ورقہ 291

5446
ربا وعدہ نال اساڈے تدھ دیدار دسّن دا
یار میرے دی صورت بن کے دسیں تاں من مندا
5447
ایہناں گلاں نال شزادے ٹھگیا جیؤ پری دا
حُبّ محبت ہوئی زیادہ کدہُن عشق جریدا
5448
اس ویلے فرماون لگی اے دلبر شہزادہ
میں اک گل کراں جے بجھیں دل دا رکھ ارادہ
5449
شاہزادے فرمایا بی بی کھول دسو گل کر کے
کون ہوواں جے سنساں ناہیں کن دلے دے دھرکے
5450
میرے نال کریں توں گلاں ہور اِس تھیں کے لوڑاں
ایس مراد لئی میں مردا جھلاّں دُکھ کروڑاں
5451
اوہناں گلاں دا بھُکھا تسا رُڑھیا اندر نیراں
بادشاہی دی دولت سٹ کے رلیا وچ فقیراں
5452
آب حیات برابر مینوںبات تساڈی مِٹھی
تھکن ڈھونڈ سکندر جیہے کد مِلے بِن چٹھی
5453
کیتا رب نصیبا میرا وانگ الیاس خضر دے
اچن چیت لدھا ایہ چشمہ بھُلےّ رنج سفر دے
5454
بات کہو اج رات خوشی دی جھات تساں جد پائی
داد دتی فریاد میری دی رب مراد پچائی
5455
شاہ پَری فرماندی لالا توں جانی دا جانی
اکھیں دی رُشنائی نالے جوبن دی زندگانی
5456
جو تدھ چودھاں برساں اندر رنج مصیبت پائی
مینوں اک دیدار تیرے وچ ساری دینی آئی
5457
صورت سخن آواز تیرے نے نال میرے جو کیتی
چودھاں برساں وچ نہ تساں اتنی ہوسی بیتی
5458
بِسْمِ اللّٰہ و الْحَمدُ لِلّٰہ کہیا سیف ملوکے
آتش شوق میرے دی تدھ دل بھخ پئی سنگ پھوکے
5459
عشق میرے دا آرن بھخیا چنگ اٹھی وچکاروں
اچن چیت تیرے گھر اندر جا پئی وچ داروں
5460
یاری تے لگ گئی اساڈی پکی کھری پیاری
پر ہُن کر کجھ حیلہ سازی ملے سُہاگ کواری
5461
میں تیرا توں میری ہوویں جان چھٹے اس غموّں
میں عاجز پردیسی ایتھے عاری ایسے کموں
5462
دیواں پریاں نال نہ چلدا میں آدم دا چارہ
جت ول جائیے چھپن نہ دیندے ڈھونڈ لیئن جگ سارا
5463
شاہ پری نے کہیا میاں کے چارہ میں کرساں
جے کجھ پتہ دیواں نوں لگا بدی تیری لے مرساں
5464
ترے لکھ پری میرے سنگ آئی نہ میں اک اِکلیّ
جے کجھ معلم ہووے اوہناں نوں ایہ آدم سنگ رلیّ

لفظالی:
وعدہ= ٹ ک ق م القیامتہ :٢٣، کدہن عشق جریدا= ہن عشق وچ صبر نہیں سی ہو سکدا،بُجھیں= معلوم کرلئیں ، مرادمجبور ہوکے، کون ہواں = جدوں کوئی بندہ ات نفرت پاروں کافر 'سُور یا اجیہی قابل نفرت شے دا ناںنہ لینا چاہے تاں ایہہ آکھدا اے ، اس تھیں کے لوڑاں= اللہ تعالیٰ کولوں ہور کیہہ چاہنا ہاں، نیراں= سمندراں دریاواں پانیاں ، بِن چٹھی = تقدیر دے خاص اجاز ت نامے توں بناں ،الیاس خضر =خشکی تے تری دے وچ ساری مخلوق دے راہنما'دیدار دےنا= پورا پورا انصاف کرنا، لالا=میاں سائیں آقا ۔ جناب، جانی دا جانی= جان دی جان ۔ روح دی روح ہستی دا مالک، پائی= جھاکی ۔ اٹھائی، دیدار تیرے وچ = تیرا دیدار کرن مگروں ، بسم اللہ و الحمد للہ = اللہ دے ناں نال ۔ مینوں منظور اے، بدی تیری= تیری بدنامی دا میہنا، آہرن=لوہار دی بھٹھی ، داروں = بارود ، سہاگ =سبھاگ ۔ شادی شدہ زندگی دی خوش قسمتی، سنگ = نال، عاری= ناقابل ۔ خالی کسے خاص صفت توں وانجیا ہویا،چارہ = تدبیر، غمّ = عربی تلفظ غم ّ ای صحیح اے،