیرے توں سبھو گھول گھماواں
تیرے باجھ نہ ہور کسے ول پلک اک اکھ لگاواں
5445
سچ پچھیں تاں دسّاں تینوں اصلی گل اندر دی
حال میرے دی جِبھ ہمیشہ ایہ دعائیں کر دی

لفظالی:
یارے= یار نوں ، لئے پیار = چُمیاں لے کے، سے = سینکڑے ۔ کئی سو، ذاتوں = ذات اللہ تعالی دی، اک ذرہ۔۔۔۔۔۔ = جہدے صفاتی نانواں دی قدرت وچ اک ذرہ جنی وی غلطی نہیں ، ظہیری= لک پیڑ نال انت درجے دی کمزوری، کُس کُسے= اک دوجے، نبا ہو= وفادارہر حالت وچ نباہ کرن والا، دل کِھچوں= دل دی کھچ پاروں، محابے = لحاظ ۔ دھیان۔ راکھیاں، محابے دور ہوئے= بے تکلفی ودھ گئی ، ناریں = عورتاں ' حرص گھنی تُدھ کیندی=کہدے نال چوکھی محبت کیتی آ، گھنیری حرص= ودھیری شہوانی ، محبت ، مدھ= نشہ ۔ شراب، چڑھندیاں= ودھیا۔ بہتر، جون = مخلوقات دی حیات، اٹھاراں ہزار= چھ ہزار فلک تے چھ ہزار دھرتی تے چھ ہزار پانی وچ دسدے نیں ،بنت بنا بنا کے= پوری زیب و زینت کر کے، پلک= اکھ جھمکن تے لگا سماں، حال = ہر پلک جھلک وچ دل دی بدلدی کیفیت،